Read MUKANDA WANZAMBI Liproverbia 26 Bible Online

Liproverbia 26 - MUKANDA WANZAMBI bible

Liproverbia 26

¹Neyi nvula yachishika yitooka yikunoka hankanza, hela neyi nvulayikunoka hachila aka chakwaŋula kudya, chochu nawa kulema hikwamutelela chisupuku.

²Chakimbukaŋa musweswa, nichatúukaŋa kambimbi, dichi chekalaku shiŋana kwakadi chitela, hikwatuntamaŋa hadi muntuku.

³Chikoti chakawalu, chikuŋu chamukanwa kachimbulu, mutondu wanyimaja wayisupi.

⁴Bayi waakula chisupi mwaya wusupi winduku, wakenza kamufwana nineyi nawa.

⁵Mwakuli chisupi mwaya wusupi windi wakenza kadimona nindi wukwetimaana.

⁶Muntu wukutuma chisupi wuŋanda nadiketuli nyendu yindi yomweningwa, ngwa, nanwi yakumona kukala.

⁷Nyendu yachifwayi yayekelaŋa; dichi chidi nichishimu mutunwa twawayisupi.

⁸Muntu wukulemesha chisupi wudi neyi muntu wukunona njeki yatumalola twasweja kulema wuseya, hakuyinatila hamulumba wamalola amukunkulwayi.

⁹Chishimu namutunwa twawayisupi chidi neyi mwiŋa wuneŋili muchikasa chamukwakusheta walwa.

¹⁰Muntu wukukwatila kumudimu windi niayisupi, niakwakudihitila, wudineyi muntu wukwasa nawuta wamukunji, chanaasiliyi hakukatisha antu ejima.

¹¹Chisupi wafuntilaŋa muwusupi windi wudi neyi kawa wafuntilaŋa yasanzayi.

¹²Wunamumoni muntu wadimona nindi, Ni kweti maana? Nichisupintahi akumukuhwelela, bayi yenaku.

¹³Nkopi welaŋa nindi munjila mudi mutupa; hanzi hadi mutupa.

¹⁴Chabalumokaŋa nkópi hakadidi kindi chidi neyi chateŋojokaŋa chenzelu hanyonji yachu.

¹⁵Nkoŋi washapa chikasa chindi hacheŋa jamukaŋaŋa jakuchileta cheŋi kukanwa.

¹⁶Nkoŋi wadimonaŋa nindi wudi nama ana akubadika amayala atanu nayedi atweshapa kwakula mwakashinshi.

¹⁷Muntu wukudihitila, neyi wukudikabakesha nayikonkojola yambalaya wakwawu, wudi neyi muntu wukukwatila kawa kumatelu.

¹⁸Muntu wukudimba mukwawu, hakwila nindi, Hinidi nakuhemaku?

¹⁹wudi neyi muntu wazaluka wanatolapa niyimunyi, ninsewu, ni kufwa.

²⁰Kesi kajimaŋa kubula nchawa, nikwabula mukwatushawushawu yikonkojola yikumana.

²¹Chelaŋa malasha hamakala akesi, nichelaŋa nchawa hakesi, dichadiyimuntu wayikonkojola, wasaŋumunaŋa ndombu.

²²Mazu amukwatushawushawu adi neyi tuyakudya twatuwahi twashikumukaŋa mukachi kevumu.

²³Nyivumbu yakutena kukeŋa namuchima watama yidi neyi inuŋu yana kwituwumazozu asiliva.

²⁴Muntu wukweti nkunyi watwambaŋa nanyivumbu yindi, ilaŋa mumuchima windi watudikamu kudimbana;

²⁵neyi wukuhosha nakadizu kakovu bayi wumwitiyaku, muloŋa mumuchimawindi mudi yishimashima yitanu nayiyedi.

²⁶Hela nkunyi yindi yikudibuta mukudimbana, kutama kwindi kwakamwekana hatooka kumesu achipompelu.

²⁷Muntu wukupunda wina wakakulukilamu, muntu wukubindumuna ilola dakamufuntila yomweni.

²⁸Idimi dakutwamba dahelaŋa anakatishiyi; nikanwa kalambishaŋa kwawukaleteshaŋa ihuŋu.