Read MUKANDA WANZAMBI Lisamu 90 Bible Online

Lisamu 90 - MUKANDA WANZAMBI bible

Lisamu 90

¹Kulomba kwalombeliyi Mosi muntu waNzambi. Eyi Mwanta, yeyi wunekali mwetu mwakushakama, kumakiŋu ejima mwamba kavwalikilaŋawu antu.

²Nimapidi achidiŋi kanda ayivwali, hela iseki nampata yamunu mwishina wuchidi kanda wutiyi nyisopu yakuyivwalaku, kufumisha kumashiita, oku-u, nakutwala kunyaka yahaya nyaka, yeyi Nzambi hohu.

³Hiwukubalumuna antu ekali lunkuŋu, neyi, Funtenu cheŋi, enu anyanakawantu.

⁴Muloŋa nyaka ikombakaji wayimona kweyi neyi haloshi hohu hanahiti dehi, neyi chilu chahawufuku chimu hohu.

⁵Hiwukuyikumpula neyi nadibaji, yidi neyi tulu, habudidi yidi neyimatahu amenaŋa.

⁶Habudidi hiyakukula hiyakumena chachiwahi, hamelela anayikesi dehi, anomi dehi chau.

⁷Muloŋa etu tunanoŋi dehi nanochu chiwunazuwi, tunazaazi nandombuyeyi.

⁸Kuluwaluwa kwetu wunachishi kumesu eyi, nshidi jetu jakujinda wunajishi muchejeji chakumesu eyi.

⁹Mafuku etu ejima hiyakuhitila kwamundombu yeyi hohu, hitukukumisha nyaka yetu neyi kaanu hohu.

¹⁰Mafuku anyaka yetu ashikaŋa munyaka makumi atanu namakumi ayedi, hela neyi naŋovu yamuntu yikushika munyaka makumi atanu namakumi asatu, Ŋovu oyu yakukabakana chakukabakana hohu nakumona ihuŋu; mwaka yaya dehi, hitukutúuka.

¹¹Neluki Ŋovu yakuzuwa kweyi hinyi? Hinyi neluki ndombu yeyi kulonda akutiyi woma?

¹²Tuleji kuchinda mafuku etu, kulonda tukwati maana kumuchima.

¹³Funtaku cheŋi, eyi Yehova. Kumwakanyi ntahi? Balumukaku cheŋi mumuchima weyi hansaŋu yetwetu ambuŋeyi.

¹⁴Atwikutishi mwani budidi naluwi lweyi, kulonda tutiyi kuwaha nakuzaŋalala mafuku etu ejima.

¹⁵Tutiyishi kuwaha kwakweseka mumafuku iwunatubabeshi, nakweseka munyaka yitunamoni yatama.

¹⁶Yimwekesheli ambuŋeyi mudimu weyi, nikuwaha kweyi kumwekani hadianyanawu.

¹⁷Lubanji lwaYehova Nzambi yetu lwikali hadetu; wutukolesheli nimudimu wamakasetu; mwalala, kolesha mudimu wamakasetu.