Read MUKANDA WANZAMBI Isaya 52 Bible Online

Isaya 52 - MUKANDA WANZAMBI bible

Isaya 52

¹Eyi Ziyona, tonaku, tonaku, wuvwali Ŋovu jeyi. Eyi Yerusalema, mukala wajila, vwalaku mahineyi alubanji. Kufumisha hanumweyeyi himwakeŋa ila cheŋi chidima namukwamajiluku.

²Eyi Yerusalema didikumuni lunkuŋu, nyamukaku wushakami. Eyi nkoli, mwana kaZiyona wamumbanda, subulaku nyonji yidi kunshiŋu yeyi.

³Muloŋa Yehova nahoshi nindi, Ayilandili chakadi chuma, akayikuula nawa chakadi mali.

⁴Muloŋa Mwanta Nzambi nahoshi nindi, Antu amihakusambila akunkumukili muEjipitu nakushakamamu; aAshuri nawaayikabishili chakadi muloŋa.

⁵Yehova nindi, Ichi dinu nukwila pahikunu chatwalawu dehi antu ami chamukunkulu? Yehova nindi, Antu ayiyulaŋa hiyakukaloka, ijina dami hiyakudihoshaŋa chatama mwaana wejima.

⁶Dichi chakelukilawu ijina dami. Dichi chakelukilawu ifukuodu nawu, Diyi ami nahoshaŋa, tiyenu, yami.

⁷O chiyasweja lubanji hamapidi nyendu yamuntu wukuleta nsaŋuyayiwahi, wukutiyakesha jakuwunda, wukuleta nsaŋu yayiwahi yayuma yayiwahi, wukushimuna wamwinu, wukumwila Ziyona nindi, Nzambi yeyidiyi Mwanta!

⁸Mazu awantu eyi akwakutalatala, owu! Hiyakunyamuna izu dawu kwiwulu, hiyakuvwakuka kwimba tumina; muloŋa chakafuntayi Yehova kuZiyona akadimona mesu namesu.

⁹Enu mahembi aYerusalema, vwakukenu nakuzaŋa alala nikwimba tumina, muloŋa Yehova nakundejidehi antu indi, nakuuli dehi Yerusalema.

¹⁰Yehova nedishi dehi chikasachindi chajila hatooka, kumesu anyuza yejima; insa jeseki jejima jakamona wamwinu waNzambi yetu.

¹¹Fumenuku, fumenuku, idikenumu, bayi mukunka kuchuma chamajiluku. Fumenu mukachi kawu. Ikalenu atooka enu mwasendaŋa yuma?

¹²Muloŋa himwakedi kamu chalufuchuku, himwakaya chakutemukaku, muloŋa Yehova diyi wakatwaminaŋa kumukuya; Nzambi yaIsarela diyi wakayikumaŋa munyima.

¹³Talenu, kambuŋami wakela chakashinshi; akamutúumbakesha akamulemesha, wakela muneni nankashi.

¹⁴Chamuhayaminuwu kudi antu amavulu, chamutamishiluwu kumesu indi, kanda atamishaŋahu dehi muntuniwumu chochochuku, chamutamishiluwu nimwindi mwekalilayi, kanda atamishaŋahu dehi anyana kawantu chochochuku;

¹⁵dichi chakasampwilayi nyuza yayivulu. Anyanta ankanu chakamutalawu akajika kukanwa, muloŋa akamona chuma chabulili kuyilejawu, akashinshika chuma chabulili kutiyawu.