Read MUKANDA WANZAMBI Isaya 22 Bible Online

Isaya 22 - MUKANDA WANZAMBI bible

Isaya 22

¹Wuprofwetu wakutena chinekineki chachimwenu. Wunatiyi ŋahi chiyanakandami antu eyi ejima hamawulu amatala?

²Eyi kweyi kwakubwakata hohu, wumukala wamapumba, mukala wakudisansula; antu eyi anajahuwu hiyanayilihi nampoku yakabaluku, hiyanafwi kunjitaku.

³Anyuli jeyi ejima atemukilili hamu, ayikasili kudi akwamata anyikunji, antu ejima awenuwu mudeyi ayikasilili hamu, atemukili kwakulehi.

⁴Dichi nelili nami, Talenu kwacheŋi, bayi muntalaku; nlekenunidili kwami madilu ami alula; bayi mukabakana nakunkundeja namwanakawantu ami wamumbanda anakisapanuwuku.

⁵Muloŋa hiifuku dayihuŋu, dakudatola, dakujinoka, dakufuma kudi mwanta Yehova wamazaza, muchinekineki chachimwenu; hikuhumuna mpwembu, hikudilila mapidi.

⁶Elami wasendeli mungongu wansewuhamu namakálu awantu niakwakwendela hatuwalu; Kiri hakubutulula nkebu.

⁷Yinekineki yeyi yasweja kuwaha yenzeli mbe namakálu, niakwakwendela hatuwalu hiyakutandama kuchisu champwembu.

⁸Wabutulwili chuma chabutiluwu Yuda; dena ifuku odu wakuhweleleli yitwa yamwitala damulusesa.

⁹Mumukala waDavidi mwamweni habaluka hanavuli; mwapompesheli meji akwijiya dakunkulu.

¹⁰Mwachindili matala amuYerusalema, mwahumwini matala kulonda mukoleshi nachu mpwembu.

¹¹Himukukokela meji hakachi kampwembu jiyedi kulonda meji enzi mwijiya dadikulu, hakwila wakoŋeli yumiyi enu kwenu kumutala nehi, waloŋesheli yumiyi kunyaka yahashankulu enu kwcnu kumulemesha nehi.

¹²Dena ifuku odu Mwanta Yehova wamazaza watambikili antu, nindi, Dilenu, neŋenu, tewulenu nkumbu, vwalenu yikeleyi;

¹³kutala hiyakuzaŋa ajala, hiyakutiya kuwaha, hiyakutapa nombi, hiyakujaha nyikoku, hiyakudyambiji nikunwa walwa; nawu, Tudyenu, tunwenu, kumadiki hitukufwa.

¹⁴Yehova wamazaza wadi mwekesheli kumatu ami nindi, Chalala kuluwaiku hiyamba kayibutilaku nichimwakafwa. Dichi chanahoshiyi Mwanta Yehova wamazaza.

¹⁵Mwanta Yehova wamazaza nindi, Nyamukaku wuyi kudi iwu mukwakuhemba yuma, iwu Shebina, watalaŋa kwitala;

¹⁶kamwili neyi, Wudinakwila ŋahi kunu? Wudi nanyi kunu mwaka wakadibalwili ŋamu kunu? Hakudibalwila jimu hewulu hahalehi, hakudibazila mwilola mwakushakama!

¹⁷Tiyaku, Yehova wakakuzukumwina kwakulehi chawulobu hohu; wakakukwatakwata hamu mbe.

¹⁸Wakakuzwiya zwi-zwi, wakakunataneyi ngunja mwituŋa deneni; kwoku kuwakafwila, kwoku kwakekala nimakálu akulema kweyi, yeyi nsonyi yetala dankaka yeyi.

¹⁹Nakakushinjeka wakafumi mumudimu weyi, wakakunaŋumuna heyi halema hiwekala.

²⁰Dena ifuku odu nakatambika kambuŋami mwana kaHilikiya Eliyakimi;

²¹nakamuvwika chi kovwelu cheyi, nakamukolesha namuya weyi, wuyuli weyinakawinka muchikasa chayena; diyi wakekala tata yawakwakushakama muYerusalema niyawakwamutaŋa waYuda.

²²Nsapi yetala daDavidi nukumutwikayu hachifwiji chindi; yena henzululi, hosi wakenzela kwoku; yena henzeli, hosi nawa wakenzulula kwoku.

²³Nukumupapa hakola neyilubwambu, akekali itanda dakulema damutaŋa watata yindi.

²⁴Hadi yena akakudeka kudekahu kulema kwamutaŋa watata yindi kwejima, ninawa akusemukaku ninawa akudi kunjikaku, kafwampi yuma yanyanya yejima, kufumisha kumpasa ndo nikunyilondu yejima.

²⁵Yehova wamazaza nindi, Dena ifuku odu lubwambu lwapapiluwu hakola lwakazembama; akaluketula, lwakaholoka, nichiteli chadiŋuku akachiketulaku; muŋa Yehova nachihoshi dehi.