Read MUKANDA WANZAMBI Liproverbia 5 Bible Online

Liproverbia 5 - MUKANDA WANZAMBI bible

Liproverbia 5

¹Eyi mwanami, tiyililaku maana ami, teŋelekaku itu deyi wutiyi kashinshi kami;

²kulonda wushaŋa muchima kukutoŋojoka, kulonda nyivumbu yeyi yakalamati kwiluka.

³Muloŋa nyivumbu yamumbanda weŋi yavwaŋa wuchi, kanwa kindikasenena, kanabadiki manji;

⁴ilaŋa hindi hakakumishilayi halula neyi mwaaji, hatwa neyi mpokuyakabali yikweti wumwemu kuyedi.

⁵Nyendu yindi yakunkumuka kukufwa, yintampu yindi yakwata kukaluŋa;

⁶dihu hafuma yena kubula kuwana njila yawumi yesekana, mwela ŋayi hala mataŋa mumuku, hiwukutwesha kwiluka mwokuku.

⁷Dichi dinu enu anyanami, tiyililenu kudami, bayi mufuma mumazu amukanwa kamuku.

⁸Endelaku kwakulehi nayena, bayi wukundama kwakwihi nachisu chetaladinduku.

⁹Kuchina kuhana kulema kweyi kudi antu acheŋi, hela kuhana nyaka yeyi kudi ankatu;

¹⁰kuchina antu acheŋi akwikutila kuŊovu jeyi, wakenza kakabakana mwitalada muntu wakwacheŋi;

¹¹hiwakela wunakumishi dehi, ninyisunyi yeyi nimujimba weyi wunanoŋi dehi, hikwaba nikwaba;

¹²hiwakela neyi, Yowe-e! natiyilaŋa kufumbika kutama, muchima wamiwadiwili mwanhosholela ŋawu

¹³Hela kwovwahila mazu awanleji jami nehi, hela kuteŋeleka itu dami nitiyi mwakunfumbawu nehi. Yowe-e!

¹⁴Ami hasheli hanti nakudilunda mukutama kwejima mukachi kachi-pompelu nezaza.

¹⁵Nwaku meji amwishima deyeyi aweni, meji amwishima deyeyi aweni akuhita pwa-pwa-pwa.

¹⁶Indi wukeŋi tuseloki tweyi tumwaŋeli kwacheŋi, tuloŋa twameji tumwaŋeli hanzi?

¹⁷Ekali eyeyi aweni, bayi wuyibombela nawantu acheŋuku.

¹⁸Kaseloki keyi kakiswilewi nkisu; luŋaku naŋodeyi wakuwukwenzi weyi.

¹⁹Ekali kwindi neyi mukaji wambaala wakukeŋa, ninkayi walubanji, mayeliindi akutiyishaŋa kuwaha mafuku ejima, fwilaŋa kukeŋa kwindi mafuku ejima.

²⁰Ochu eyi mwanami wukufwiladi mumbanda weŋi? Wukukwatiladihantulu yamuntu wacheŋi?

²¹Muloŋa Yehova wamonaŋa namesu indi mwelaŋa muntu, washikumunaŋa njila jindi jejima.

²²Kuluwaluwa kwindi kwokwakamukwata muntu watama, wakakasikananyonji yanshidi yindi.

²³Wakafwa kubulakufumbika; chaswejayi kusupa dihu hakafuma kujimbalanjila.