Read MUKANDA WANZAMBI Liproverbia 18 Bible Online

Liproverbia 18 - MUKANDA WANZAMBI bible

Liproverbia 18

¹Wadambulaŋa hakanka windi nafwili mwakeŋa ayi yena hohu, hakuzuwila maana alala ejima.

²Chisupi hatiyaloŋa kashinshi kuwahaku, wakeŋa a chipa muchima windiwudimwekeshi hohu.

³Muntu watama chakwinzayi hikukwinza nikusekeshewa, ninsonyi hiyikwinjila hamu nakusawuka.

⁴Mazu amukanwa kamuntu hiinyirii hadu; kasulu kamaana kadi neyikakaloŋa kamuta.

⁵Kwakama muntu watama kulonda kuheŋesha muloŋa wamukwakuloŋa hichachiwahuku.

⁶Nyivumbu yachisupi yeŋilaŋa muyikonkojola, nikanwa kindi kaditambikila ŋanyinkakambu.

⁷Chisupi wakisikilaŋa kanwa kindi, nyivumbu yindi himuhetu wakufwawumi windi.

⁸Mazu amukwatusha wushawu adi neyi tuyakudya twatuwahi twashikumukaŋa mukachi kevumu.

⁹Nimuntu wazeyazeya kumudimu windi himana kwawu nimukwakujilumuna.

¹⁰Ijina daYehova hikaposhi kakola, mukwakulona hakutemukilamu, amwenenamu nizo-o.

¹¹Maheta amukwakuheta diwu mukala windi wakola, wayifuukulana kwindinindi, Himpwembu yanyuna.

¹²Muchima wamuntu wasambilana kudivuna, kukumininaku hikujilumuka; kudizoza kwasambilana, nkumininaku hikulema.

¹³Muntu welaŋa wuchidi kanda atiyi chachiwahi hakwakula, chamuleŋelaŋa niwusupi ninsonyi.

¹⁴Muchima wamuntu wamukwashaŋa kudi kaŋejaku nawufwayi windi, ilaŋa muchima wabaluka dehi wukuwutwesha hinyi?

¹⁵Muchima wamuntu wababala wakwataŋa kwiluka; matu awakwamaana akeŋakeŋaŋa kwiluka.

¹⁶Chamukunkulu chamuntu chamumwenaŋa chididi; chamushikijaŋa kumesu awamaneni.

¹⁷Muntu wasambilaŋa kuholokela mukwawu diyi wamwekanaŋa neyi waloŋa, ilaŋa mukwawu wukwinza nakumusandujola.

¹⁸Chinjikijilu chakusakula nachu chamweneshaŋa yikonkojola, chaambulaŋani akwaŋovu.

¹⁹Mana kwamuntu neyi anamuhilishi dehi wakala nankashi kumukokweja, kutambula mukala wampwembu chaswayi; yikonkojola yidi ochu yidi neyi nyikomenu yakwitala damalola.

²⁰Ivumu damuntu dakekuta nyikabu yakukanwa kindi; wakekuta yakamuvulila kunyivumbu yindi.

²¹Kufwa nakuhanda yekala kuŊovu yedimi, niwena adikeŋa akadya nyikabuyadu.

²²Yowu wukuwana mumbanda nawani chuma chachiwahi, namoni dehi wuselewa wakudi Yehova.

²³Kazweŋi walembaŋa chakulemba, ilaŋa mukwakuheta waakulaŋa naŋovu.

²⁴Muntu wakwataŋa amabwambu amavulu wadikokelaŋa kukisika; ilaŋa kwekala ibwambu wasweja kulamata, chakubadika mana kweyi.