Read MUKANDA WANZAMBI Isaya 37 Bible Online

Isaya 37 - MUKANDA WANZAMBI bible

Isaya 37

¹Chachitiyiliyi mwanta Hezekiya hakutabola mahinindi, hakudikumbakesha chikeleyi, hakwiŋijala mwitala daYehova.

²Hakutemesha Eliyakimi wadiŋa mukulumpi wawakwetala, ninsoneki Shebina, niakulumpi awatupristu, kudi kaprofwetu Isaya mwana kaAmozi, anadikumbakeshi yikeleyi.

³Hiyakumwila nawu, Hezekiya nindi, Lelu hiifuku dayihuŋu, dakutuhoshola, dakututuka. Anyana anashiki hakuvwalika, Ŋovu jakuyivwalakwosi.

⁴Wamba kela Yehova Nzambi yeyi wukutiya mazu aRabishake, anatemeshiyi nkaka yindi mwanta wakuAshuri, akumuhosha Nzambi wamumi chatama, wakabayisha mazu anatiyiyi Yehova Nzambi yeyi. Dichi dinu akanjiki kulomba kweyi kwakulombela chibalu chawantu chinashaluku.

⁵Ambuŋa amwanta Hezekiya hiyakwinza kudi Isaya.

⁶Isaya hakuyila nindi, Kamwilenu mwanta wenu nenu, Yehova nahoshi nindi, Bayi wutiya woma wamazu iwunatiyi, anantukuwu kudi ambuŋamwanta wakuAshuruku.

⁷Tiyenu, nakasha mudi yena spiritu yakwila, chakatiyayinsaŋu yanáwunáwu hakafunta kwitala dindi, hinakamudimbwisha nampokuyakabali mwituŋa dindi.

⁸Rabishake hakufunta, hakuwana mwanta wakuAshuri wudi nakulwa naLibina, muloŋa natiyi nawu nafumi dehi kuLakishi.

⁹Watiyili hiyakutena mwanta wakuEtiyopiya Tirihaha, nawu, Yena nenzi nakulwa naneyi. Chachitiyiliyi hakutemesha atuŋanda kudi Hezekiya,

¹⁰nindi, Kahoshenuna mwanta wawaYuda Hezekiya, nenu, Bayi akakudimba kudi Nzambi yeyi wakuhwelelaŋa, nindi Yerusalema hiyakawuhana kudi mwanta waku-Ashuruku.

¹¹Wunatiyi dehi chanakoŋuwu matuŋa ejima kudi anyanta akuAshuri, chanayijilumunuwu chikupu; eyi yeyi wakapuluka?

¹²AGozani naHarani naRezefwi nianyana kaEdeni adiŋi muTelasari, nyuza yajilumwinuwu ankakulula jami, akishi awu ayipulwishili?

¹³Mwanta wakuHamati nimwanta wakuAripadi nimwanta wamukala waSefwavwayimi, niwaHena, niwalvwa, adi kudihi?

¹⁴Hezekiya watambwili mukanda kumakasa awatuŋanda, hakuwutaŋa. Hezekiya hakuya kwitala daYehova, hakuwuta ndumuna kumesu aYehova.

¹⁵Hezekiya hakulomba kudi Yehova,

¹⁶nindi, Eyi Yehova wamazaza, Nzambi yaIsarela, washakama hadi akerubi, eyi yeyi Nzambi kanka weyihohu, wamawanta ejima ahamaseki, yeyi waleŋeli niiwulu nimaseki.

¹⁷Teŋelekaku itu deyi, eyi Yehova, wutiyi. Tonaku mesu eyi, eyi Yehova, wumoni. Tiyaku mazu aSenakeribi anatemeshiyi akumuhosha Nzambi wamumi chatama.

¹⁸Chalala, eyi Yehova, anyanta akuAshuri anakisaŋa aninyuza yejima nimatuŋawu,

¹⁹ananati niakishi awu mukesi, muloŋa hiyadiŋi Nzambuku, adiŋi nyidimu yakumakasa awantu, adiŋi nyitondu namalola, dichi chanayikisaŋenenuwu.

²⁰Ichi dinu, eyi Yehova Nzambi yetu, atwamwini kudi yena, kulonda mawanta ejima ahamaseki akeluki nawu eyiyeyi Yehova kanka weyi hohu.

²¹Mwana kaAmozi Isaya hakutemesha mazu kudi Hezekiya, nindi, Yehova Nzambi yaIsarela nahoshi nindi, Chiwunalombi kudami nakutena mwanta wakuAshuri Senakeribi, natiyi dehi.

²²Tiya izu danahoshiyi Yehova dakutena Senakeribi, nindi, Mujiki wamuZiyona nakudiwuli, nakusehi. Mwana wamumbanda wamuYerusalema nakulembuli nanamutu.

²³Wunahoshinyi chatama? Wunatukinyi? Wunahoshi nanyi izu dankalu? Wunafumbwilinyi mesu eyi kwiwulu? Hiyowu Wajila waIsarelaku, tahindi?

²⁴Wunamuhoshi Mwanta chatama natuŋanda tweyi, wuneli neyi, Nenzi dehi nanyikanka yami yamakálu hewulu damapidi amaneni, nimukachika Lebanoni lwe. Nukutema nyisida yayilehi yiduku, ninyinjunga yayiwahi yiduku. Hela kunsa kwasweja kuleha kwiwulu nukwijila, helamwisaŋa dakwiha dindi mwasweja kusoŋa.

²⁵Nasempi mashima nanumumeji, nakomisha tuloŋa twejima twamu Ejipitu namadachilu anyendu yami.

²⁶Chinelili yumiyi hanyaka, chinayiloŋesheli kushankulu, eyi kuchitiya nehi? Ichi chiwunamoni kusanda nyikala yamapwembu hiyikwikala nyilumba yanswadi chinafumi kudami.

²⁷Dichi chabulililuwu enimbu ŋovu, dichi chahayamininuwu hiyakubaya. Dichi chelililuwu neyi matahu amumpata, neyi munyenvu, neyi matahu amenaŋa hamawulu amatala, neyiiha datidiku yinomi chakadi nikukula.

²⁸Ami neluki nimuwasha kaminaŋani muwedikilaŋa nimuweŋililaŋa niniuwanzuwilaŋa.

²⁹Nanochu chiwanzuwilaŋa, nanochu chineli kudisama kuwadisamaŋa kunashiki kumatu ami, nukukoba ilowa dami mumazulu eyi, nukusha chikuŋu chami mukanwa keyi, nukukubalumuna wufunti njila yiwenjili.

³⁰Tiya chinjikijilu chiwakamona, makonu mwakadya yakudisoŋela, hamwaka wamuchiyedi mwakadya yachinkulu, mwaka wamuchisatu mwakadima, mwakadya, mwakatumba matempa anyivinyu, mwakadya nyikabu yayu.

³¹Akumutaŋa waYuda anashali, anapuluki, akashimata cheŋi nyiji hamaseki, akasoŋa nyikabukwiwulu.

³²Akashalaku akafuma muYerusalema, akapuluka akafuma kumpidi yaZiyona. Iyena daYehova wamazaza kumuchima dodakakoŋa chumichi.

³³Dichi Yehova nahoshi nakutena mwanta wakuAshuri, nindi, Hakenza kumukala wunuku, hakaasaku nsewuku, hakenza kwoku nankebuku, hela kudi minaku mpwembu nehi.

³⁴Njila yenjiliyi diyi yakafuntayi, hakenza kumukala wunuku, dichi chanahoshiyi Yehova.

³⁵Muloŋa mukala wunu nukuwuhemba kulonda kuwamwina, hamujimba wamami aweni, nihamujimba wakambuŋa ami Davidi.

³⁶Kaŋelu kaYehova hakwidika, hakutapa muchilombu chawaAshuri makombakaji nkulakaji, namakombakaji makumi atanu nasatu, namakombakaji atanu; chahindukiluwu budidi yayeni kutala hiyadi kwawafu hohu.

³⁷Mwanta wakuAshuri Senakeribi hakufumaku, hakufunta, hakuya nakushakama kuNineve.

³⁸Chadiŋa nakudifukulayi mwitala damukishi windi Nisiroki, anyanindi Adarameleki naShareza hiyakumutaŋa nampoku yakabali, hiyakutemukila kwituŋa dakuArarati. Mwanindi Esahadoni hakumuswana.