Read MUKANDA WANZAMBI Pina ya Lipina 7 Bible Online

Pina ya Lipina 7 - MUKANDA WANZAMBI bible

Pina ya Lipina 7

¹Eyi mwana kamwanta, o nyendu yeyi chiyawaha munkwabilu! Hankuma jeyi hadi neyi malola alubanji alema wuseya akusoŋa chachiwahi kudi mukwawukalawenu.

²Ikovu deyi didi neyi lupasa lwawujiya; nilwabulaŋa vinyuku. Ivumu deyi didi neyi mulumba watidiku wakushasha jilili.

³Mayeli eyi mwayedi adi neyi anyana kankayi ayedi, ampamba akusemakudi mama yawu wumu.

⁴Nshiŋu yeyi yidi neyi kaposhi kambiŋa yanzovu; mesu eyi adi neyimajiya amuHeshiboni, ekala kuchisu champwembu yaBatirabimi; mazulu eyi adi neyi kaposhi kakuLebanoni katala kuDamakasa.

⁵Mutu weyi wakwinkawu wudi neyi Karameli, ninsuki jakunamutu weyijidi neyi wusombu; mwanta wakasika dehi wukoli munyizenza yaju.

⁶Eyi kukeŋa! O lubanji, o chiwantiyishaŋa kuwaha nakunluŋisha!

⁷Chiminu cheyi chidi neyi mukoma, mayeli eyi adi neyi nyikanji yanyikabu yavinyu.

⁸Nelili nami, Nukukandama kumukoma, nukukwata kunyitayi yawu; mayeli eyi ekali neyi nyikanji yakumuvinyu, ivumba damuuya weyi wuwonaŋa diikali neyi nyikabu yayiwahi;

⁹nikanwa keyi kekali neyi vinyu yasweja kuwaha, yawami nakeŋa, yaselumukaŋa chachiwahi hamudiwu, yahosheshaŋa adi namutulu.

¹⁰Nidi wambala wawami nakeŋa, niyena wata muchima hadami.

¹¹Eyi wami nakeŋa twatuyi mumpata twakakamaŋa munyikala.

¹²Twakamenekelaŋa mumatempa anyivinyu budidi; twakatali neyimuvinyu wasapuka dehi, ninkenu jawu jinanzuluki dehi, neyi ninyibula yayiwahi yinakenuki dehi; kwenoku diku kunakakwinkela kukeŋa kwami.

¹³Nyitookatooka yinepuki dehi ivumba dadiwahi, kuyisu yetu kudi nyikabu yayiwahi yeŋi nayeŋi niyayiha niyayikulu, yinakutentekeli eyi wami nakeŋa.