Read MUKANDA WANZAMBI Liproverbia 20 Bible Online

Liproverbia 20 - MUKANDA WANZAMBI bible

Liproverbia 20

¹Vinyu himukwakutaŋula akwawu, walwa washetana himukwandombu, antu ejima akupwapukilamu hiyakweti maanaku.

²Mutentu wafwaŋawu antu kudi mwanta wudi neyi chabulumaŋa mutupa; muntu wamuvulokapa azuwi navulumuni dehi wumi windi yomweni.

³Muntu wukwimena yikonkojola hahalehi wukumwenamu kulema; ilaŋa ayisupi ejima mudimu wawu wakuzupazupa.

⁴Nkopi kwonti kwindi kudima nindi, Kudi chishi ka; dichi hachilaaka chakwaŋula wakalombaŋa yakulomba, hakamona chumaku.

⁵Mpuŋa yekala mumuchima wamuntu yidi neyi inyiŋi, ilaŋa muntuwakashinshi wukuyitaha.

⁶Antu amavulu ashimujolaŋa luwi lwawu awenawu; ilaŋa muntu washinshika akumuwana kudinyi?

⁷Muntu waŋa wendaŋa mwindi mwamuwahi, anyanindi akumulondela munyima anakooleki.

⁸Mwanta washakama hetanda dawanta dakusompela wamwaŋapa kutamakwejima namesu indi ndu-ndu.

⁹Hinyi wukutwesha kuhosha nindi, Ami natookesha dehi muchima wami, nshidi yami yinanfumi dehi, natooki dehi to-o?

¹⁰Malola akupezelesha nachu eŋi neŋi, niyesekelu yeŋi nayepi, Yehova wayimona yejima, nindi hiyishimashima hohu.

¹¹Hela mwana wanyanya amwilukilaŋa kuyuma yelaŋayi, neyi nyidimuyindi yitooka, hela neyi yoloka.

¹²Itu datiyililaŋa, nidisu damonaŋa, Yehova diyi wayileŋeli ejimawu ayedi.

¹³Bayi wukeŋaŋa tuluku, wakenza kashika kuwuzweŋi, toneshaŋa mesu eyi, wakekutaŋa yakudya.

¹⁴Mukwakulanda nindi, Katama katama; chakuyayi munjila yindi hakudisama.

¹⁵Chawuru tuhu wudi kwoku, hela marubi amavulu adi kwoku; ilaŋa nyivumbu yeluka maana hichuma chawuseya walema nankashi.

¹⁶Muntu wukukuula mukwawu wakadi kwiluka mutambuli chuma chindi chakuvwala, nimuntu wukukuula mumbanda wakadi kwiluka mutambuli kapopu.

¹⁷Kudya kwakudiila kukutwamba kwamutowela muntu, ilaŋa hakukuminina mukanwa kindi mwakenzala malola.

¹⁸Yuma yejima yafuukulaŋawu antu yakolelaŋa kumpùŋa; kwataku kunjita chakudilejaleja maana.

¹⁹Muntu wakimbukaŋa nakushimuna jansachi wamwekeshaŋa yakujinda; dichi dinu bayi wumulabilila muntu wasweja kwasajala nyivumbu yinduku.

²⁰Muntu washiŋaŋa tata yindi hela mama yindi inoŋu dindi akadijima mumwidima wabwi chikupu.

²¹Wuswana hakusambila akuwutambula swayi; ilaŋa kuwakakuminina hiwakakiswilewa nkisuku.

²²Bayi wakela neyi, Ami nakayifuntishila yatama yaneluwuku; muchiŋejikweyi Yehova, yena diyi wakakwamwina.

²³Yikuŋu yakupezelesha nachu yabula kuta Yehova wayimona nindi hiyishimashima; pezu yakutwamba hiyayiwahuku.

²⁴Kwendola kwamuntu kwakudi Yehova; neyi chochu, muntu wukushinshika ŋahi mwakuyayi?

²⁵Neyi muntu wukunyakala kwila nindi, China chajila, chikwikala muhetu wakufwamu yena, chochimu nawa neyi wukudishiilamu nindi, Nakela mukampanda, nkumininaku hakwihujolamu.

²⁶Mwanta wukweti maana wapepaŋa antu atama halwalu, wahitishaŋa humwishi wakuhula nachu.

²⁷Spiritu yamuntu hiinoŋu daYehova dakutalatala nachu mumuchima windi mwivumu.

²⁸Niluwi ninsaŋu yalala yahembaŋa mwanta; itanda dindi dawanta dakolaŋa naluwi.

²⁹Kuwaha kwawanyikwenzi jojiŋovu jawu; lubanji lwawatushinakaji jojinvu jawu.

³⁰Nyinkakambu yakatishaŋa yoyafumishaŋa kutama; dichi kweta kwashikaŋa mukachi kamuchima mwivumu.