Read MUKANDA WANZAMBI Jeremia 13 Bible Online

Jeremia 13 - MUKANDA WANZAMBI bible

Jeremia 13

¹Yehova waŋilili nindi, Yaku wakalandi muya wehina dadiwahi, wakawuvwali mumbunda yeyi, bayi wakawishamu mejuku.

²Dichi nalandili muya mwomwaya izu daYehova, nawuvweli mumbunda yami.

³Izu daYehova denjili kudami kamuchiyedi,

⁴nindi, Nonaku muya wunalandi wudi mumbunda yeyi, wunyamuki, wuyi kuYufurati, wakawusweki mumpaku yelola.

⁵Dichi nayili, nawuswekeli kuYufurati mwanlejeli Yehova.

⁶Chimwelili munahiti dehi mafuku amavulu, Yehova hakuŋila nindi, Nyamukaku, wuyi kuYufurati, wakanonuku muya wuna wunakulejeli kusweka kwenoku.

⁷Hinukuya kuYufurati, hinukupunda, hinukunona muya kunawuswekeli; kutala muya watama dehi, hiwukweti nawa cheŋi mudimuku.

⁸Izu daYehova hidikwinza kudami,

⁹nindi, Yehova nahoshi nindi, Dimu nukutamishila wanta wanadinkuwu aYuda, niwanta weneni wanadinkuwu aIsarela.

¹⁰Antu awa atama alekaŋa kutiya mazu ami, endaŋa mukuchinchika kwanyichima yawu, analondeli mwaya akishi akayipeshi nakudifukula kudi wena, akekala neyi muya iwu wakadi nimudimu.

¹¹Yehova nindi, chalamata muya mumbunda yamuntu, dimu munalamatishi akwamutaŋa waIsarela ejima, niakwamutaŋa waYuda ejima anlamati ami, kulonda ekali antu ami ejina, akushimeka, alubanji; ilaŋa wena kwonti kwawu kutiya.

¹²Dichi kahoshi nawu izu idi, neyi, Yehova Nzambi yaIsarela nahoshi nindi, Nswaha jejima jakenzala navinyu; wena akakwila nawu, Ochu chakenzala nswaha jejima navinyu tunabuli kwilukamu?

¹³Henohu wakayila neyi, Yehova nahoshi nindi, Antu ejima ashakama mwituŋidi, wowu anyanta ashakama hetanda daDavidi dawanta, niatupristu, niatuprofwetu, niantu ejima ashakama muYerusalema nakayinzesha mbe nakusheta.

¹⁴Yehova nindi, Nukwila nikwata iwu nŋipula nachu mukwawu, nikwata atata jawantu nŋipula nachu anyana. Hinukutiya luwi, hela kwanakena, hela kutiya wushona wakuleka kuyijilumunaku.

¹⁵Tiyenu, shenu matu enu kunu; bayi mudinka wantaku, muloŋa Yehova nahoshi dehi.

¹⁶Mulemeshenu Yehova Nzambi yenu hachidiyi kanda aleti mwidima, ninyendu yenu kanda yihukani hampidi jakabwidibwidi, himukwilenu muchidi kutalila kucha yena hakukubalumuna hiwulelu wakufwa, hakukubalumuna himwidima wabwi-i.

¹⁷Neyi kwonti kwenu kuchitiya, muchima wami wukudilila kumbeŋu wanta wenu wumunadinki; mesu ami akadila nankashi, akapolomoka madilu, muloŋa mukanka wanyikoku yaYehova anawukwati wukoli.

¹⁸Kamwili mwanta nimama yamwanta neyi, Dizozenu, shakamenu heseki; muloŋa makonku enu awanta anafumi dehi, chochibaŋula chenu chadiŋi chalubanji.

¹⁹Nyikala yakukabeta kakuchidiilu ayenzela dehi, hikudi wakuyenzululaku; aYuda ayitwala dehi muwukoli wejima wawu; ayitwala dehi chikupu muwukoli.

²⁰Fumbulenu mesu mutali akwinza kukabeta kakuchimunswa; mukanka weyi wanyikoku wakwinkeluwu wudi kudihi? O mukanka weyi chiwawahili!

²¹Chakabalumunayi adiŋi amabwambu jeyi hiyakwikala anyanta jeyi, wakahosha neyidi? Yeyi wayilejelaŋa kudikaŋa naneyi. Yihuŋu yidi neyi nyisoŋu yamumbanda wudi nakuvwala mwana hiyakakuwanaku?

²²Neyi wakahosha mumuchima weyi neyi, Yumiyi yinanwani hanka? chanakuvúuluwu mahineyi, chanakukwatuwu kutupokosu tweyi naŋovu, chinakuwani hakusweja kuluwa.

²³KaEtiyopiya watweshaŋa kubalumuna ikowa dindi? Hela chisumpa watweshaŋa kubalumuna mabeka indi, tahindi? Komana ninenu nawa mwamba kela yayiwahi, enu mwenjilila dehi kwila yatama.

²⁴Dichi nakayipalagesha mwa-mwa, neyi chafumaŋa ntotu nampepela yikufuma kwisaŋa.

²⁵Yehova nindi, Dimu nakusakwila dehi nachinjikijilu, didi iseka deyi dinakwesekeli, muloŋa wunanvulameni, wunakuhweleli yakutwamba.

²⁶Dichi nawa chinakakuvúulila mahineyi eyi aweni wutalaŋa, niwusonyi weyi wakamwekana.

²⁷Yishimashima yeyi nayimoni dehi, wowu mawuvumbi eyi nikutambeka kuwatambekaŋamba nda, nikubajama kwawuvumbi weyi, hamapidi amumpata. Yayo eyi Yerusalema! Kwonti kweyi kukutookesha. Chakashika nikumwakanyi?