Read MUKANDA WANZAMBI Isaya 43 Bible Online

Isaya 43 - MUKANDA WANZAMBI bible

Isaya 43

¹Ichi dinu Yehova wakuleŋeli, eyi Yakoba, wakuwumbili, eyiIsarela, nindi, Bayi wutiya womaku, muloŋa nakukúuli dehi. Nakutambiki hejina deyi, eyi wuwami.

²Chiwukuhitaŋa muchimeji nukwikalaŋa aneyi. Chiwukuhitaŋa namutuloŋa, hitwakakuhita hanamutuku. Chiwukuhitaŋa mukesi, hiwakasukumaku; kwosi mulaŋu wakakwochaku.

³Muloŋa yami Yehova Nzambi yeyi, Wajila waIsarela, chamwinu cheyi. Nahani aEjipitu ekali akukukuula nachu, nahani aEtiyopiya nawaSeba hamujimbaweyi.

⁴Chiwasweja wuseya kumesu ami, nichiwalema, nichina kukeŋi, dichi chinukuhena antu hamujimba weyi, nyuza yawantu hawumi weyi.

⁵Bayi wutiyapa womaku, muloŋa ami nidi neyi. Nukukuletelaŋa anyaneyi kumusela, nukukukuŋula kumuji ka.

⁶Nukumwila kabeta kakuchimu nswanami, Hanaku. Nikabeta kakuchidiilu, nukumwila nami, Bayi wudikaŋa anawuku. Nleteli anyanami amayala akafumi kwakulehi, nianyanami awambanda akafumi kunsa yeseki;

⁷ejima atumbawu ijina dami inaleŋa, nami hatiyakeni kulema kwami, yami inamuwumbi, mwalala yami inamutupai.

⁸Yiidishenu antu awa aputa mesu akweti mesu, ajika matu akwetimatu.

⁹Nyuza yejima yidikumaŋeji hamu, nyuza yawantu yipompi. Mwinawu hinyi wukushimuna chumichi, wukutuleja yuma yadiŋilaŋa dehi? Aleti ayinsahu jawu kulonda akayiŋi. Neyi nehi, akakumini dakutiya, akelinawu, Chalala.

¹⁰Yehova nindi, Yenu ayinsahu jami, nikambuŋami inatondi; kulonda mwakeluki, mwakaŋatiyi, mwakashinshiki nenu, Yamidiyi. Nenu, Kwosi Nzambi asambililuwu kuwumba, ami nikumininaku, hikwamba kekala nawa wakanlondelaku.

¹¹Yami, yami Yehova; chamwinu wacheŋa kwosi, yami hohu.

¹²Nashimuni dehi kwami, naamwini dehi, namwekeshi dehi, himwadiŋi wacheŋuku. Dichi Yehova nindi, Yenu ayinsahu jami akunshimuna nenu, yami Nzambi.

¹³Kufumisha hatachikili mwaana, ami nidi kwoku, hikudi wukupulwisha muntu kudamuku. Nukukoŋaŋa ahohu, akunlekesha kudinyi?

¹⁴Yehova nkúuli yenu, Wajila waIsarela, nindi, Natemeshi njita kuBabiloniha mujimba wenu, nakayitemuna wejima wawu, niaKaladeya hamumuma atu aluŋilaŋa awu.

¹⁵Yami Yehova, wenu Wajila, Nleŋi yaIsarela, Mwanta wenu.

¹⁶Yehova wabuzaŋa njila mukaluŋalwiji, ninjila muchimeji chaŋovu,

¹⁷wedishaŋa ikalu nakawalu, ninjita niakwaŋovu; anakamihamu, hiyakahindukaku, anajiyi dehi, anayijimi neyi wanda.

¹⁸Bayi mwanukaŋa yuma yakusambila, hela kutoŋojoka yuma yakushankuluku.

¹⁹Tiyenu, nukwila chuma chachiha, keŋa chisoŋi katataka. Ochu himwakachilukaku? Nukubuza njila mwisaŋa damukunkulwayi, nukubuza nituloŋamwikuna dawuma.

²⁰Akanlemesha kudi anyama amumpata, hamuna wanyumbu nawanyamalanda, muloŋa nayinki meji mwisaŋa dawuma, nituloŋa mwikuna dawuma, kulonda kunwisha antu ami natondeli,

²¹wowuantu ami nadiwumbilili ami aweni, nami ashimunaŋa jakunshimeka.

²²Hela chochu, eyi Yakoba, hiwunanta mbikuku; muloŋa, eyi Isarela, wunantiyi kafulumba kumuchima fu.

²³Hiwunanleteli nyana kampembi nanyikoku yanyilambu yeyi yakushitaku; hiwunanlemeshi nakunketwila yimuna yeyuku. Hinakulambwishi nyilambu hela kukukabakesha nalibonaku.

²⁴Hiwunanlandili nyisachi yevumba dadiwahi namali, hela kuŋikutisha namanji ayimuna yeyuku, ilaŋa wunankalakeshi nanshidi jeyi, wunanzeyeshi nakuluwaluwa kweyi.

²⁵Ami yami najimaŋa nyiloŋa yeyi hamujimba wamami aweni; hinaka anukaŋa nawa nshidi jeyuku.

²⁶Ŋanukishi; tuhoshenu muloŋa; awulaku muloŋa weyi, kulonda akakuyiŋishi.

²⁷Nkakulula yeyi wakusambila wavulumwini, akwakukulu mbulwila anamotoki dehi izu dami.

²⁸Dichi ami najiloli dehi tulamba twakumalala, Yakoba namutoŋweli dehi kwikala washiŋewa, Isarela nawa ekali watukewa.