Read MUKANDA WANZAMBI Isaya 57 Bible Online

Isaya 57 - MUKANDA WANZAMBI bible

Isaya 57

¹Chanoŋaŋa mukwakuloŋa, kwosi muntu wachishaŋa kumuchimaku. Nichatwalaŋawu antu akweti luwi, kwosi nawa muntu watoŋojokaŋa chachiwahi nindi, akwakuloŋa anayifumishi kuyuma yatamayakeŋa kwinzaku, eŋilaŋa mukuwunda;

²awa endaŋa chakwimakana zwa-aanookaŋa hatudidi twawu.

³Enu anyana kamukwakuhoŋa wamumbanda, enu avwalawu kudi chivumbi weyala nakabola, kundamenu kunu.

⁴Mudi nakuluŋa nanyi? Mudi nakukenama nanyi himukwidisha niidimi? Himudi anyana kakuputolaku; anyana akutwambaku?

⁵Enu mwaditatishaŋa munyikula, nimumashina anyitondu yejima yituuta, mwajahaŋa anyana muyinekineki, nimunyaji yamalola?

⁶Kumalola asenena amuyinekineki kwoku kuwudiiluweyi, wenawa diwu akusakwilawu nachinjikijilu, diwu wunahuŋununi himulambu wakuhuŋununa, wunalambuli nihimulambu wawuŋa. Indi ami nakawunda ŋahi nayumiyi?

⁷Wunashi dehi kadidi keyi hampidi yanyuŋa yayilehi, kwoku wayili nakuketwila chimuna.

⁸Wunemiki dehi yumayaku kwanukaŋa nachu nikunyima jayenzelu, nikuyipamba. Wunavuuli dehi kumesu awacheŋi, bayi kumesu amuku, wunakanduki, wunatoheshi kadidi keyi, wunatiyaloŋani nawu chitiyaŋenu. Wakeŋeli tudidi twawukwonsu kuwatumweni.

⁹Wayili kudi mwanta namanji, hiwukuvulisha nimalasha eyi, hiwukutemesha tuŋanda tweyi kwakulehi, hiwukudisawula chakuditwala lwe-e nimukaiuŋa.

¹⁰Eyi wazeyeli nanjila kuleha. Helachochu, kuhosha neyi, Nidi nakukabakana tuhu; nehi. Hiwukuswejesha niŋovu. Dichi chajabulili kukuhwa.

¹¹Dichi wunaakaminyi? Wunatiyinyi woma, mwaka wutwambi, wubulikuŋanuka, wubuli kuchisha kumuchima? Chinamweni zo-o nyaka yejimiyi, eyi kweyi kuntiya woma nehi?

¹²Ami nukushimuna kuloŋa kweyi, ninyidimu yeyi, hiyakakuwahishaku.

¹³Chiwakadila, awa wapompesha akakupulwishi dinu. Mpepela yakayitwala, muuya wakayitwala wejimawawu. Kwinza wukunkuhwelelami diyi wakaheta ituŋa, diyi wakaswanampidi yami yajila.

¹⁴Diyi wakela nindi, Dimenu muhapa, dimenumuhaŋa, loŋeshenu njila, fumishenu chuma chakuhukana munjila yawantu ami.

¹⁵Wahahalehi, Wabadika hewulu, washakama mwahaya nyaka, wukweti ijina daWajila, nindi, Ami nashakama hewulu hajila, hamu namuntu wukwetimuchima wachikeka, wadizoza, kulonda nihizumwishi nyichima yawantu adizoza, nihizumwishi nawa nyichima yawantu akweti nyichima yachikeka.

¹⁶Muloŋa ami hinakakonkololaŋa konkololee-ku, hinakazuwaŋa mafuku ejimaku, nyichima yawantu yakenza kazeya kumesu ami, ninyevulu yinalepelinawa.

¹⁷Namuzuwilili, hinukumweta nakuluwa kwalwisu lwindi, dichi chinamubutilili mesu ami; yena kwindi chaluwalalayi ho-o mwomwatwala muchima windi.

¹⁸Ami namoni mwelaŋayi, nakamúuka, nakamulombolaŋa nawa, nakamukundeja kundeja cheŋi niantu indi akwakudilakumu.

¹⁹Yami naleŋaŋa nyikabu yakunyivumbu. Yehova nindi, Kuwunda, kuwunda kwikali nikudi wudi kwakulehi nikudi wudi kwakwihi. Nakamúuka kwami.

²⁰Antu atama adi neyi kaluŋalwiji kwamankanda benka benka benka, hikatweshaŋa kunookaku, kavundolaŋa nimalowa nimajilu.

²¹Nzambi yami nindi, Antu atama hiyamonaŋa kuwundaku.