Read MUKANDA WANZAMBI Lisamu 144 Bible Online

Lisamu 144 - MUKANDA WANZAMBI bible

Lisamu 144

¹DaDavidi. Amukiswili Yehova nkisu, diyi ilola dami, diyi walejaŋa makasamikwasa njita, diyi walejaŋa ninyinu yami kulwisha;

²Diyi luwi lwami, diyi mpwembu yami, diyi kaposhi kami kakale hikakutemukila, diyi mukwakumpulwisha; diyi nkebu yami, dimunabataminaŋa; diyi waŋovwahishilaŋa antu ami.

³Eyi Yehova, muntu wudi ŋahi mwaka wumwiluki? Mwana kamuntu wudi jihi mwaka wumushi kumuchima?

⁴Muntu wudi neyi mpepela, mafuku indi adi neyi wulelu wukuhita.

⁵Eyi Yehova zembaku mawulu eyi winzi mwishina; kwataku hamapidi, akakumuki wishi fwi-i.

⁶Asaku nzaji, wuyimwaŋi ndu-ndu; asaku nyivu yeyi, wuyibayishi.

⁷Mwiwulu muwudi ololaku chikasa cheyi; nhandishi, mpulwishi mumeji amavulu, kudi antu amumatuŋi acheŋi;

⁸Kanwa kawu kahoshaŋa yuma yamukunkulwayi, chikasa chawu chachidiilu hichikasa chachidiilu chakutwamba.

⁹Nukukwimbila kamina kakaha, eyi Nzambi; nukukuŋa muchisanji chanyonji ikumi.

¹⁰Yena diyi wenkaŋa anyanta wamwinu; diyi wahandishili kambuŋindi Davidi kumpoku yakabali yafwana.

¹¹Nhandishi, mpulwishi kudi antu amumatuŋi acheŋi, kanwa kawu kahoshaŋyuma yamukunkulwayi, chikasa chawu chachidiilu hichikasa chachidiilu chakutwamba.

¹²Anyanetu amayala ekali neyi nyitondu yikuya nakukula hawukwenziwawu; anyanetu awambanda ekali neyi malola amumawombu akubalula chachiwahi, akulambisha, neyi amwitala dawanta;

¹³Nkalaŋa jetu jiinzali, mulumbami yuma yeŋi nayeŋi; nyikoku yetu yisemununi makombakaji namakumi amakombakaji munyikala yetu;

¹⁴Aŋombi jetu alemi mavumu, abuli kumona kukala hela kukaŋa nyakusema; munyikala yetu mubuli yikonkojola.

¹⁵Antu akumona chochochu anakooleki, mwalala, antu akweti Nzambiyawu Yehova anakooleki.