Read MUKANDA WANZAMBI Muekelesia 5 Bible Online

Muekelesia 5 - MUKANDA WANZAMBI bible

Muekelesia 5

¹Chiwukuya kwitala daNzambi kahembi mwendu weyi; muloŋakukundama kwakwihi nakutiya, chinabadiki nyilambu yahanaŋawu ayisupi; muloŋa wena hiyeluka chadi nakwilawu chatamaku.

²Bayi wuhosha chakulundumukaku, muchima weyi bayi wunyakala kutena chuma kumesu aNzambuku; muloŋa Nzambi wudi mwiwulu, eyi wudi hamaseki; dichi keheshaku mazu eyi.

³Muloŋa kulota kwenzaŋa nanyidimu kuvula; niizu dachisupi denzaŋa namazu kuvula.

⁴Neyi wukudishiilamu kumesu aNzambi bayi wulaba kwila mwoku; muloŋa yena hatiyaloŋa kuwaha nawayisupuku; ilaku yiwadishiililumu kwila.

⁵Komana kubula kudishiilamu dichi chachiwahi, kudishiilamu chakubula kwila chatama.

⁶Bayi witeja kanwa keyi kuvulumwisha mujimba weyuku; hela kuhosha kumesu akaŋelu neyi, naluwuku, Nzambi enzi azuwi tuhu nezu deyi, akisaŋani tuhu mudimu wakumakaseyi?

⁷Muloŋa chumichi chafumaŋa kukulota kuvula, niyuma yakuhemesha, nikumazu kuvula. Dichi mutiyi Nzambi woma.

⁸Neyi wukumona muwuloŋu adi nakukabisha atuzweŋi, niakwandombu adi nakufwota nyiloŋa yawakwawu nakufumisha wuŋaji, bayi wuhayama chumochuku; muloŋa yomweni wabadika alema wudi nakutalaku, adi kwoku nawa ayibadika wena.

⁹Yuma yikumwenawu antu kumaseki yawantu ejima; nimwanta yomweni wahandila kwiha.

¹⁰Wakeŋa siliva hakela nindi yinanwaninuku; niwakeŋa a yayivulu hakela nindi yinavuli dehuku. Chumichi nawa chakuhemesha.

¹¹Chiyakuvula maheta niantu akuyidya akuvula. Yikumukwasha ŋahi wayiheta? Kwiji yowu kuyimona kwanamesu!

¹²Tulu twakamaŋa muntu wakalakalaŋa nyidimu yamakasa twatowala, hela nadyi yantesha hela nadyi yayivulu; ilaŋa kwikuta kwekutaŋa mukwakuheta kwamulekeshaŋa kukama tulu.

¹³Kudi chuma chakala nankashi chinamoni mwishina detaŋwa, chakwila maheta akusweka kudi mwenimahetindi akamutamisha;

¹⁴nimahetowuakakisika nayuma yatama yakamuwana; chakavwalayi mwana hakekala nawa nachuma kuchikasa chinduku.

¹⁵Chafuminiyi mwivumu damama yindi nzekesi chochakafuntayi nawa cheŋi neyi chenjiliyi, yuma yakabakeniyi hakanonaku chuma nichimu chakasendayi muchikasa chinduku.

¹⁶Ichichuma chatamichi, chakala nankashi chakwila mwejima mwenjililiyi, dimu mwakayilayi; ochu chanakabakeniyi mpepela namwenumu chumanyi?

¹⁷Mafuku indi ejima akudiila mumwidima, wamonaŋa kukala nankashi, wamonaŋa niyikatu nimadombu.

¹⁸Tiyenu, chuma chinamonami kuwaha nilubanji chinateli kwila muntu, kudya nakunwa amonaŋa kuwaha, nakukabakana kwindi kwejima kwadi nakukabakanayi mwishina detaŋwa, mafuku akuhandayi anamwinkiyi Nzambi ejima; muloŋa didu iseka dindi dakudyayi.

¹⁹Antu ejima anenkiyi Nzambi yuma nimaheta, ayinka niŋovu yakuyidya, nikunonamu iseka dawu, nikuzaŋalala nakukabakana kwawu, hichamukunkulu chakufuma kudi Nzambi.

²⁰Hiyakaanuka chalala kukeha kunakehi mafuku akahandawuku, muloŋa Nzambi wudi nakuyakula nanochu chadi nakutiyawu kuwaha munyichima yawu.