Read MUKANDA WANZAMBI Pina ya Lipina 5 Bible Online

Pina ya Lipina 5 - MUKANDA WANZAMBI bible

Pina ya Lipina 5

¹Nenzi dehi mwitempa dami, eyi muhelami, eyi mwenŋa wami. Nakuŋuli dehi mora yami hamu nanyiseki yami. Nadyi dehi yihehela yami hamu nawuchi wami. Nanwi dehi vinyu yami hamu namayeli ami. Enu amabwambu jami dyenu. Enu nakeŋa, nwenu, nwenu nankashi.

²Ami nadiŋi namutulu, ilaŋa muchima wami hiwukutona. Hiizu dawami nakeŋa, wudi nakudondomwena, nindi, ŋenzulwili eyi muhelami, eyi nkeŋi yami, eyi kambolu kami, eyi wami wakadi majilu. Mutu wami wela dehi kwawuumi hohu, kunsuki jami kudi nakuvwa mamata awufuku.

³Navúula dehi chi kovwelu chami, nichivwali nawa cheŋi? Nawela dehi kunyendu yami, niyitamishi nawa cheŋi?

⁴Wami nakeŋa hakwiŋija chikasa muchiloku chachenzelu, nimuchima wami hiwukwenda mwivumu.

⁵Hinukunyamuka nami nimwenzulwili wami nakeŋa. Makasami adini nakuvwa mora, nde, nde, nyinu yami hiyikuvwa mora yevumba dadiwahi kuwukwatilu wakukapatishu.

⁶Namwenzulwilili wami nakeŋa; komana wami nakeŋa nadifuminuku dehi, nayi. Chahosheliyi, muchima wami wafwili puchi mwivumu. Hinukumukeŋakeŋa, kumumona nehi.

⁷Hinukumutambika, yena kwitiya nehi.

⁸Anweni kudi akwakuhemba, akimbukaŋa mumukala, hiyakuŋeta, hiyakunkatisha. Akwakuhemba mpwembu jamukala hiyakuntambula ihina dami dakunamutu.

⁹Enu anyana awambanda amuYerusalema nayisanyikishi nami, Neyi munawani wami nakeŋa, kamulejenu nenu nidi nayikatu yakukeŋa.

¹⁰Eyi wasweja kuwaha hakachi kawambanda, weyi wakeŋa a nabadikili akwawu akeŋewa hadihi? Weyi wakeŋa a nabadikili akwawu akeŋewa hadihi chiwukutusanyikisha ochu?

¹¹Wami nakeŋa wela nikutooka nikuchinana, hekumi damakombakaji yena diyi wabadikahu. Mutu windi wudi neyi wuru wasweja kukoseka, nsuki jindi jadinyetanyeta, jiyila bwi neyi ikololu.

¹²Mesu indi adi neyi tumbolu ekala kuyikumu yatuloŋa, akukosa dehi namayeli, akusha kunamutu chachiwahi.

¹³Makidi indi adi neyi muhaŋa wanyiseki, neyi matumbu akutumba mafu epukaŋa mavumba amawahi; nyivumbu yindi yidi neyi jilili, yavwaŋa mora yepukaŋa ivumba dadiwahi.

¹⁴Makasindi adi neyi tuzeya twawuru wakusowasowa berili; mujimba windi wudi neyi mbiŋa yanjamba yasweja kutooka yakulamika lamika tusafira.

¹⁵Nyendu yindi yidi neyi yishimi yamalola atooka, emikawu chachiwahi mumayanda awuru wakoseka; chifu chindi chidi neyi Lebanoni, chawaha neyi nyisida.

¹⁶Kanwa kindi kasweja kutowala; wawaha chikupu mwejima, wakutiya chipepa hohu. Yeniwu diyi wami nakeŋa, diyi ibwambu dami, enu anyana awambanda amuYerusalema.