Read MUKANDA WANZAMBI Jeremia 12 Bible Online

Jeremia 12 - MUKANDA WANZAMBI bible

Jeremia 12

¹Eyi Yehova, chinakutopekaŋa nakutopekaŋa tuhu, saŋa waloŋela kweyi; hela chochu, nakeŋi kuhosha neyi muloŋa iwu, nami indi muntu watama wamwenaŋadi kuwaha munjila yindi? Indi antu ejima akwatilaŋa akwawu makasu atama ashakaminaŋadi chachiwahi?

²Wunayitumbi dehi kweyi, eŋa, anashimati dehi ninyiji; awa akukula awa, eŋa, hiyakusoŋa ninyikabu; mukanwa kawu eyi wudi kwakwihi, munyichima yawu wudi kwakulehi.

³Hakwila eyi Yehova waloŋalu kweyi; wanmonaŋa, wesekaŋa muchima wami chiwekala kudeyi; yitulumoni kulonda ayijahi, yijilikili ifuku dakuyijaha.

⁴Ituŋa didishonaŋa tuhu, niyisakola yamwituŋa dejima yilepukaŋa tuhu kushika nikumwakanyi? Anyama ananoŋi, niatujila, nakutama kwawantu ashakamamu, muloŋa elili nawu, Hakamona kutwakakumishilaku.

⁵Wuzeya nalufuchi lwakutemuka nawakwakwenda hamaseki, indi akwakwenda hatuwalu wakatwesha kweseka nawu ŋahi? Mwituŋa damwena diwakuhwelela wudi chachiwahi, indi mwitu daYodana wakela ŋahi?

⁶Muloŋa hela ana kweyi, niakwamutaŋa watata yeyi, hela wena anakukwatili dehi makasu, hela wena anakubidiki dehi; bayi wuyitiyaku, hela akuhosha naneyi mazu amawahi.

⁷Kwitala dami nalekuku dehi, wuswana wami nawushiyi dehi. Wami nakeŋa mumuchima wami namuhani kudi ayilumbu jindi.

⁸Wuswana wami wunambalumukili dehi neyi namutupa wamumpata, hakumbalokela chibwaji; dichi chinamuheli kwami.

⁹Dichi wuswana wami wambalumu-kila dehi neyi kajila kamaasamaasa kakwatanaŋa, tahindi? Atujila akwata-naŋa amunyeŋumuka dehi, tahindi? Yenu mwakapompeshi anyama amumpata ejima, yiletenu adyi.

¹⁰Atubiŋa amavulu anakisaŋani dehi itempa dami danyivinyu, anadatoli dehi iseka dami nanyendu yawu, iseka dami dadiwahi anadibalumuni dehi neyi isaŋa damukunkulwayi.

¹¹Anadibalumuni dehi kwamahembi hohu; daneŋaŋa kudami chidela dehi kwamahembi; ituŋa dejima dela dehi kwamahembi muloŋa hikudi muntu nachishi kumuchimaku.

¹²Akwakupupa anenzi dehi hayinaŋanaŋa yankumbu yamwisaŋa yejima; muloŋa mpoku yaYehova yakabali yidi nakudya ho-o, kufumisha kunsa yimu yetuŋa, ndo nikunsa vikwawu yetuŋa; kwosi muntu namoni kumwenaku.

¹³Kudima anadimi tidiku, anaaŋuli nyiŋa; anadikabakeshi tuhu, niniyi yanamonuwu nehi; nyikabu yenu mwakayitiya nsonyi, muloŋa wakuzuwa kwaYehova kwasweja.

¹⁴Akwetu twadikuma nawu atama ejima akunkaŋa kuwuswana wunaswanishi antu ami aIsarela, Yehova nayiteni chakuyizuwila nindi, Tiyenu, nakayibwita mwituŋa dawu, niakwamutaŋa waYuda nakayibwita mukachi kawu.

¹⁵Chinakela nayibwiti dehi, nakafunta cheŋi nakuyitiyila wushona; nakayileta cheŋi, iwu kuwuswana windi, iwu kuwuswana windi, iwu kumpata yindi, iwu kumpata yindi.

¹⁶Chakadizawu chachiwahi mwelaŋawu antu ami mwakusanyika ijina dami, nakwila nawu, Chahandayi Yehova kwaamu, neyi china chalejeluwu antu ami kusanyika Bayali, henohu nakayitupisha mukachi kawantu ami.

¹⁷Ilaŋa neyi kwonti kwawu kutiya, muza owu nakawubwita kubwita kwakukisaŋana. Dimu mwanahoshiyi Yehova.