Read MUKANDA WANZAMBI Isaya 8 Bible Online

Isaya 8 - MUKANDA WANZAMBI bible

Isaya 8

¹Yehova hakuŋila nindi, Tambula chuma cheneni chasonekaŋawu, wusonekuhu nsona jakutaŋa antu ejima, neyi, JaMaheri-shalali-hashibazi.

²Hinukutambika niayinsahu ashinshika kulonda ashimuni wunsahu, wowu kapristu Uriya, namwana kaYeberekiya Zekariya.

³Hinukukundama kudi kaprofwetu wamumbanda, yena hakubaaba ivumu, hakuvwalamwana weyala. Yehova hakuŋila nindi, Mutumbi ijina dindi neyi, JaMaheri-shalali-hashi-bazi.

⁴Muloŋa hakelayi mwana wuchidi kanda aheti maanaakutena nindi tata namamaku, maheta amuDamakasa nayuma yakupupaya muSamariya akayitwala kwamwanta wakuAshuri.

⁵Yehova hakuhosha cheŋi nanami,

⁶nindi, Awa antu chanalekuwu meji akuShilowa endaŋa chovu, hiyakuzaŋalala naRezini namwana kaRemaliya;

⁷ichi dinu tiya, Mwanta hakuyiletela meji akuKaloŋa, akweti Ŋovu, amavulu nawa, kafwampi yowu mwanta wakuAshuri nakulema kwindikwejima; wakasumpokela hanyiŋi yindi yejima, wakamotoka chikumu chindichejima;

⁸wakaya muYuda neyi muta; wakasumpoka, wakapandakanamu; wakashika nimunshiŋu; chakatanjikayi mpuula jindi wakenzesha ituŋa deyimudatohela, eyi Emanuweli.

⁹Enu nyuza yawantu, letenu ipumba, akayikotoli kotu kotu; enumatuŋa akwakulehi, tiyililenu wejima wenu; manyekenu akayikotoli kotu-kotu; manyekenu akayikotoli kotu kotu.

¹⁰Kwatenu mpùŋa, akayikaŋesha; hoshenu izu, hidakakolaku; muloŋa Nzambi wudi nanetu.

¹¹Tiyenu chahosheliyi Yehova nanami naŋovu yakubadika nankashi, chanlejeliyi nindi, Bayi wuya mwayaloŋa antu awaku,

¹²nindi, Honsu hakuhoshawu antu awa nawu, Chikuchi chatama, enu kwenu bayi mwilaŋanenu, Chikuchi chatamaku; bayi mutiyaloŋa woma watiyaloŋawu, hela kuzaalaku.

¹³Yehova wamazaza diyi mukujilikaŋa, diyi mukutiyaloŋa woma, diyi mukuzaalaŋa.

¹⁴Diyi wakekalaŋa malala; ilaŋa nyitaŋayonsu yiyedi yawaIsarela akamumona neyi ilola dakuhukana, neyi hilwilola lwakudimbwisha, akwakushakama muYerusalema akamumona aha neyichidiya, aha neyi muhetu wakufwa wena.

¹⁵Amavulu akahukanaku, akadimbuka, akakotoka, akafwa mumuhetu, akayilawula.

¹⁶Kasaku wunsahu, lamikaku nshimbi nachilamiki mukachi kawatumbanji twami.

¹⁷Naka muchiŋilila Yehova waswekaŋa akwamutaŋa waYakoba mesu indi abuli kuyitala, nukumutalilaŋa yena.

¹⁸Tiyenu, ninami nianyana ananyinkiyi Yehova tudi ayinjikijilu, tudi ayihayamisha amuIsarela, yakufuma kudi Yehova wamazaza washakama hampidi yaZiyona.

¹⁹Chakayilawu nawu, Yenu mwakehuli kudi azakukaŋa akishi nikudi atutepa elaŋa nawu, Hoyi, hoyi, nikunyinyita; ilaku neyi, Antu hiyadikuya nakwihula kudi Nzambi yawuku? Komana afu ayiihuli nsaŋu jawamomi?

²⁰Tutalenu kunshimbi nikuwunsahu chi! Neyi hiyakahosha mwaya izu iduku, chalala hiyakamona kuchaku.

²¹Akahitamu chakukabakana, nanzala; chakatiyawu nzala akazuwa, akashiŋa nimwanta wawuni Nzambi yawu; akela atala mwiwulu,

²²atala heseki akamona kwakukalana mwidima hohu, kabwidibwidi kakutiya nikumuchima pati, akayihaŋila mumwidima washishita.