Read MUKANDA WANZAMBI Isaya 34 Bible Online

Isaya 34 - MUKANDA WANZAMBI bible

Isaya 34

¹Enu nyuza, kundamenu kwakwihi mutiyi; ninenu nyuza yawantu, tiyililenu. Iseki ditiyi, niyuma yalumbamamu; mpata yamunumwishina nawa yitiyi, niyuma yejima yafumaŋamu.

²Muloŋa Yehova hakutatashanina nyuza yejima, hakulendumukila izaza dawu dejima; nayinoŋeshi dehi ji-i chikupu, nayihani dehi akayŋaholi.

³Awa anajahuwu akayinata chakuyinata, hakakakumuka niivumba dayibimbi yawu datama, nimpidi jakasuŋunuka namashi awu.

⁴Niyileŋaleŋa yamwiwulu yejima yakasuŋunuka nawa, nimawulu akayivuŋa avuŋa chikwamukanda wavuŋa vuŋaŋawu neyi chikaŋa; yileŋaleŋa yawu yejima yakalehuka lehu, neyichalepukaŋa mafu amuvinyu hiyakuhuluka, neyi chalepukaŋa nimafuachikuyu hiyakuhuluka.

⁵Muloŋa mpoku yami yakabali yinanwi dehi mashi mwiwulu, nimpwila ngwa. Tiyenu, yakenza nakukunkumukila hadiEdomi nihadi antu eshiŋu dami, kulonda kusompesha.

⁶Mpoku yaYehova yakabali yekuta dehi mashi, yanuna dehi namanji, namashi awanyana kanyikoku nampembi, namanji akunshiya jayizamba yanyikoku; muloŋa Yehova wukuketula yimuna muBozira, wukujahola antu amavulu mwituŋa daEdomi.

⁷Aŋombi amumpata akenza nakukunkumuka nawu nima yoŋa aŋombi amayala nimaboŋu nawa, ituŋa dawu dasheta dehi namashi, nilunkuŋulwawu lwalebama dehi namanji.

⁸Muloŋa lelu hiifuku dakutenda kwaYehova, himwaka wakufuta muloŋa watamishiluwu Ziyona kudi antu.

⁹Tuloŋa twamuEdomi twakabalumuka wukokotu, nilunkuŋu lwekala mulwaka balumuka kesi kaNzambi, niituŋa dawu dakabalumuka wukokotu wakwata dehi kesi.

¹⁰Himwakajimaku niwufuku nimwaana; mwakafwindaŋa wishi niwufuku nimwaana; mwakekala neyi muchihembi hohumufwawa muvwalikawa, mufwawa muvwalikawa; kwosi muntu wakahitamuku chahaya nyaka.

¹¹Dakekala dambala damumpundu nachisaka; mwakashakama chikuŋulu nekololu; wakatanjikahu mwonji wakuchachaŋesha nachu, nilevo wakuleta nachu kubula mwituŋa.

¹²Akata mbika ayilolu jawu, nawu, Inzenu mudi wanta, hiyakamwekanaku; tulamba twawutwejima anamani dehi.

¹³Mumatalawu awanta mwakamena nyiŋa, munyikala yawu yayipaka mwakamena nzonzonzu ninyitondu yalemana; mwakekala mwakushakama nyumbu, chipaŋu chawanyamalanda.

¹⁴Anyama amwisaŋi ekala muchibaba akapompelamu nawatuŋawidi, niampembi amwisaŋa akaditambekelamu, mwalala chinsweŋi wakashakama kwenoku, kwokwakawanayi nikwindi kwakunookela.

¹⁵Ikuŋu wakaalilaku chaala chindi, wakombila nimateta, hakayiteta, hakapompesha anyanindi mumwevulu windi; kwokwakapompela niyiyimbi, iwu naŋodindi, iwu naŋodindi.

¹⁶Keŋkeŋenu mumukanda waYehova mutaŋumu; yumiyi himwakabula chuma nichimuku, kwosi wakabula iŋodinduku, muloŋa kanwa kamikanashimuni dehi, niSpiritu yindi nayipompeshi dehi.

¹⁷Nayisakwili dehi nachinjikijilu chakusakula nachu, chikasa chindi chinayanjaŋeni dehi namwonji; dakekala ituŋa dawu dahaya nyaka, akashakamamu mufwawa muvwalikawa, mufwawa muvwalikawa.