Read MUKANDA WANZAMBI Isaya 21 Bible Online

Isaya 21 - MUKANDA WANZAMBI bible

Isaya 21

¹Wuprofwetu wakutena isaŋa dakukaluŋalwiji. Hichikufuma kwisapa, kwituŋa dakutiya woma, neyi chadikitaŋa yinjimbi kukabeta kakuchidiilu.

²Ananleji chimwenu chakala; mukwakukwatila akwawu makasu hakukwatila akwawu makasu, mukwakubuwa akwawu hakubuwa. Eyi Elami, yakuku; eyi Mediya, yikuchiki; kudishishimona kwawu kwejima namwenesha dehi.

³Hankuma jami hanaswejiyikatu; nakwati nyisoŋu yidi neyi nyisoŋu yamumbanda wudi nakuvwalamwana; nabandami chakwila nikutwesha kutiya nehi, nabazumuki chakwila nikutwesha kumona nehi.

⁴Muchima wami hiwukululuta, chiwomawoma chananfwishi mutentu; kabwidibwidi kinakeŋelaŋa kanambalu mukili dehi kakuzaala woma hohu.

⁵Hiyakwala mesa, hiyakushaku akwakutala kunjila, hiyakudya, hiyakunwa; enu atulamba, nyamukenu muwayishinkebu manji.

⁶Muloŋa Yehova naŋili dehi nindi, Yaku wushi mukwakutala kunjila, akuleji yakumonayi.

⁷Wamweni chendu, akwakwenda hatuwaluadi nakwenda ayedi ayedi, nichendu chawayimbulu, nichendu chawangameli, hakutiyilila nankashi, tiyilile-e.

⁸Hakubilela neyi mutupa, nindi, Eyi Nkaka, nemanaŋa hakaposhi kakutalila mwaana wejima, aŋushaŋa kumudimuwami wakuhemba wufuku wejima, mafuku amavulu;

⁹nami nitali, chendu chawantu chikwinzichi, akwakwendela hatuwalu ayedi ayedi. Hakunuŋaku cheŋi nindi, Babiloni naholoki, naholoki; akishi akusopa ejima awakishi indi anakotokeli heseki.

¹⁰Eyi nahulaŋa, eyi tidiku yahawuhulilu wami; chinatiyi kudi Yehova wamazaza, Nzambi yaIsarela, dichi chinukuyishimwina.

¹¹Wuprofwetu wakutena Duma. Wumu hakumbilela kuSeyiri, nindi, Eyi mukwakutala kunjila, wufukuowu kudi ŋahi? Eyi mukwakutala kunjila, wufuku owu kudi ŋahi?

¹²Budidi hiyikwinza, niwufuku nawa; neyi munakepi kwihula ihulenu; balumukenu, inzenu.

¹³Wuprofwetu wakutena Arabiya. Enu yendu yawaDedani yawakwakwenda, mwakakamina mwivunda damu Arabiya.

¹⁴Muntu watiyili mpwila amuleteleli meji; antu ashakama mwituŋa daTema ayikinkililili akwakutemuka nakudya kwawu.

¹⁵Muloŋa temukili mpoku jatubali, nimata anyikunji akwevula dehi, nikukalakwanjita.

¹⁶Muloŋa Yehova naŋali dehi nindi, Mumwaka wumu wudi neyi nyakayesekela ŋawu muntu wakwataŋa mudimu, kulema kwaKedari kwakakuma kwejima;

¹⁷akashala hadi akwamata anyikunji achindiluwu, wowu ayilobu awanyana kaKedari, akakeha; muloŋa Yehova, Nzambi yaIsarela, nachihoshi dehi.