Read MUKANDA WANZAMBI Lisamu 73 Bible Online

Lisamu 73 - MUKANDA WANZAMBI bible

Lisamu 73

¹Isamu daAsafwi. Chalala, Nzambi welaŋa Isarela chachiwahi hohu, wowu antu atooka mumuchima.

²Hakwila ami hasheli hanti hohu nakusenuka nyendu yami munjila; nyendu yami yakeŋeli kuselumuka tuhu.

³Muloŋa ami nayitiyili asupa ichima, chinamweni antu atama chakushakamawu chachiwahi.

⁴Hiyamonaŋa nyonji yakufwaku, ŋovu yawu yakola ngu.

⁵Hiyamonaŋa kukala kwamonaŋawu akwawu antuku; hivamonaŋi helayikatu yamonaŋawu akwawu antuku.

⁶Dichi kudinka wanta hiyakuchivwala neyi ileŋi dakuvwala munshiŋu; anadivwiki madombu neyi ihina dakuvwala.

⁷Mesu awu anakumini dakwidika kunamutu namanji; akweti yuma yejima yakeŋi nyichima yawu niyabadikamu.

⁸Enda aseha akwawu, chatamawu hiyakuhosha jakukabisha akwawu, ahoshaŋa mazu akutwala kwiwulu hohu.

⁹Mutunwa twawu enda ahosha mazu adikaŋa namawulu, nimadimi awuhiyakwendola nihanu hamaseki.

¹⁰Dichi antu indi akafuntaku cheŋi, akayikamuna meji akwinzesha lupasa.

¹¹Hiyakwila nawu, Nzambi wukwiluka jihi? Mukwakubadika Kwiwulu welukaŋamu, tahindi?

¹²Talenu, awa diwu atama; wena chashakamawu mafuku ejima chakubula kukabakana, mahetawu hiyakuvula,

¹³Chalala nadikabishi tuhu kwami nakuditookesha mumuchima wami, nakwisuka kumakasami nibuli muŋa.

¹⁴Ankatishili mwaana wejima, ambabesheli habudidi habudidi.

¹⁵Chinelili nami nihoshumu, kukasumuka nakwatili dehi ikiŋu dawanya neyi makasu.

¹⁶Chinatoŋojokeli nami niluki chumichi, nachimweni chakala nankashi;

¹⁷Nichineŋilili mumalala aNzambi, nishinshika nikushinshika chachiwahi mwamba kakuminawu.

¹⁸Komana eyi wayisha dehi mwasenena; hiwukuyidimbwisha heseki akisiki chikupu.

¹⁹Chakadi nikuleha, mwawu himuneli dehi kwehembi hohu. Jinayikumi dehi namutentu wanafuwu.

²⁰Chahindukaŋayi muntu hakudiwula mwanalotiyi, dichi nineyi Mwanta, chiwukuhinduka namutulu wukusekesha chifu chawu.

²¹Muchima wami mwivumu wadiŋi nakulwisha hohu, natiyili muchima mwivumu lezu,

²²O chinasupilami hinukuyamba, nadiŋi tuhu neyi kanyama hohu kumesu eyi!

²³Hela chochu nidi neyi hefuku hefuku, wunankwati kuchikasa chami chachidiilu.

²⁴Wakanlombolaŋa, wakanlejaŋa, nkumininaku wakantambula mwalema.

²⁵Ochu ni kweti wacheŋi mwiwulu? Hela hanu hamaseki kwosi wacheŋi inukukeŋaku, chiŋa yeyi hohu.

²⁶Nimumujimba wami nimumuchima wami jinakumi dehi; ilaŋa Nzambi diyi Ŋovu yamuchima wami, diyi iseka dami nyaka yejima.

²⁷Komana chalala awa adi kwakulehi naneyi akajilumuka, ejima akwambuka kudeyi nawuvumbi wawu, wunayijilumuni dehi.

²⁸Ilaŋa ami kwami chachiwahi kukundama kwakwihi naNzambi: namwila dehi Mwanta Yehova nami dimu mwami mwakubatamina, kulonda nishimuni nyidimu yeyi yejima.