Read MUKANDA WANZAMBI Pina ya Lipina 8 Bible Online

Pina ya Lipina 8 - MUKANDA WANZAMBI bible

Pina ya Lipina 8

¹Neyi wadiŋi neyi mana kwami waamwinaŋa kumayeli amama yami! Chinadi kukuwana hanzi nadi kukupwepujola; mwalala, kwosi wadi kundiwulaku.

²Nadi kukulombola hinukukutwala mwitala damama, diyi wadi kunleja chachiwahi; nadi kukunwisha walwa wakuvuba nanyiseki, wameji anyibula yami yayiwahi.

³Chikasa chindi chachimunswa chadi kwikala mwishina danamutu wami, nichikasa chindi chachidiilu chadi kunkumbata.

⁴Enu anyana awambanda amuYerusalema, nayisanyikishi nami, Bayi mutonesha, hela kuhindwishaku kukeŋaku, chiŋa hanawahi.

⁵Yeniwu wudi nakufuma mwisaŋa iku nakundameni hadi windi akeŋayi hinyi? Nakutonesheli mwishina damutondu wanyikabu yayiwahi; kwenoku kwokwafunyishilili mama yeyi nyisoŋu yakuvwaleyi, wakuvweli wafunyishilili nyisoŋu yakuvwala kwenoku.

⁶Nlamiki hamuchima weyi neyi chilamiki, nihachikasa cheyi neyi chilamiki; muloŋa kukeŋa kukweti Ŋovu neyi kufwa, mukawu wukweti wukatu neyi ŋamu; kuzuwa kwawu kudi neyi chazuwaŋa kesi, himuzuzu waweni wakudi Yehova.

⁷Yeji yayivulu hiyatweshaŋa kujima kukeŋaku, hela mabaji kutwesha kukumpula kukeŋa nehi; neyi muntu wukuhana yuma yindi yejima hakukeŋa, akamuseha nankashi.

⁸Tukweti muheletu wuchidi kansi, kanda aseli mayeluku. Ifuku dakamwihulawu muheletu twakamwililadi?

⁹Neyi himpwembu, twakatuŋilahu kakaposhi kasiliva. Neyi hichenzelu, twakamunyeŋumwisha mapalanga anyisida kwi-ndo.

¹⁰Ami nimpwembu, mayeli ami adi neyi tuposhi twayu. Henohu namwekeni kumesu indi neyi muntu namoni dehi kumwena.

¹¹Solomoni wadiŋi netempa dindi danyivinyu kuBayali Hamoni; itempoduwadi kunjikili kudi akwakuhemba, nindi, Wejima wenu mwakaleta hamuntu hamuntu mali ikombakaji anyikabu yadu.

¹²Itempa dami danyivinyu, dodamami aweni, didi kumesu ami. Eyi Solomoni wakatambula ikombakaji deyi, awa akuhemba nyikabu yidumu makulakaji awu ayedi.

¹³Eyi washakama mumatempa, akwetu adi nakutiyilila nawu atiyi izu deyi. Ntiyishidu.

¹⁴Eyi wami nakeŋa, nyakalaŋaa, wikali neyi mbaala hela neyi chisonji chankayi hampidi janyiseki.