Read MUKANDA WANZAMBI Isaya 6 Bible Online

Isaya 6 - MUKANDA WANZAMBI bible

Isaya 6

¹Mwaka wafwili mwanta Uziya namweni Mwanta nashakami hetanda mawanta, hewulu hanyamuka, mutembeli mwenzeli ihina dindi to-o.

²Hewulu dindi hanemani aserafwi, wejima wawu akweti mpuula jawu, iwu jitanu nayimu, iwu jitanu nayimu; jiyedi nabuti nachu kumesu, jiyedinabuti nachu kunyendu, jiyedi hakutúuka nachu.

³Iwu hakubidika kudi mukwawu nindi, Yehova wamazaza Wajila, Wajila, Wajila. Iseki deji madina wanini kwakulema kwindi hohu.

⁴Kuyipamba yakuchisu hikukukankanezu dayenowu wabidikili, niitala hidikwinzala wishi.

⁵Hinukwila nami, Yayo, ami! Jinankumi; ami muntu wanyivumbu yamajilu, nashakamahamu nawantu anyivumbu yamajilu, mesu ami anamoni Mwanta, Yehova wamazaza.

⁶Kaserafwi wumu hakutúuka, hakwinza kudami, muchikasa chindi nasendi ikala dakesi dananoniyi nanzamba hakameŋa;

⁷hakunkunkadu kukanwa kami, nindi, Tala, idi dinakukunki dehi kunyivumbu yeyi; kuluwa kweyi kunafumi dehi, ninshidi yeyi anayitookeshi dehi.

⁸Hinukutiya izu daMwanta, nindi, Nukutemeshanyi? Wukutuyilahinyi? Ami nami, Yamonu, ntemeshami.

⁹Nindi, Yaku wakaleji antuawa neyi, Kutiya mukutiya, bayi mushinshika mwokuku, kumona mukumona, bayi mwiiuka mwokuku.

¹⁰Supishaku nyichima yawantu awa, wuyijiki mumatu awu, wuyijimi mumesu awu; akenda kamona namesuawu, akenda katiya namatu awu, akenda kashinshika nanyichima yawu, akenda kabalumuka cheŋa, hiyakayuka.

¹¹Ami nami, Nikumwakanyi Mwanta? Nindi, Chiŋa nyikala yineli dehi kwamahembi hohu yakadininiwu wukushakamamu, nimatala nawa chochu nimuntu wukwikalamunehi, niituŋa dinabalumuki kwachihembi hohu,

¹²nichakela Yehova natwali dehi antu kwakulehi, nichimwakela mwituŋa munashali dehi kwazo-o mwakadi nimuntu.

¹³Neyi mwakashala chibalu chamwikumi, nichena nawa akachidya; neyi muterebinti, hela mukula, wakwila anawutemi dehi wunashali dehi kwachishinji; choche nochu nawa anyana ajiladichi chishinji chawu.