Read MUKANDA WANZAMBI Lisamu 35 Bible Online

Lisamu 35 - MUKANDA WANZAMBI bible

Lisamu 35

¹Isamu daDavidi. Eyi Yehova, lwaku nanawa akulwa nanami; asa njita nanawa akudasa nanami.

²Kwataku kunkebu, nikunkebu yeneni, Ijimeni mbe wunkwashuku.

³Kwataku iyoŋa, wimani munjila nakuyijikilila antu akunbaŋi; hoshakunanami, neyi, Ami yami wamwinu weyi.

⁴Antu akukeŋakeŋa wumi wami atiyi nsonyi, asawuki kwawu; antu atoŋojo kaŋi kuŋila chatama ayifuntishumu, akooli nsonyi.

⁵Ekali neyi muzuŋu walelukaŋi nampepela, ayihaŋi kudi kaŋelu kaYehova.

⁶Njila yawu yiiyili mwidima yiseneni, kaŋelu kaYehova kayihaŋi.

⁷Muloŋa nantili wanda kuwina chakadi muloŋa, anampundili wumiwami wina chakadi muloŋa.

⁸Kujilumuka kumuholokeli nakumukasumwisha hohu; adikwati yemwe nindi muwanda windi wanatiyi: afumu yemwenindi ajilumuki hohu.

⁹Muchima wami wukuzaŋala naYehova; wukutiya kuwaha nawamwinu windi.

¹⁰Mafwahami ejima akwila nawu, Eyi Yehova, wunadifwani naneyi hinyi? Wapulwishaŋi kazweŋi kudi wuna mubadiki Ŋovu, mwalala, wapulwishaŋi kazweŋi niwabulayuma kudi wamubuwaŋi.

¹¹Ayinsahu akweti makudi hiyakunyamuka, hiyakuŋihula yuma yinabulikwiluka.

¹²Hiya kunbiŋi shilamu katama nayayiwahi yinayila, kulonda abondi muchima wami.

¹³Hakwila ami kwami chakatiluwu navweli kwayikeleyi hohu; nakabishili muchima wami nakushakama nanzala; nikulomba kunalombeli kwafuntili cheŋi muntulu yami.

¹⁴Nelili neyi chelaŋa muntu nebwambu dindi hela namana kwindi; nanoŋiminina kudila, neyi muntu wukudila mama yindi.

¹⁵Ilaŋai china mweni kukala atiyili kuwaha, adipompesheli hamu: antu atama adipompesheli nakuntiyaŋena, ninami hinachilukiluku; antaboleli tabole-e, kukumisha nehi.

¹⁶Neyi antu abula kujila, akwakuseha akwawu kuyisela, ansumaneneni kumaji awu.

¹⁷Mwanta, wukutalaŋi tuhu namesu? Nhandishi, hiyakuntamisha, niwami nakeŋi nankashi kamwamwini kudi anyituŋa.

¹⁸Nukukusakilila muchipompelu cheneni, nukukuhameka mukachi kawantu amavulu.

¹⁹Awa aneli ayilumbu jami chakadi nsaŋu bayi anzaŋilelaku, awa anhelaŋi chakubula muloŋa bayi anyachila disu dawuku.

²⁰Hiyahoshaŋi yakumwenaku, ilaŋa antu ashakama chachiwahi nakuwunda mwituŋa hiyakuyifuukwila yuma yakutwamba.

²¹Mwalala, ami atwaminini mukanwa kawu nankashi; aŋilili nawu, Wo-o! Wo-o! Tunachimoni!

²²Wunachimoni, eyi Yehova, bayi wumwenaku, eyi Yehova, bayi wikalakwakulehi nanamuku.

²³Tonaku, wuhinduki, wunsompesheli nsaŋu yami, eyi Nzambi yami, eyiMwanta wami.

²⁴Nsompeshi, eyi Yehova Nzambi yami, mwomweseka kuloŋa kweyi; bayi anzaŋilelaku.

²⁵Bayi ahosha munyichima yawu nawu, Ndochu, dimu tunakeŋuku. Bayi ahosha nawu, Tunamuminyi dehuku.

²⁶Antu atiyaŋa kuwaha chinamonaŋi kukala atiyi nsonyi, abayili hamu wejima wawu. Akuditohesha nanami avwali ninsonyi nikusawuka.

²⁷Antu akumona nsaŋu yami yaloŋa kuwaha adikuwi nakutiya kuwaha, azaŋalali; mwalala, ahoshi mafuku ejima, nawu, Yehova atohi, diyinakeŋi kumona kambuŋindi kushakama chachiwahi.

²⁸Idimi dami dikutena kuloŋa kweyi, niyakukushimeka mwaana wejima.