Read MUKANDA WANZAMBI Lisamu 34 Bible Online

Lisamu 34 - MUKANDA WANZAMBI bible

Lisamu 34

¹DaDavidi hadimbeniyi kuzaluka kumesu Abimeleki, wamuhayili, hakuya. Nuku mukiswilaŋa Yehova nkisu mafuku ejima, kukanwa kami kukwikala yowu kumushimeka hohu.

²Muchima wami wukudisamba naYehova; muntu wawunda wakachiti yawa kazaŋilala.

³Mulemeshenu Yehova nanami hamu, tutúumbakeshenu ijina dindihamu.

⁴Ami namukeŋakeŋeli Yehova, waŋitiyili, wampulwishili muwoma wami wejima.

⁵Atalili mesu kudi yena, mucha nikucha to-o, hiyamba katiya nsonyi mumesuku.

⁶Kazweŋi iwu wabileleli, Yehova wamutiyili, wamuhandishili muyihuŋuyindi yejima.

⁷Kaŋelu kaYehova wayituŋala amwakama musumba kwi-ndo, wayipulwishaŋi.

⁸Tompenu mutiyi chawahayi Yehova; muntu wabatamaŋa mudi yena nakooleki.

⁹Mwakamenu Yehova, enu antu indi ajila, muloŋa amwakamaŋa hiyabulaŋa chumaku.

¹⁰Nyenzi yanyituŋa yabulaŋa, yatiyaŋa ninzala, kwinza amukeŋaŋa Yehova hiyakabula chuma chachiwahi nichimuku.

¹¹Inzenu, enu anyana, mutiyi kudami, niyileji kumwakama Yehova.

¹²Muntwinyi natondi wumi, wakeŋa a kushakama mafuku amavulu kulonda amoni yayiwahi?

¹³Hembaku idimi deyi dibuli kuhosha yatama, ninyivumbu yeyi yibulikuhosha yakudimbana.

¹⁴Ambukaku kuyuma yatama, ilaku chachiwahi; keŋakeŋaku kuwunda, wukuhaŋi chakuhaŋi.

¹⁵Mesu aYehova atalaŋai antu aloŋa, nimatu indi atiyililaŋa chakutambikawu.

¹⁶Mesu aYehova adikaŋi mbe nawantu akwila chatama, kulonda abuli kuyanuka cheŋi hanu hamaseki.

¹⁷Aloŋa atambikili, Yehova watiyili, wayipulwishili muyihuŋu yawuyejima.

¹⁸Yehova wudi kwakwihi nawantu abaluka nyichima yawu mwivumu, wayamwinaŋi antu akweti spiritu yachikeka puchi.

¹⁹Yuma yakala yamonawu aloŋa yayivulu; ilaŋa yejima Yehova wayipulwishaŋa mu.

²⁰Wahembaŋi mafwahindi ejima; nidimu dakukotokahu kwosi.

²¹Yatama yakajaha antu atama; niwena akuhela aloŋa akatanya.

²²Yehova wakuulaŋa wumi wawambuŋindi; abatamaŋi mudi yena kwosiniwumu wakatanyaku.