Read MUKANDA WANZAMBI Isaya 14 Bible Online

Isaya 14 - MUKANDA WANZAMBI bible

Isaya 14

¹Muloŋa Yehova wakamutiyilaŋa aYakoba wushona, wakatonda cheŋi Isarela, wakayisha mwituŋa dawu awenawu; antu akwacheŋi akadibomba nawu, akalamata mutaŋa waYakoba.

²Nyuza yawantu akayitwala, akayishikŋa kwawu; mutaŋa waIsarela wakayiheta mwituŋa daYehova, akekala anduŋu jawu amayala nawambanda; akakwata ayikwatilaŋa; akayula ayikabishilaŋa.

³Ifuku dakakunookeshayi Yehova kukukala kuwunamoni, nikuwomawunatiyi, nikumudimu wakala wakukalakesheluwu,

⁴wakamutila mwantawa kuBabiloni chishimu ichi, neyi, Mukwakukabisha akwawu jinamukumi! Mukala wawuru wunakumi.

⁵Yehova nakotoli mutondu wawakwakwila chatama, ninkimyi yawanyuli.

⁶Yetelaŋa awu nachu nyuza yawantu nandombu, ete-e, yayulilaŋawu nachu nyuza nakuzuwa nakukabisha kwakadi niwukuyilekesha.

⁷Mwahita iseki dejima munanooki dehi, munamweni; hiyakuvwakuka nakwimba tumina.

⁸Mwalala, nyinjunŋa hiyi kuzapalalana nsaŋu yeyi, ninyisida yakuLebanoni nawa hamu, nawu, Ichi chakukundulawu dehi heseki hikunenzi nawa cheŋa mukwakututemaku.

⁹Kalupa mwishina damaseki hikakukubazumuka, hikakukukinkilila kuwukwinza; hikakukuhindwishila afu, wowu adiŋa alema hanu heseki; kanya mwisha dehi anyanta ejima amunyuza hamatanda awu awanta.

¹⁰Wejima wawuhiyakuhosha, hiyakukwila nawu, Komana eyi nawa wunazeyi dehi neyietu? Komana eyi wunabalumuki dehi neyi etu?

¹¹Kulema kweyi kunakunkumuki dehi mukalupa, niipumba dayisanji yeyi hamu; anakwalili dehi mavunu mwishina, anakubuti nawa mavunu hewulu.

¹²Eyi ntanda, mwana kakucha, o chiwunaholoki mwiwulu! O chanakukunduluwu heseki, eyi wanatilaŋa nyuza yawantu heseki!

¹³Eyi welilimu muchima weyi neyi, Ami nukukanduka mwiwulu. Neyi, Itanda dami dawanta nukudimotwesha tutumbwa twaNzambi. Neyi, Nukushakamaha mpidi yapompelaŋawu, kwakweni kunsa kumutamba wakukabeta kakuchimunswa.

¹⁴Nukukanduka haheni hewulu damavu. Nukwi kala neyi Mukwakubadika.

¹⁵Akakukunkumwisha mukalupa munsa jekela mwamweni mwaya.

¹⁶Akakumona akakuhenzahenza, akakushinshika nawu, Yeniwu diyi muntu wakankishilaŋa iseki, wanyinkeshelapa mawanta?

¹⁷Yeniwu diyi wabalumwini mpata yamunu mwishina yiikali neyi isaŋa damukunkulwayi, wasandasandili nyikala yadiŋumu? Diyi wabulilaŋa akusubula ankoli jindi afunti kunyikala yawu, tahindi?

¹⁸Anyanta ejima amunyuza yawantu, wejima wawu aakamaŋa mwalema, iwu mwitala dindi, iwu mwitala dindi.

¹⁹Hakwila eyi akunata dehi chakunata kwakulehinejamu deyi neyi lumutayi lwasweja kutama, akuvwika afu ápwikawu dehi mpoku jatubali, ayaloŋa mumalola amwikela neyi chibimbi chanadatoluwu nyendu.

²⁰Hiyakakujiika hamu nawuku, muloŋa wunakisapani itupadeyi, wunajahi antu eyi; anyana kawakwakukoŋa chatama hiyamba kayitenanawa cheŋuku haya nyaka.

²¹Loŋeshenuŋahu dehi yuma yakujaha nachu anyanindi nakuluwa kwawata tajawu, akenda kanyamuka cheŋi, hiyakuheta iseki, hiyakutuŋa nyikala mwahita mpata yamunu mwishina yejima.

²²Yehova wamazaza nindi, Nukuyinya mukila, kuBabiloni nukufumishaku ni ijina, niantu anashaluhu, nianyana, niezukulu. Dimu mwanahoshiyi Yehova.

²³Nukuwubalu muna mukwikala mwambala mwawayisaka, nimajiya ameji; nukukombamu nalukombu lwakujilumuna. Dimu mwanahoshiyi Yehova wamazaza.

²⁴Yehova wamazaza nasanyiki nindi, Chalala, munatoŋa ojoki dimu muchakamwekena; nimunafu ukuli dimu muchakakolela.

²⁵Nakakotola aAshuri mwituŋa dami, nakayidatola nyendu hampidi jami, henohu mpanda yawaAshuri yakayifuma, nichiteli chawu chakayifuma hamafwiji.

²⁶Dikufu ukula kwanafu ukwiluwu iseki dejima; dichikasa chanolweluwu nyuza yawantu yejima.

²⁷Muloŋa Yehova wamazaza nafuukuli dehi, wukuchibalumuna chiikali chamukunkulwayi hinyi? Chikasa chindi nachololi dehi, wukuchifuntishamu hinyi?

²⁸Mwaka wafwiliyi mwanta Ahazi hadiŋi wuprofwetu iwu.

²⁹Enu aFwilistinu, wejima wenu bayi mwakazapalala nanochu chiwunakotoki dehi muhinyi wayetelaŋawu nachuku; muŋa mumuji wakapela mwakafuma kabandanjila, mwanindi wakekala kapela kakesi katúukaŋa.

³⁰Awedi awatuzwepi akadya, abula yuma akakambama hazo-o; nakaja hamuji weyi nanzala, antu eyi akashalahu akayijaha.

³¹Kalokaku eyi chisunampwembu, dilaku eyi mukala; enu aFwilistinu munanowi dehi wejimawenu; muloŋa kukabeta kakuchimunswa kudi nakufuma wishi, hosi niniwuwukwimana hakanka windi hampinji jindi jamufu ukwilawu dehuku.

³²Atupanda amuza akuyakula nawudi? Nawu, Yehova naali dehi chikuku chaZiyona, dimu mwakabatama antu indi akabishewa.