Read MUKANDA WANZAMBI Liproverbia 27 Bible Online

Liproverbia 27 - MUKANDA WANZAMBI bible

Liproverbia 27

¹Bayi wudisama yakumadikuku muloŋa hiwuneluki yakasoŋa mwifukuku.

²Akuhameki kudi mukwenu, bayi nakanwa keyeyi awenuku; kudi wacheŋi, bayi nanyivumbu yeyeyi awenuku.

³Ilola dalema niwusekulula walema, ilaŋa kuzuwa kwazuwaŋa chisupi kwabadika yejima yiyedi kulema.

⁴Ndombu yikweti wukatu, kuzuwa hidibaji; hakwinza mukawu wukwimanakuhinyi?

⁵Kuhoshola kwahatooka kwabadika kukeŋa kwakujinda.

⁶Yitu yakudi mukwenu wakukepa yikweti kashinshi, ilaŋa kukupwepujola kudi chilumbu cheyi chakutwamba.

⁷Muntu wekuta dehi hakukeŋa namutu wawuchuku; ilaŋa muntu wudinanzala wamonaŋa yalula, yejima yatowala hohu.

⁸Muntu wukujimbala kwindi kwekalayi, wudi neyi kajila najimbali kuchisakala chindi.

⁹Manji namalasha atiyishaŋa muchima wamuntu kuwaha, dichi chatowala niibwambu damuntu wukuleja mukwawu yakumuchima.

¹⁰Niibwambu deyeyi aweni, niibwambu datata yeyi, bayi wakayilekaku; bayi wuya kwitala damana kweyi ifuku diwukumona kukalaku; mukwenu wudi nindi kwakwihi nabadiki mana kweyi wudi kwakulehi.

¹¹Eyi mwanami, ikalaku mukwamaana, wutivishaŋa muchima wamikuwaha, kulonda nakatweshi kwakula muntu wukunsawula.

¹²Muntu wadihoŋeshaŋa mumuchima wamonaŋa katama, hakubatama, ilaŋa abula maana ayaloŋa tuhu kwawu, hiyakumwenamu jakala.

¹³Wukukuula muntu wakadi kwiluka, mutambuli chuma chindi chakuvwala, nimuntu wukukuula mumbanda wakadi kwiluka mutambuli kapopu.

¹⁴Muntu wukumeneka budidi nakumukiswila ibwambu dindi nkisu nezudankalu, akumufuukwila nawu namushiŋi.

¹⁵Kuvwa kwakuvwa nde, nde, nde, hefuku dasweja nvula, nimumbanda wayikonkojola, hichuma chochimu;

¹⁶muntu wukukeŋa kumulekesha wudi nakulekesha mpepela, nichikasachindi chikukwata hamanji.

¹⁷Chikuŋu chahotolaŋa chikuŋu, dichi nichifu chamuntu chahotolaŋa chebwambu dindi.

¹⁸Muntu wahembaŋa chikuyu wakadiilaku nyikabu; niwemenaŋa mwantawindi akamulemesha.

¹⁹Chadimonaŋayi muntu hameji mesu namesu, dichi welaŋa muchima wamuntu namuntu.

²⁰Kaluŋa nakujilumuka hiyekutaŋaku, nimesu amuntu nawa hiyekutaŋaku.

²¹Inuŋu yakutookeshela siliva, luteŋu lwakuzakashila wuru, muntu amwesekaŋa nakumuhameka.

²²Chisupi, hela wukumusohola mwiyanda namwishi, hamu nakabaka kakusohola, wusupi windi hiwamba kamufumaku.

²³Ilukaku chachiwahi mwekalila yimuna yeyi, talaku chachiwahi niŋombŋeyi.

²⁴Muloŋa maheta hiyahaya nyakaku, hela chibaŋula chashakamaŋa shakame-e, mufwawa muvwalikawa, tahindi?

²⁵Matahu awuma ayitutaŋa, nimatahu amunyenvu amenaŋa, niyisakola yakumapidi ayikuŋulaŋa.

²⁶Nyana kanyikoku yayuma yeyi yakuvwala, ampembi awuseya wakulanda nachu iha.

²⁷Wakamonaŋa mayeli ampembi akushikila mukudya kweyi, nimukudya kwawakwetala deyi, niakuhembaŋa nachu ayaloŋadima yeyi.