Read MUKANDA WANZAMBI Lisamu 33 Bible Online

Lisamu 33 - MUKANDA WANZAMBI bible

Lisamu 33

¹Tiyenu kuwaha naYehova, enu akwakuloŋa; kushimeka kunayiwahili antu oloka.

²Musakililenu Yehova nakadada; museŋenu nachisanji chanyonji ikumi.

³Mwimbilenu kamina kakaha; imbenu chachiwahi nakuvumisha chacheni.

⁴Muloŋa izu daYehova daloŋa; nimudimu windi wejima wakashinshi hohu.

⁵Yena wakeŋa i nikuloŋa niwuŋaji; iseki denzala naluwi lwaYehova to-o.

⁶Mawulu ayilili nezu daYehova; niyileŋileŋa yawu yejima ayilili namuuya wamukanwa kindi.

⁷Yena wakokelaŋa meji akaluŋalwiji hamu mulumba fwi-i, nima nyiŋi wayi swekaŋi mumatalindi akuswekela.

⁸Iseki dejima dimwakami Yehova; antu ejima ashakama munu mwishina amuzaali woma hohu.

⁹Yena wahosheli hohu, chimwekana nikumwekana, wayilejeli, chikola nikukola mbe.

¹⁰Yehova wakaŋeshaŋa mpùŋai jakwataŋawu nyuza, wafwishaŋa mwafuukulaŋawuantu puchi.

¹¹Yadilejaŋayi Yehova yemanaŋa haya nyaka mbe, niyitoŋojoka yamumuchima windi yakolaŋa kumakiŋu ejima mwamba kavwalikilaŋawu antu.

¹²Muza wukweti Nzambi yawu Yehova wunakooleki, diwu antu anatondiyi kwikala wuswana wambala.

¹³Yehova mwiwulu mwadiyi watalaŋa, wamonaŋa anyana kawantu ejima.

¹⁴Mwashakamayi wayitalaŋi antu ejima ashakama heseki.

¹⁵Diyi watuŋaŋa nyichima yawu wejima wawu, diyi washinshikaŋi nyidimuyawu yejima.

¹⁶Kwosi mwanta wahandilaŋa akuvula kwanjitaku, iyala mukwaŋovu hapulukilaŋa ŋovu yindi yabadikaku.

¹⁷Kawalu hichuma chamukunkulwayi, hikakutwesha kuhandisha muntuku, hikakupulwisha muntu naŋovu yaku yabadikaku.

¹⁸Tiyenu, disu daYehova datalaŋa hadi akwakumwakama, hadi wenaakuhwelela luwi lwindi,

¹⁹Kulonda kupulwisha wumi wawu mukufwa, kulonda kuyihandisha hamwaka wanzala.

²⁰Muchima wetu wamuchiŋejaŋa Yehova nakumutalila, diyi nkwashi yetu, diyi nkebu yetu.

²¹Muloŋa muchima wetu wukutiya kuwaha nayena, nanochu chitunakuhweleli ijina dindi dajila.

²²Luwi lweyi, eyi Yehova, lwikali hadetu, chakweseka nanomu namutunakukuhweleli.