Read MUKANDA WANZAMBI Muekelesia 3 Bible Online

Muekelesia 3 - MUKANDA WANZAMBI bible

Muekelesia 3

¹Yuma yejima yikweti yilaaka yayu, niyuma yejima yafuukula wumwishina dewulu yikweti hawililu wayu.

²Mpinji yakuvwalika, nimpinji yakufwa; mpinji yakutumba, nimpinji yakubwita yatumbawu;

³mpinji yakujaha, nimpinji yakuuka; mpinji yakuhumuna, nimpinji yakutuŋa;

⁴mpinji yakudila, nimpinji yakuseha; mpinji yakutumpa, nimpinji yakuhaŋana;

⁵mpinji yakunata malola, nimpinji yakukuŋula malola; mpinji yakudikumbata, nimpinji yakuleka kudikumbata;

⁶mpinji yakukeŋakeŋa, nimpinji yakujimbesha; mpinji yakuhemba, nimpinji yakunata;

⁷mpinji yakutabula, nimpinji yakuchima; mpinji yakumwena, nimpinji yakuhosha;

⁸mpinji yakukeŋa, nimpinji yakuhela; mpinji yanjita, nimpinji yakuwunda.

⁹Muntu wakalakalaŋa wamwenaŋamu chumanyi china chakabakanaŋayi china?

¹⁰Namoni dehi mudimu wanenkiyi Nzambi anyana kawantu wakudikabisha nachu hohu.

¹¹Nzambi wela dehi yuma yejima yiikali nalubanji hayilaaka yayu, washa dehi nawa mpata yamunu mwishina munyichima yawu, hela chochu, muntu wakaŋanya dehi kushinshika mwaya mudimu waNzambi waneliyi, kufumisha kutachi ndo nikunsa.

¹²Neluki dehi kwami nami, hikudi chuma chacheŋi chikuyiwahilaku, chiŋa yowu kuzaŋalala nakwila yayiwahi hiyachiduwu amomi.

¹³Mwalala, antu ejima adiyi, anwi, kunyidimu yejima yakukabakanawu amwenuku kuwaha; hichamukunkulu chakudi Nzambi.

¹⁴Neluki nami yuma yejima yelaŋayi Nzambi yonsu yakekala yahaya nyaka; kutwesha kushaku chuma, hela kufumishaku chuma nehi; Nzambi diyi wachila dehi kulonda antu akatiyi woma kumesu indi.

¹⁵Chuma chekalaku chochekalaku dehi; nichuma chamba kekala chekalaku dehi nawa; Nzambi wakeŋa akeŋaŋa cheŋi china chahita dehi.

¹⁶Namweni nawa mwishina detaŋwa mwatelela kwikala wuŋaji himudi kubajama, mwatelela kwikala kuloŋa himudi kubajama nawa.

¹⁷Hinukuhosha mumuchima wami, nami Nzambi wakasompesha niwaloŋa niwabajama, muloŋa kwekala mpinji yayuma yejima yafuukulawu niyanyidimu yejima.

¹⁸Hinukuhosha mumuchima wami, nami chumichi chinamwekani hansaŋu yawanyana kawantu kulonda Nzambi akayeseki, kulonda akadimoni awenawu nawu, komana tuyanyama tuhu kwetu.

¹⁹Muloŋa chamonaŋawu anyana kawantu chochamonaŋawu nianyama; wejima wawu amonaŋa chuma chochimu hohu; chikufwa iwu chochikufwa nimukwawu; mwalala, wejima wawu akweti muuya wawu wowumu hohu; nimuntu hakweti habadikilayi anyamaku; muloŋa yuma yejima yakuhemesha hohu.

²⁰Wejima wawu ayaloŋa kwokumu hohu; wejima wawu afumini kulunkuŋu, wejima wawu akabalumuka cheŋi lunkuŋu nawa.

²¹Neyi spiritu yamuntu yayaloŋa kwiwulu, nispiritu yakanyama yayaloŋa heseki, nelukumu hinyi?

²²Dichi namweni, nami hikudi chuma chacheŋi chakuwahisha muntuku, chiŋa yowu kuzaŋalala nanyidimu yindi; muloŋa didu iseka dindi dakudyayi; ochu wakamufuntisha cheŋi kulonda akamoni yakamulondela munyima hinyi?