Read MUKANDA WANZAMBI Isaya 62 Bible Online

Isaya 62 - MUKANDA WANZAMBI bible

Isaya 62

¹Hinukutwesha kumwena nansaŋu yaZiyonaku, hinukutwesha kunooka nansaŋu yaYerusalemaku, chiŋa kuloŋa kwindi kunatamuki dehi tamu-u, niwamwinu windi wunatamuki dehi neyi inoŋu didi nakubutuka.

²Niajentili akamona kuloŋa kweyi, nianyanta ejima akamona kulema kweyi. Nineyi akakutumba ijina dadiha dakukutumba kukanwa kaYehova.

³Eyi wakekala nawa chibaŋula chalubanji muchikasa chaYehova, ninsochi yawanta muchikasa chaNzambi yeyi.

⁴Hiyakakutenaŋa nawa cheŋi, nawu Walekewaku; niituŋa deyi hiyakaditenaŋa anawa cheŋa, nawu Ihembuku; akakutenaŋa nawu Hefwiziba, ituŋa deyi akaditenaŋa nawuBeyula. Muloŋa Yehova nakutiyi kumuchima to-o, niituŋa deyi dakekala dasumbuka.

⁵Chasumbula ŋawu mujiki kudi mukwenzi, dichi chakakusu mbulawu nawa kudi anyaneyi. Chazaŋajalaŋa ayilyala namumbanda akusumbulayi, dichi chakatiyayi Nzambi yeyi kuwaha naneyi.

⁶Eyi Yerusalema hampwembu jeyi nashuhu dehi akwakutalatala, hiyambakamwena hela namwa ana hela nawufukuku. Enu akwakumwanukisha Yehova, bayi munookaku,

⁷bayi mumuno-okesha yenaku, chiŋa nakoleshi dehi Yerusalema, chiŋa nawubalumuni dehi hiwakushimeka hanu hamaseki.

⁸Yehova nasanyiki dehi nachikasa chindi chachidiilu, nasanyiki dehi nachikasa chaŋovu jindi, nindi, Chalala hinakadiisha nawa cheŋa ayilumbu jeyi tidikuyeyuku. Antu akwacheŋi hiyakanwa nawa vinyu yeyi yiwakabakenuku.

⁹Anaaŋuli diwu akadya, hiyakahameka Yehova. Anaaŋuli diwu akayinwa muyipaŋu yakumalalami.

¹⁰Hitenu, hitenu muyisu yakumpwembu. Loŋeshenu njila yawantu; dimenu, dimenu muhaŋa wamukwakwa, nonojolenumu malola. Yinya mwinenu antu mpandelu.

¹¹Tiyenu, Yehova nabidiki dehi kunsa jesekinindi, Mwilenu mwana kaZiyona wamumbanda, nenu, Tala wamwinu weyiwukwinzowu. Tala, wuloku windi wudi nawu, wufwetu windi wunatwaminuku.

¹²Akayitenaŋa nawu Antu ajila, Antu aYehova akúulewa. Akakutenaŋa nawu Wakeŋakeŋewa, Mukala abula kulekawu.