Read MUKANDA WANZAMBI Liproverbia 9 Bible Online

Liproverbia 9 - MUKANDA WANZAMBI bible

Liproverbia 9

¹Maana watuŋa dehi itala dindi, wasoŋa dehi yishimi yindi yitanu nayiyedi;

²wajaha dehi mbiji jindi; wema dehi walwa windi, waala dehi nimesayindi.

³Watemesha dehi yaloŋadima yindi, hakubilela hayinaŋanaŋa yamumukala yasweja kuleha,

⁴nindi, Neyi kindi wakadi maana, abalumuki eŋili munu.

⁵Ilaŋa wakadi kashinshi, hakumwila nindi, Twayenu muduhu yakudya yami, munuhu walwa wunemi.

⁶Enu mwakadi maana, lekenu, muhandi; mwendi munjila yakashinshi.

⁷Wafumbaŋa muntu wadiwulaŋa akwawu wamwenaŋamu nsonyi jakudikeŋela, wahosholaŋa muntu watama wakamwenaŋamu wufwayi wakudikeŋela.

⁸Bayi wakahoshola mukwakudiwula akwawuku, wakenza kakuhela. Hosholaku mukwamaana, wakakukeŋa.

⁹Fumbaku mukwamaana, wakasweja maana; lejaku muntu waloŋa, wakasweja kudiza.

¹⁰Kwakama Yehova yowu kutachika maana. Kwiluka Wajila diyi kashinshi.

¹¹Yami nakakuvulishila mafuku eyi, ninyaka yawumi weyi yakasweja kuvula.

¹²Neyi wukweti maana, jeyi; neyi wukweti kadiwu, jeyi nawa.

¹³Mumbanda wasupa wakola mukanwa, hekala namaanaku, helukachumaku.

¹⁴Wáshakamaŋa kuchisu chetala dindi, hetanda kuyinaŋanaŋa yamumukala,

¹⁵kulonda kutambikaŋa antu akuhitahita, adi nakupandakana munjila jawu,

¹⁶nindi, Neyi kudi wakadi maana abalumuki eŋili munu,

¹⁷ilaŋa wakadi kashinshi, hakumwila nindi, Meji awukombi atowala, yakudya yakudiila kumbadi yayiwahi.

¹⁸Helukaŋa kwindi nindi kudi afuku, hela kwiluka nindi aŋeji janowu mumbanda adi mwamweni mukaluŋa nehi.