Read MUKANDA WANZAMBI Pina ya Lipina 2 Bible Online

Pina ya Lipina 2 - MUKANDA WANZAMBI bible

Pina ya Lipina 2

¹Ami niwuluya wakuSharoni, nilili yamuyinekineki.

²Chadiyi lili mukachi kanyiŋa, dichi chadiyi nkeŋi yami mukachi kawanyana awambanda.

³Neyi chiwudi mutondu wanyikabu yayiwahi mukachi kanyitondu yamumpata, dichi chadiyi wami nakeŋa mukachi kawanyana amayala. Nashakamini mwishina dawulelu windi nakutiya kuwaha nankashi, nyikabu yindi nayitiyili kutowala nankashi.

⁴Waŋiŋŋili mwitala dakudiila yayiwahi, mpandelu yindi yadiŋi hewuludami yowu kukeŋa.

⁵Nkoleshenu nanyikabu yavinyu yawuma, nhizumwishenu nanyikabu yayiwahi; nafwi kukeŋa.

⁶Chikasa chindi chachimunswa chidi mwishina danamutu wami, chi kasachindi chachidiilu chinankumbati.

⁷Enu anyana awambanda amuYerusalema nasanyikishi ambaala nawakajiankayi amumpata, nami, Bayi mutonesha hela kuhindwisha kukeŋaku chiŋa hanawahi.

⁸Izu dawami nakeŋa! Talenu hakwinza, nakumotoka motoka hampidiŋa maneni, nakusamba hampidi janyanya.

⁹Wami nakeŋa wudi neyi mbaala hela neyi chisonji chankayi. Talenu, nemani kunyima yambaŋu yetala detu wudi nakutala munjanina, wudi nakusumbela munkaŋalu.

¹⁰Wami nakeŋa hakuhosha, hakuŋila nindi, Eyi nkeŋi yami, eyi muwahi wami, hindukaku tuyi.

¹¹Tala ntahi, mwaka wachishika wunahiti dehi, nvula yinaketuki dehi, yinayi dehi;

¹²Nkenu jakenuka dehi heseki; chilaaka chahoshaŋawu atujila chinashiki, izu dakatela dinatiyakani dehi mwituŋa detu.

¹³Yikuyu yinahishi dehi nkuyu jayu jadiŋi jajisu. Nyivinyu yakenuka dehi, hiyikwipuka ivumba dadiwahi. Eyi nkeŋi yami, eyi muwahi wami, hindukaku tuyi.

¹⁴Eyi kambolu kami wudi munyaji yamwilola wudi hanyuŋa havumba, nikumonuhu kumesu, nitiyuhu izu deyi. Muloŋa izu deyi datowala, ni kumesu eyi kwasweja lubanji.

¹⁵Tukwatenu anyumbu, wowu anyana kanyumbu atamishaŋa matempa anyivinyu, muloŋa mumatempa etu mwakenuka dehi.

¹⁶Wami nakeŋa hiwami, ninami niwindi; wadiishaŋa nyikoku yindimukachi kajilili.

¹⁷Eyi wami nakeŋa, balumukaku cheŋi wuyi, wiikali neyi mbaala hela neyi chisonji chankayi hampidi jakuBeteri, nichikuwunda mwaana ninyevulu yinatemuki dehi.