Read MUKANDA WANZAMBI Muekelesia 7 Bible Online

Muekelesia 7 - MUKANDA WANZAMBI bible

Muekelesia 7

¹Ijina dadiwahi dabadika malasha evumba dadiwahi, niifuku dakufwa dabadika dakuvwalika.

²Kuya kwitala kudi kudila madilu, nakuya kwitala kudi chawija, chinabadiki chidihi? Chinabadiki kuya kwitala kudi kudila madilu, muloŋa dimu mwakumishilaŋawu antu ejima, nimuntu wamumi wukuchisha kumuchima windi.

³Kuneŋa kunabadiki kuseha; muloŋa kudihomba kumesu kwawahishaŋa muchima.

⁴Nyichjma yawakwamaana yekala kwitala kudi kudila madilu; ilaŋa nyichima yawayisupi yekala kwitala kudi kuzaŋajala.

⁵Kutiya mwakukuhosholawu kudi mukwamaana nakutiya tumina twawayisupi, chinabadiki chidihi? Chinabadiki kutiya mwakukuhosholawu kudi mukwamaana.

⁶Muloŋa kusehaŋa chisupi chidi neyi chabidimaŋa nyiŋa mwishina denuŋu. Chumichi nawa chakuhemesna.

⁷Chalala nyilami yasupishaŋa mukwamaana; nichamukunkulu chakisaŋanaŋa kashinshi.

⁸Mwakumina chuma mwabadika muchatachikila. Wadiwunjika mumuchima nabadiki wadinka wanta mumuchima.

⁹Bayi wunyakala kuzuwa mumuchima weyuku; muloŋa kuzuwa kwashakama muntulu jawayisupi.

¹⁰Bayi wila neyi, Mafuku akusambila chanabadikuwu mafuku anu chinafumi hankaku? Muloŋa hansaŋu iyi hiwudi nakwihula chamaanaku.

¹¹Maana anawahi hamu nawuswana; mwalala, maana diwu abadika kuyiwahila ekala kunu kumwaana.

¹²Muloŋa maana hichuma chakudihemba nachu, neyi chaneluwu mali hichuma chakudihemba nachu; ilaŋa kwiluka yuma chasweja kuwaha muloŋa maana ahembaŋa wumi wamuntu wayiheta.

¹³Shinshikaku mudimu waNzambi chachiwahi, muloŋa chuma chaheŋeshayi dehi yena, akutwesha kucholola kudinyi?

¹⁴Neyi wunamoni kuwaha zaŋalalaku, neyi wunamoni kutama shinshikaku nawa chachiwahi; Nzambi diyi neseki yejima yiyedi yiikali ichi iku, ichi iku, kulonda muntu akabuli kwiluka chuma chakamuhiŋa munyima.

¹⁵Yuma yejimiyi nayimoni hamafuku akuhemesha kwami. Iwu muntu waloŋa hakunoŋa nakuloŋa kwindi, iwu muntu welaŋa yatama saŋa elilayi yatama hohu, kufwa swayi nehi.

¹⁶Bayi wuswejesha nankashi kuloŋaku, bayi nawa wuswejesha nankashi kwikala namaanaku; wudikisaŋani tuhu kweyi?

¹⁷Bayi wuswejesha kwila yatamaku, bayi nawa wusupaku; wufwi tuhu kweyi chakadi kushika mumwaka weyi?

¹⁸Chachiwahi kukwata hachumichi mbe; mwalala kwaamu, bayi wufumisha kwoku chikasa cheyuku; muloŋa muntu wamwakamaŋa Nzambi wamba kafuma muyuma yejimiyi.

¹⁹Maana aleteshaŋa Ŋovu kudi mukwamaana chakubadika ikumi dawanyuli adi mumukala.

²⁰Muloŋa hamaseki hihekala muntu waloua welaŋa chachiwahi, wabulaŋa kuvulumunaku.

²¹Bayi wushaŋa kumuchima mazu ejima ahoshaŋawu antuku, wakenza katiya chakukutuŋulayi nduŋu yeyi;

²²muloŋa weluka dehi mumuchima weyeyi aweni chiwatuŋulaŋahu dehi akwenu kakavulu.

²³Yuma yejimiyi nayeseki dehi nama ana. Nelili nami, Niikali mukwamaana; chiikala nikwakulehi nanami.

²⁴Chekala kwakulehi, chasweja kukunama, wukutwesha kuchiwana hinyi?

²⁵Hinukusha muchima wami nankashi hakwiluka, nakutalatala nakukeŋakeŋa maana, nami niiluki mwaya yuma, niiluki nami komana kwila chatama hiwusupi, nikukenkama hikwimika disu;

²⁶hinukuwana chuma chimu chabadika kufwa kulula, yowu mumbanda wamuchima wanyihetu niwanda wakuta akwawu, nimakasindi hinyonji; muntu anatiyiyi Nzambi kuwaha wakapusumuka kudi mumbandowu, ilaŋa mukwanshidi akamukwata kudi yena.

²⁷Mukwakutapisha nindi, Tiyenu chuma chinamoni, neseki yuma hachuma hachuma, nami nimoni muyalumbulukila;

²⁸yoyuma yakeŋakeŋaŋa muchima wami, aka! kuyimona nehi; hekombakaji dawantu namonuhu ntahi iyala wumu; ilaŋa hadi antu ejimowu hinamonuhu mumbandaku.

²⁹Tiyenu chuma chinamoni chimu hohu, chakwila Nzambi chaleŋeliyi muntu wamuleŋeli woloka; ilaŋa awenawu anakasakasi yuma yayivulu.