Read MUKANDA WANZAMBI Muekelesia 8 Bible Online

Muekelesia 8 - MUKANDA WANZAMBI bible

Muekelesia 8

¹Hinyi weseka namuntu wamaana? Hinyi weluka mwalumbulukila chuma? Maana amuntu atoŋekeshaŋa kumesu indi, nichakoleshayikumesu chikubalumuka.

²Nami, Hembaku mwanakulejiyi mwanta, nankashi chiwunasanyiki kumesu aNzambi.

³Bayi wunyakala kufuma kumesu induku; bayi wulamata chuma chatamaku; muloŋa yena welaŋa mwonsu mwanatiyiyi kuwaha.

⁴Muloŋa izu damwanta dikweti Ŋovu; hinyi wukutwesha kumwila nindi, Wudi nakwila ŋahi?

⁵Muntu wukuhemba kuleja hakeluka chuma chatamaku; muchima wamukwamaana welukaŋa nihakwilila, niwuŋaji;

⁶muloŋa mwafuukulaŋawu antu mwejima mwekala nihakwilila niwuŋaji; muloŋa kutama kwamonaŋayi muntu kwamulemena dehi;

⁷muloŋa yena heluka chuma chakekalaku; ochu wukutwesha kumuleja muchakekalila hinyi?

⁸Hikudi muntu wukweti Ŋovu naspiritu mwaka akakakeli spirituku; hakweti hela Ŋovu nefuku dakufwaku; ninjitoyu hiyikweti hawukumishilu wayuku; nikwila chatama hikwakamupulwisha wadihanaŋamuku.

⁹Namoni yuma yejimiyi, nashi muchima wami kunyidimu yejima yelaŋawu mwishina detaŋwa; komana kudi mpinji yekalaŋa muntu naŋovu namukwawu kulonda kumutamisha.

¹⁰Namweni nawa hiyakujiika akwakwila chatama, hiyakushika nikwijimu; elilaŋa chachiwahi hiyakufuma kwajila, hiyakuyivulamena mumukala. Chumichi nawa chakuhemesha.

¹¹Chabulaŋawu kubabesha swayi muntu nakoŋi mudimu watama, dichi chakwatilaŋawu anyana kawantu munyichima yawu Ŋovu yakwila chatama.

¹²Hela neyi mukwanshidi wukwila chatama mapampa nkulakaji, yena saŋa ahandilayi, neluki nami komana amwakamaŋa Yehova, atiyaloŋa woma kumesu indi, akamona kuwaha;

¹³ilaŋa mukwakwila yatama hakamona kuwahaku, hakamona mafuku amavuluku, adi neyi mwevulu kwawu, muloŋa yena hanatiyi woma kumesu aNzambuku.

¹⁴Kudi chuma chakuhemesha chamonaŋawu hanu hamaseki, chakwila akwakuloŋa amakwawu kwaduwu amonaŋa chatelela nyidimu yawakwakwila yatama; cheŋi nawa akwakwila yatama amakwawu kwaduwu amonaŋa chatelela nyidimu yawakwakuloŋa. Nami, Chumichi nawa chakuhemesha.

¹⁵Henohu hinukuhameka kuzaŋajala; muloŋa muntu hakweti mwekwawu mwamuwahi mwakwila munu mwishina detaŋwaku, chiŋa yowu kudya nakunwa nakuzaŋalala; muloŋa dichichuma chindi chakashakamayi nachu, namudimu windi wanakabakaniyi, mumafuku anahandiyi, anamwinkiyi Nzambi munu mwishina detaŋwa.

¹⁶Chinashili muchima wami kukwiluka maana, nikukumona yuma yakoŋaŋawu hanu hamaseki, muloŋa kudi wabula tulu mumesu indi hela mwaana hela wufuku;

¹⁷hinukutala nyidimu yaNzambi yejima, nami komana muntu hatwcshaŋa kushinshika mwaya nyidimu yakoŋaŋawu mwishina detaŋwaku; muloŋa hela muntu wukukabakana tuhu nankashi nindi amoni muyaya, hakamona mwokuku; mwalala hela mukwamaana wukutoŋojoka nindi nelukumu dehi, komana hanatweshi kumona mwokuku.