Read MUKANDA WANZAMBI Isaya 2 Bible Online

Isaya 2 - MUKANDA WANZAMBI bible

Isaya 2

¹Izu damweniyi mwana kaAmozi Isaya hansaŋu yaYuda naYerusalema.

²Kunyaka vakukuminina antu amba kamona mpidi yetala daYehova yinashimati dehi hewulu damapidi, yakasompoka mpidi janyanya; nyuzayejima yakahwila kwenoku.

³Nyuza yayivulu yakaya nakuhosha nawu, Tuyenu twakakanduki kumpidi yaYehova, kwitala daNzambi yaYakoba; akatu leji mwendelaŋayi, kulonda twakendapa munjila jindi; muloŋa muZiyona mwakafuma nshimbi, kuYerusalema kwakafuma izu daYehova.

⁴Wakekala hakachi kanyuza nakuyisompesha, wakahoshola nyuza yayivulu; nimpoku jawu akajichila matemwa, nimayoŋa awu akayichila nyipanŋa; muza hiwakanyamwina muza wukwawu mpokuku, hiyakadiza nawa cheŋi njitaku.

⁵Eyi mutaŋa waYakoba, tuyenu twakendeli muchejeji chaYehova.

⁶Muloŋa eyi wunaleki dehi antu eyi wowu mutaŋa waYakoba, mulonawena anasweji tushidikilu twakumusela, hiyakwakuhopa natutumbwa neyi aFwilistinu, hiyakudeta mumakasa nawanyana awantu akwacheŋi.

⁷Itupadawu nawa dinenzali siliva nawuru, yuma yawu yalema hiyakumapaku; ituŋa dawu dinenzali nawa tuwalu, nimakálu awu hiyakumapaku.

⁸Ituŋadawu dinenzali nkishi nawa; adifukulaŋa kumudimu wamakasawu, chuma chakutupa nanyinu yawu awenawu.

⁹Muntu wakadi kulema hakubandama, muntu walema hakudizoza; dichi bayi wakayanakenaku.

¹⁰Ipilaku mwilola, wakabatami mulunkuŋu, wutemuki woma waYehova, nakuwaha kwawukeleŋa windi.

¹¹Mesu akudimujola akayizozesha, nikudivuna kwadivunaŋawu antu akakufukamisha heseki, ifuku odu akatúumbakesha Yehova hohu kanka windi.

¹²Muloŋa hakekala ifuku daYehova wamazaza dakawana antu ejima adinka wanta, adivuna, dakawana antu ejima adinyamuna kwiwulu; dakayishikija hamaseki;

¹³dakawana ninyisida yakuLebanoni yasweja kuleha yadinyamuna kwiwulu, ninyikula yakuBashani;

¹⁴dakawana nimpidijimaneni jejima jasweja kuleha, nimpidi janyanya jejima jadinyamuna kwiwulu;

¹⁵dakawana nituposhi twahahalehi, nimpwembu jejima;

¹⁶dakawananimaatu akuTarashishi ejima, nimapichara ejima akweti nichipepa.

¹⁷Kudi mujola kwadimujolaŋawu antu akakufukamisha hamaseki, wantawadinkaŋa awu antu akawuzozesha; ifuku odu akatúumbakesha Yehova hohu kanka windi.

¹⁸Ninkishi jakajiya chikupu.

¹⁹Hakanyamukayi nakukankisha iseki naŋovu, antu akeŋala mumayeŋu amumalola, nimumena ahamaseki, nawu atemuki woma waYehova nikuwaha kwawukeleŋi windi.

²⁰Dena ifuku odu muntu wakanatila ampumba nawatunfunfwa nkishi jindi jasiliva, ninkishi jindi jawuru jasoŋa eliyi, kulonda kudifukula kudi wena;

²¹kulonda ayi mumayeŋu amumalola nimunyaji yamumalola abaloka baloka, nindi atemuki woma waYehova nikuwaha kwawukeleŋi windi, hakanyamukayi nakukankisha iseki naŋovu.

²²Ketukenu kudi antu akweti muuya wamumazulu hohu, ochu wena alemena hadihi?