Read MUKANDA WANZAMBI Liproverbia 4 Bible Online

Liproverbia 4 - MUKANDA WANZAMBI bible

Liproverbia 4

¹Enu anyana, tiyenu mwafumbaŋayi tata yenu, tiyililenu kulonda mwiluki kashinshi.

²Muloŋa nukuyileja kuleja kwakuwahi, bayi muleka nshimbi jamuku.

³Muloŋa ninami nawa nadiŋi mwana katata, nadiŋi naka mujimba kakovu; yami akeŋeluwu kanka wami kudi mama.

⁴Tata wanlejeli, hakuŋila nindi, Muchima weyi wukakeli mazu ami. Hembaku kuleja kwami wuhandi.

⁵Hetaku maana, hetaku kashinshi; bayi wuvulamenamu, hela kwambuka mumazu amukanwa kamuku.

⁶Bayi wuleka maanaku, yena wakakuhemba; mukeŋi, yena wakakukiŋa.

⁷Chuma chalema yowu maana, dichi hetaku maana. Mwalala kuyu mayejima yiwunaheti bombelakuku kashinshi.

⁸Mulemeshi, niyena wakakutohesha. Neyi wakamukumbata wakakuletela kulema.

⁹Wakakushila chibaaba chaluwi kunamutu weyi. Wakakwinka chibaŋula chalubanji.

¹⁰Eyi mwanami, tiyaku yinukuhosha kulonda nyaka yiwakahanda yakavuli.

¹¹Nakuleji munjila yamaana. Nakuleji mtmjila jakwoloka.

¹²Chiwakendaŋa hiwakadataŋa mwashintakanaku. Neyi wakaya lufuchihiwa katedaŋi laku.

¹³Kwataku kufumbika mbe, bayi yena akukosomokaku; muhembi muloŋa yena diyi wumi weyi.

¹⁴Bayi wuholokela munjila yawantu aluwalalaku, bayi wenda munjila ya wantu atamaku.

¹⁵Yitondolweli, bayi wuhitila yenoyuku; fumakuku, wudiyili kweyi.

¹⁶Wena hiya kamaŋa tuluku chiŋa aneli dehi chuma chatama. Neyi kudi mbwisha akwawu nehi tulu hitukuyifuma mumesu.

¹⁷Nshima yawu yadya ŋawu yowu kwila chatama, walwa wawu wanwaŋa wuyoyi ndombu.

¹⁸Hakwila njila yawantu aloŋa yidi neyi mwaana wahakucha, wayaloŋana kutooka nichikushika itaŋwa mwiwulu.

¹⁹Njila yawantu atama yidi neyi mwidima; hiyeluka chuma chakeŋa kuyi dimbwishaku.

²⁰Eyi mwanami, tiyililaku mazu ami; teŋelekaku itu deyi wutiyi yinukuhosha.

²¹Bayi yikufuma kumesu eyuku; yihembi mukachi kamuchima weyi.

²²Muloŋa hiwumi wanawa akuyiwana, hikukola kwanyijimba yawu yejima.

²³Hembaku muchima weyi chakubadika chiwahembaŋa yuma yejima muloŋa mwenomu dimu mwedikaŋa wumi.

²⁴Lekaku kanwa kaluwalala, ninyivumbu yahulama yitwali kwakulehi.

²⁵Mesu eyi atali kwakumbidi hohu, nlabu jeyi jitali kuwukuya swi-i.

²⁶Toŋojoka chachiwahi njila yakunyendu yeyi, mwejima muwukuya muloŋa chachiwahi.

²⁷Bayi wuteŋulukila hela kuchikasa chachidiilu hela kuchimunswaku, fumishaku mwendu weyi kuyuma yatama.