Read MUKANDA WANZAMBI Liproverbia 7 Bible Online

Liproverbia 7 - MUKANDA WANZAMBI bible

Liproverbia 7

¹Eyi mwanami, hembaku mazu ami, tudikaku kuleja kwami kunke eluyeyi yamuchima.

²Hembaku kuleja kwami kulonda wuhandi, hembaku nshimbi jami neyikantu kadisu deyi.

³Jikasili kunyinu yeyi neyi kazeya, jisoneki hamukanda weyi wamuchima.

⁴Kamwili Maana neyi, Yeyi muhelami. Kamuteni Kashinshi neyi. Yeyi kawusoku wami wamumbanda.

⁵Kulonda wena ayedi akakuhembi chachiwahi wubuli kukwachika kumumbanda weŋi, kudi mwenyi wukukulambisha namazu indi.

⁶Munjanina yakwitala dami natalili munkaŋalu jadiŋuku,

⁷hinukumona hadi akadi maana mukwenzi wakadi muchima, hinukumushinshika hadi ansanda,

⁸wudi nakuhita hanzi kwakwihi namaakenu adi kwashakamayi mumbandowu, hakuya njila yaya kwitala dindi;

⁹hakabwidibwidi, itaŋwa daholoka dehi, wufuku wuneyili dehi, himwidima.

¹⁰Kutala mumbanda hakumubulakana, navwali yavwalaŋawu ayivumbi wakasakasa yayivulu mumuchima,

¹¹wakola mukanwa, wakeŋa a mwaya muchima windi hohu; hashakama mwitala dinduku;

¹²welaŋa, aha wudi kunyikwakwa, aha wudi kulubanza, wabelaminaŋa akwawu hejima hadi maakenu.

¹³Yenona mumbanda wamukwatili ona mukwenzi, hakumupwepujola, hakuhamuka kumesu, hakumwila mukwenzi

¹⁴nindi, Yimuna yanyilambu yakuwunda nidi nayu, lelu nafuti dehi yinadishiililumu.

¹⁵Dichi chinenzi nakukukinkilila nami nikukeŋakeŋi nankashi, nimonuhu mesu eyi; ichi dinu nakuwani dehi.

¹⁶Hakadidi kami naaluhu dehi mahina amawahi akubutabutahu, nimahina anyileji awanda wakuEjipitu.

¹⁷Hakadidi kami nasansuhu dehi mora nialowe nisinamoni.

¹⁸Twaya tuketuli mpwila yetu nakukeŋa nichikukucha, twakadiluŋishi nakukeŋa.

¹⁹Muloŋa nfumwami nafumuhu, nayi njila yayilehi,

²⁰nasendi njeki yamali, wakafunta hakela kakweji kanatohi dehi chikupu.

²¹Hakumuzeyesha namazu amavulu akumudimbeka, hakumulambisha nanyivumbu yindi amutwala nikumutwala.

²²Hohenohu hakumulonda nikumulonda neyi ŋombi wudi nakuya naku-jahewa, hela neyi chisupi akukeŋa kubabeshawu mumaleŋi;

²³nichakamuhanuka nsewu hamuchima zwa, neyi kajila wudi nakunyakela kumuhetu nikwiluka nindi akanjaha nehi.

²⁴Ichi dinu, enu anyanami, tiyililenu kunu, tiyililenu mazu amukanwa kami.

²⁵Nyichima yenu bayi yambuka munjila yiyi mwayaloŋayuku, bayi mupwa-pukila munjila jinduku.

²⁶Muloŋa yena mumbandowu nadimbwishi dehi heseki amavulu anatapiyi; mwalala kwaamu, antu ejima anajahiyi hiluntu lwalweni.

²⁷Itala dindi hinjila yaya mukaluŋa, yakunkumukila namutupeka twakufwa.