Read MUKANDA WANZAMBI Jeremia 11 Bible Online

Jeremia 11 - MUKANDA WANZAMBI bible

Jeremia 11

¹Izu dakudi Yehova denjili kudi Yeremiya,

²nindi, Tiyenu mazu achitiyaŋenu ichi, wuhoshi nawaYuda nawashakama muYerusalema,

³wuyili neyi, Yehova Nzambi yaIsarela nindi, iyala wukubula kutiya mazu achitiyaŋenu ichi

⁴chinalejeli ankakulula jenu ifuku dinayifumishili mwituŋa daEjipitu muluteŋi lwachikuŋu, nami, Ovwahilenu izu dami, mwilumu, mwili mwejima munayilejeli kulonda mwikali antu ami, ninami niikali Nzambi yenu,

⁵kulonda nikoleshi kusanyika kunasanyikilili ankakulula jenu, nami niyinki ituŋa datuloŋa twamayeli nawuchi, neyi chimunamoni lelu, iyala wukubula kutiya mazu achitiyaŋenu ichi ekali washiŋewa. Ami hinukwakula nami, Mwomwenomu, eyi Yehova.

⁶Yehova hakuŋila nindi, Bidikaku mazu awa ejima munyikala yamuYuda, nimunyikwakwa yamuYerusalema, neyi, Tiyenu mazu achitiyaŋenu ichi, mwilumu.

⁷Muloŋa ami nayihampumwinini nankashi ankakulula jenu ifuku dinayikandwishili mwituŋa daEjipitu, hampumwine-e nikwifuku dalelu, chakumenekaŋa budidi nakuyi hampumwina, nami, Ovwahilenu izu dami.

⁸Hela chochu, hiyovwahilili hela kutegelekaku matu awuku, wejima wawu endeli kwawu mwaya kuchinchika kwanyichima yawu yatama. Dichi chinayishikijilili mazu ejima achitiyanenu ichi inayilejeli kwila, abulili kwilawu.

⁹Yehova hakuŋila nindi, Chikuchi chanakwatuwu aYuda nawashakama muYerusalema chinatiyakani.

¹⁰Anafuntili dehi kukuluwaluwa kwaluwilaŋawu ankakulula jawu alekelaŋa kutiya mazu ami, analondeli dehi mwaya akishi kulonda kuyipesha. Mutaŋa waIsarela namutaŋa waYuda anajahi dehi chitiyaŋenu chami chinatiyageni nawankakulula jawu.

¹¹Dichi Yehova nahoshi nindi, Tiyenu, nukuyiletela yatama yakakaŋanya kuleyawu. Akambilela, ilaŋa ami hinakayitiyililaku.

¹²Henohu nyikala yamuYuda nawashakama muYerusalema akaya nakubilela akishi ochelelaŋawu insensi; ilaŋa hiyakayamwina nihanti mwifuku dakamonawu yatamaku.

¹³Muloŋa eyi Yuda, inwashikila nyikala yeyi dimu mwashika niakishi eyi; mwashikila nyikwakwa yamuYerusalema dimu nawa mumunatuŋili tumeŋa twachuma chikweti ninsonyi, twotumeŋa twakwochela Bayali insensi.

¹⁴Dichi bayi wuyilombela antu awa hela kuyikanjikila izu dakubilela, hela dakuyilombelaku, muloŋa hakamonawu yatama hiyakabilela kudami, ami kwami hinakayitiyaku.

¹⁵Wami nakeŋa wukwetidi nawa mwakwila mwitala dami? Yena nabajami dehi nawantu amavulu, nimbiji yajila yinakufumi dehi. Chiwelaŋa yatama hiwukuluŋa nikuluŋa.

¹⁶Yehova wakutumbili ijina nindi, Yeyi muolive wutuuta wawaha dehi nanyikabu yayiwahi. Nabutuluhu kesi nalushindu lwepumba deneni, nyitayi yawu yinakotoki dehi.

¹⁷Mulona Yehova wamazaza wakutumbili nakushimwini dehi yatama, nanoyu yatama yanadikokeluwu akwamutupa waIsarela nawakwamutupa wa Yuda, hananvulokuwu kulonda nizuwi nainsensi yanashitiluwu Bayali.

¹⁸Yehova waŋilukishilumu, ninami hinukuchiluka; hiwukunleja niyelilaŋawu.

¹⁹Ami nadiŋi neyi kana kamukoku kadiwundila zo-o kadi nakutwalawu nakujaha. Hinelukili nami adi nakunkasila yuma yatamaku, nawu, Tukisaŋanenu mutondu kumu nanyikabu yawu, tumufumishuhu afumi mwituŋa dawamomi, kulonda abuli kwanuka nawa cheŋi ijina dindi.

²⁰Ilaŋa eyi Yehova wamazaza wasompeshaŋa chaloŋa, wesekaŋa nyichima yawantu mumavumu, aŋitŋi kumona chiwakaditenda hadi wena; muloŋa nakuleji dehi nsaŋu yami.

²¹Dichi Yehova nateni dehi antu akuAnatoti anafwili kunjaha, adi nakwila nawu, Bayi wakaprofwetaŋa mwijina daYehovaku wakenza kafwila kuchikasa chetu;

²²dichi Yehova wamazazanindi, Tiyenu, nukuyihempula; anyikwenzi akafwanampo kuya kabali; anyanawu amayala nawambanda akafwa nanzala;

²³hikwakashala mwinawu niwumuku, muloŋa ami nakaletela antu akuAnatoti yuma yatama, kafwampi wowu mwaka wakuyihempula.