Read MUKANDA WANZAMBI Isaya 60 Bible Online

Isaya 60 - MUKANDA WANZAMBI bible

Isaya 60

¹Nyamukaku, chaku; muloŋa mwaana weyi wunenzi, nikulema kwaYehova kunakutuntukili.

²Muloŋa tiya, mwidima wakabutaiseki, mwidima wabwi chikupu wakabuta nyuza yawantu, ilaŋa Yehova wakakutuntukila, ni kulema kwindi akakumwena hadeyi.

³Nyuza yakenza kumwaana weyi, anyanta ankanu akenza kukutamuka kwakutuntuka kweyi.

⁴Fumbulaku mesu eyi wutali niniku niniku wumoni, wejima wawuhiya kudi pompesha hiyakwinza kudeyi, anyaneyi amayala hiyakufuma kwakulehi, nianyaneyi awambanda hiyakuyeleka munkondu.

⁵Henohu wakamona, wakatamuka, muchima weyi wakazaala, wakatoheshewa nayalumbama mukaluŋa lwŋi yakabalumukila kudeyi, namaheta anyuza akenza kudeyi.

⁶Izaza dawangameli dakakubuta wi-i, wowu anyana kawangameli amuMidiyani namuEfwa; akafuma kuSheba wejima; akaleta wuru nalibona, akatiya kesha nsaŋu yakushimeka Yehova.

⁷Akakupompeshela yendu yayimuna yakuKedari, niyizamba yanyikoku yakuNebayoti yakakukalakela; yakaya hakameŋa kami chakuyiitija, nakawahisha itala dalubanji lwami.

⁸Akutúuka neyi ivu, neyi atupompa akuya muyisu yawu, hiyanyi?

⁹Chalala yitutu yakanchipilila, kwakasambilaŋahu dehi maatu amaneni aku Tarashishi, kulonda akaleti anyaneyi akayifumishi kwakulehi, nisilivayawu niwuru wawu kumu, kulonda ijina daYehova Nzambi yeyi, naWajila waIsarela, nanochu chakuwahishayi dehi.

¹⁰Mpwembu jeyi akajituŋulula kudi antu akunyuza yacheŋi, anyantajawu akakukalakela, muloŋa nakweteli nanichi chinazuwili, ilaŋa nakutiyilidehi wushona nawuselewa wuwunawani kudami.

¹¹Kuyisu yakumpwembu yeyi kwakekalaŋa kwachashi mafuku ejima. Kwenzelaŋa aku nehi, helamwa ana hela wufuku, kulonda antu akakuletelaŋa maheta akunyuza, nianyanta jawu kumu.

¹²Muza hela wanta wakabula kukukalakela wakajilumuka; eŋa, nyuzoyu yakanoŋa chikupu.

¹³Kulema kwa kuLebanoni wakenza kudeyi, ninyinjunŋa, ninyitondu yasweja nyikabu, hamu nanyitondu yasweja wulelu, kulonda kuwahisha kumalalami, nakalemesha kuwudatilu wanyendu yami.

¹⁴Anyana kanawa akukabishilaŋa akenza nakunoŋamina kudeyi. Antu ejima akudiwilaŋa akabandama niheseki kumadachilu eyi. Akakutenaŋa nawu, ŋanda yaYehova, Ziyona wambala waWajila waIsarela.

¹⁵Eyi muntu alekeluwu, aheleluwu chakwila nimuntu wukuhita mweyeyinehi, nakakubalumuna kwikala kulema kwahaya nyaka, nikuzanajala kwamakipu amavulu amba kavwalikaŋa antu.

¹⁶Waka amwamayeli anyuza, wakaamwa kumayeli awanyanta; wakeluka neyi ami Yehova yami chamwinu cheyi, yami nkúuli yeyi, yami Mukwaŋovu waYakoba.

¹⁷Muwunenunaka hiŋashamu wuru, muchikuŋu nakahiŋishamu siliva, mumutondu nakahiŋisha muwuneŋu, mumalola nakahiŋishamu chikuŋu. Atulama tweyi nakayibalumuna kwikala kuwunda, akwakufutisha akwawu nakayibalu munakwikala kuloŋa.

¹⁸Madombu hiyakayitiya nawa cheŋa mwituŋa deyuku, kukisaŋana nakujilumuna hichakatiyakana mupinza jeyuku. Mpwembujeyi wakajitumba ijina, neyi Wamwinu, yisu yakumpwembu, neyi Kushimeka.

¹⁹Itaŋwa hidakakutoŋekela nawa cheŋi namwaanaku; nikakweji hikakakutoŋekela cheŋi nawa kulonda wumoni mwejuku, Yehova diyi wakekala mwaana weyi wahaya nyaka, Nzambi yeyi diyi wakekala lubanji lweyi.

²⁰Itaŋwa deyi hidakahuma nawa chepuku, nikakweji keyi hikakafwaku, muloŋa Yehova diyi wakekala chejeji cheyi chahaya nyaka, mafuku eyi akudila anamani dehi.

²¹Antu eyi nawa akekala aloŋa ejima, akaswana ituŋa chahaya nyaka, womutayi wunatumbili, womudimu wakumakasami, kulonda lubanji lwami lwakamwekani.

²²Kakehelamu kakabalumuka ikombakaji, wadiŋi wanyanya wakekala muza waŋovu. Ami Yehova yami nakachinyakisha hamwaka wachu.