Read MUKANDA WANZAMBI Liproverbia 13 Bible Online

Liproverbia 13 - MUKANDA WANZAMBI bible

Liproverbia 13

¹Mwana wukweti maana watiyaloŋa mwamufumbaŋayi tata yindi; ilaŋa mukwakudiwula akwawu hatiyililaŋa mwamuhosholaŋawuku.

²Kunyikabu yamuntu kwokwakadiilayi yayiwahi; ilaŋa nyichima yawakwakukwatila akwawu makasu yakena yoyandombu hohu.

³Muntu wahembaŋa kanwa kindi diyi wahembaŋa wumi windi; muntu waasamaŋa nankashi nyivumbu yindi wakakisika.

⁴Muchima wankópi wakuminaŋa dakufwila hohu, hamonaŋa chumaku; ilaŋa muchima wamukwakudikita wakekala namanji.

⁵Mukwakuloŋa hakeŋa yakutwambaku; ilaŋa muntu watama wanunkishaŋa kwawu, wamba katiya nsonyi.

⁶Kuloŋa kwahembaŋa muntu wendaŋa mwoloka; ilaŋa kutama kwadimbwishaŋa mukwanshidi heseki.

⁷Kwekala wadiheteshaŋa ilaŋa hakweti chumaku; kwekala wadimweshaŋa wuzweŋi ilaŋa wasweja nankashi maheta.

⁸Chakukuula nachu wumi wamuntu wowu mahetindi; ilaŋa kazweŋi hamonaŋa kumufunyinaku.

⁹Chejeji chawakwakuloŋa chazaŋalalaŋa, ilaŋa inoŋu dawantu atamaakadijima.

¹⁰Kudinka wanta kwasoŋaŋa kwantadi hohu; ilaŋa antu alejewaŋa chachiwahi akweti maana.

¹¹Maheta akuhetela kuyuma yakuhemesha amba kaya nakukeha; ilaŋa muntu wapompeshaŋa yuma yindi nakukabakana wakamona yakaya nakuvula.

¹²Chikuhwelela chakwila hachike-e chaleteshaŋa muchima kukata; ilaŋa neyi yiwakeŋa aŋa yinenzi dehi chikwikala mutondu wawumi.

¹³Mukwakudiwula izu wadikojejaŋa kukisika; ilaŋa muntu waakamaŋa kuleja akamusomona.

¹⁴Kuleja kwalejaŋayi mukwamaana hikaseloki kawumi, kakumufumishaŋa muntu kunyihetu yakufwa.

¹⁵Kashinshi kakawahi kamuletelaŋa muntu wuselewa; ilaŋa njila yawakwakukwatila akwawu makasu yasweja mankulokela.

¹⁶Antu ejima adihoŋeshaŋa mumuchima akoŋaŋa mwakwiluka; ilaŋa chisupi watandumunaŋa wusupi windi hatooka.

¹⁷Kaŋanda watama waholokelaŋa muyatama, ilaŋa muluwa wakashinshi waleteshaŋa kukola mumujimba ngu.

¹⁸Niwuzweŋi ninsonyi yakawana muntu walekaŋa kumufumba; ilaŋa muntu waakamaŋa mwakumuhosholawu akamulemesha.

¹⁹Kumona chuma chiwakeŋaŋa chatowala kumuchima; ilaŋa kufuma kuyatama ayisupi achimona hichishimashima.

²⁰Endaku nawakwamaana nineyi wakekala mukwamaana; ilaŋa wadikundana wayisupi wakamwenamu jakala.

²¹Kutama kwahaŋaŋa akwanshidi; ilaŋa akwakuloŋa akayisomona yayiwahi.

²²Muntu muwahi washilaŋa ezukulu indi wuswana; nimaheta amukwanshidi ayitentekela mukwakuloŋa.

²³Kudya kwakuvulu kwafumaŋa kukudima kwawatuzweŋi; ilaŋa kwekalayakisikilaŋa kubula wuŋaji.

²⁴Muntu wukuleka kweta mwanindi mutondu hamukeŋaku; ilaŋa muntu wamukeŋa wukumubabeshaŋa hichatelela.

²⁵Mukwakuloŋa wadyaloŋa dye-e nichakekutayi; hakwila mumavumu awantu atama mwakabulena.