Read MUKANDA WANZAMBI Pina ya Lipina 4 Bible Online

Pina ya Lipina 4 - MUKANDA WANZAMBI bible

Pina ya Lipina 4

¹Eyi nkeŋi yami, wumuwahi, mwalala wumuwahi; mesu eyi adi neyi tumbolu mukachi kansuki jeyi, nsuki jeyi jidi neyi mukanka wawampembi anakami mumbavu yampidi yaGileyadi.

²Maji eyi adi neyi mukanka wawanyikoku akutewula dehi, anafumihakuyiwelesha; wejima wawu asema ampamba hohu, niwunafwishuhu wumu hosi.

³Nyivumbu yeyi yidi neyi wanda wuchinana, kanwa keyi kakweti lubanji, mumbulukutu jeyi mudi neyi chibalu chebula mukachi kansuki jeyi.

⁴Nshiŋu yeyi yidi neyi kaposhi kaDavidi katuŋilyi kakuswekela yitwa, kakudikawu ikombakaji dankebu, nkebu jejima jawayilobu hohu.

⁵Mayeli eyi mwayedi adi neyi anyana kankayi ayedi, ampamba akusemakudi mama yawu wumu, adyaloŋa mukachi kajilili.

⁶Nukudiyila kwami kumpidi yamora, mpidi yalibona, nichikuwunda mwaana ninyevulu yinatemuki dehi.

⁷Eyi nkeŋi yami wawaha mwejima, hosi naha watamina.

⁸Tuyi neyi tufumi kuLebanoni, eyi mwenŋa wami, tufumi neyi kuLebanoni. Wakatalili mpata hewulu daAmana, hewulu daSeniri naHerimoni, kumayeŋu awanyitupa, kumpidi jawayisumpa.

⁹Wunantambuli muchima wami, eyi muhelami, eyi mwenŋa wami, wunantambuli muchima wami nadisu deyi dimu hohu, neleŋi dakunshiŋu yeyi dimu hohu.

¹⁰Kukeŋa kweyi o chikwawaha, eyi muhelami, eyi mwenŋa wami! Kukeŋa kweyi o chikwawaha, kwabadika vinyu! Manji eyi o chanunkawu kuwaha, abadika nyiseki yejima!

¹¹Nyivumbu yeyi yavwaŋa neyi wuchi, eyi mwenŋa wami; mwishina dedimi deyi mwekala wuchi namayeli; mahineyi epuka neyi chepukaŋa Lebanoni.

¹²Muhelami, mwenŋa wami, hiitempa dakukoleka dehi ikoli, hiishima dakukoleka dehi ikoli, hikaseloki kakujika dehi.

¹³Kwitempa deyi kwasoŋa mabula alubanji hamu nanyikabu yayiwahi; ninyitondu yahena nanaradi yepukaŋa ivumba dadiwahi,

¹⁴ninaradi nisafwironi, ninyisachi yayiwahi nisinamoni, hamu nanyitondu yalibona yejima; nimora nialowe hamu nanyiseki yalema yejima.

¹⁵Wukaseloki kamatempa, wishima dameji awumi, wutuloŋa twamuta tukufuma kuLebanoni.

¹⁶Eyi mpepela yakukabeta kakuchimunswa, tonaku. Eyi mpepela yakukabeta kakuchidiilu, twaya. Kunkaku hetempa dami, kulonda mavumba anyiseki epuki. Wami nakeŋa enzi mwitempa dindi, adiyi nyikabu yindi yasweja kuwaha.