Read MUKANDA WANZAMBI Lisamu 83 Bible Online

Lisamu 83 - MUKANDA WANZAMBI bible

Lisamu 83

¹Hikamina. Isamu daAsafwi. Eyi Nzambi, bayi wumwenaŋa zoŋuku, bayi wulekaŋa kuhoshaku, bayi wuduŋumika zoŋuku, eyi Nzambi.

²Tala, ayilumbu jeyi hiyakuleta ipumba, awa akuhelaŋa hiyakunyamuna nyitu yawu kwiwulu.

³Hiyakuyikasila kasila antu eyi mpùŋa yatama, hiyakuyitiyaŋena antu eyiwasweka.

⁴Aneli nawu, Tuyenu, tuyifumishuhu abuli kwikala muza; kulonda ijina daIsarela akabuli kudanuka nawa cheŋi.

⁵Anatiyaŋani dehi izu dawu dimu; anakwati mpùŋa yawu yakudikaŋa naneyi.

⁶Nimatenti aEdomi, niaIshimeli; niMowabi nawaHagareni;

⁷NiGebali, naAmoni, naAmaleki; niFwilistiya nawashakama muTira;

⁸Ashuri niyena nadibombi nawu, anayikwashuku anyana kaLoti. Sela.

⁹Yikoŋi mwomuwayikoŋeli aMidiyani; muwayikoŋeli aSisera, naYabini, kukaloŋa Kishoni,

¹⁰Ajilu mukili kuEndori; abalumukili neyi wushi waheseki.

¹¹Ayilolu jawu niwena yili akeli neyi Orebi naZeyebi; mwalala, atulambatwawu akeli neyi Zebahi naZalumuna;

¹²Elili nawu, Tutambulenu matuŋa aNzambi.

¹³Eyi Nzambi yami, yili akeli neyi lunkuŋu lwahitaŋi fuku-fuku; neyintotu jalelokaŋa nampepela;

¹⁴Neyi kesi kochaŋa isaŋa, neyi mulapu wakesi wakwatishapa mapidi kesi.

¹⁵Yihaŋi nampepela yeyi yeneni, yizaalishi woma nanvula yeyi yeneni.

¹⁶Yibayishi kweyi, kulonda akeŋakeŋa ijina deyi, eyi Yehova.

¹⁷Akatiyi nsonyi, akazaazi nyaka yejima; mwalala, akabayi kwawu, akajilumuki;

¹⁸Kulonda akeluki nawu yeyi hohu, yeyi wukweti ijina deyi daYEHOVA, yeyi Mukwakubadika Kwiwulu deseki dejima.