Read MUKANDA WANZAMBI Muekelesia 2 Bible Online

Muekelesia 2 - MUKANDA WANZAMBI bible

Muekelesia 2

¹Nahosheli mumuchima wami nami, Leka nikweseki nakuzaŋajala; dichi dinu tiyaku kuwaha nachiseki; komana nichumichi nawa hichuma chakuhemesha.

²Nateneni kuseha nami, hikuzaluka; nikuzaŋajala nami, chikwetidi?

³Nakeŋakeŋeli mumuchima wami nami nimoni mwakutiyishila mujimba wami kuwaha navinyu, iku muchima wami wuchidi kunlombola nama ana, nami nimoni mwakukwatila kukenkama, nichinaka mona munawahili anyana kawantu kwila mwishina dewulu mafuku awumi wawu ejima.

⁴Hinukwila nyidimu yamaneni; hinukudituŋala matala; hinukudidi mina matempa anyivinyu;

⁵hinukudidimina matempa, hinukwila nima lubanza amawahi, hinukutumbamu nyitondu yanyikabu yanyitaŋu yejima.

⁶Hinukuaipundila majiya ameji kulonda kukokela meji kumasaŋa kwakuli shilaŋawu nyitondu.

⁷Hinukulanda anduŋu amayala nawambanda; nadiŋi nanduŋu akuvwali ka mwitala dami. Nadiŋi nawa namaheta asweja awaŋombi nawayimuna anyanya, nabadikili antu ejima ásambilili muYerusalema.

⁸Nadipompesheleli nisiliva niwuru, niyuma yalema yambala yawanyanta niyamumawuloŋu. Hinukudipompeshela amayala akwakwimba tumina, niambanda akwakwimba tumina, niyuma yakuluŋisha nachu anyana kawantu, niambanda amavulu nankashi.

⁹Hinukwikala muneni, hinukuvula chakubadika antu ejima ásambilili muYerusalema; iku maana ami saŋa nidi nawu.

¹⁰Yuma yejima yakeŋeli mesu ami hinayibondeliyuku, kwosi kuluŋa kunalekesheli muchima wamuku muŋa muchima wami wadiŋi nakuzaŋalala nakukabakana kwejima kunakabakenaŋa; didu iseka dami nadiili nakukabakana kwejima kunakabakenaŋa.

¹¹Hinukutala nyidimu yejima yakoŋeli makasami, ni kukabakana kunakabakeni nakwila; komana yejima yakuhemesha hohu, hikukabila tuhu mpepela, mwishina detaŋwa hiyamwenaŋamu chumaku.

¹²Nabalumukili nakutala chachiwahi nima ana nikwimika disu nikukenkama; ochu muntu wukulondela mudi mwanta eli ŋahi? Wukukumina dakwila yelawu dehi.

¹³Hinukumona nami komana maana abadika kukenkama, neyi mwaana chiwabadika mwidima.

¹⁴Mukwamaana wudi namesu kunamutu, hakwila chisupi wapudaŋilaŋa mumwidima; hela chochu, namweni nami mwamonaŋawu wejima wawu mwomumu.

¹⁵Hinukwila mumuchima wami nami, mwamonaŋayi chisupi dimu namba kamona ninami, neyi chochu, indi ami nabadikilidi maana? Hinukwila mumuchima wami nami, nichumichi nawa chakuhemesha.

¹⁶Komana mwamonaŋayi mukwamaana mwomwamonaŋayi nichisupi, hiyamba kayanuka nawa cheŋuku haya nyaka; muŋa hamafuku akenza mwaka ayivulamena dehi wejima wawu. Ochu mukwamaana wafwaŋa ŋahi? Hichochafwaŋa chisupuku?

¹⁷Dichi naheleli wumi, muloŋa mudimu wakoŋaŋawu mwishina detaŋwa nawumweni kutama; muloŋa yuma yejima yakuhemesha, hikukabila tuhu mpepela.

¹⁸Hinukuhela kukabakana kwejima kunakabakeni mwishina detaŋwa nami, nakayishila tuhu muntu wakanlondela.

¹⁹Neyi wakekala mukwamaana indi kwiji chisupi, nelukumu hinyi? Hela chochu, wakayula yuma yejima nakabakeneni, yinamwekesheleli maana mwishina detaŋwa. Nichumichi nawa chakuhemesha.

²⁰Hinukubalumuka kwami nakudidimbulula mumuchima wami hansaŋu yayuma yejima nayikabakeneni mwishina detaŋwa.

²¹Muloŋa kudi muntu wumu welaŋa nyidimu yindi yakukabakana nama ana, nakwiluka, niwukalawenu, hela chochu, wukushila tuhu mukwawu wabulili kuyikabakena akayidyi tuhu kwindi. Chumichi nawachakuhemesha, chasweja kutama nankashi.

²²Mwejima mwakabakanaŋayi muntu nimwadikabishilaŋayi mumuchima windi chakabakanaŋayi mwishina detaŋwa, wawenaŋamu chumanyi?

²³Muloŋa mafuku indi ejima ayihuŋu hohu, nimudimu windi wachikela; mwalala, hela nawufuku muchima windi hiwanookaŋaku. Chumichi nawa chakuhemesha.

²⁴Hikudi chuma chacheŋi chakuwahisha muntuku, chiŋa yowu kudya nakunwa nakuluŋisha muchima windi nanyidimu yindi yikukabakanayi. Namweni chumichi nawa, nami chinafumi kuchikasa chaNzambi.

²⁵Ochu wukudya nakuluŋa chakubadika ami hinyi?

²⁶Muloŋa muntu watiyishaŋa Nzambi kuwaha, Nzambi wamwinkaŋa nima ana, nikwiluka, nikuluŋa; ilaŋa mukwanshidi wamwinkaŋa mudimu wakukuŋula nakulumbika yuma, kulonda akamwinkiyi watiyishaŋa Nzambi kuwaha. Nichumichi nawa chakuhemesha, hikukabila tuhu mpepela.