Read MUKANDA WANZAMBI Jeremia 14 Bible Online

Jeremia 14 - MUKANDA WANZAMBI bible

Jeremia 14

¹Izu daYehova dakutena chaaŋa, denjili kudi Yeremiya.

²Yuda hakuneŋa, yisu yakumpwembu yawu hiyikuzeelazeela, antu hiyakuvwala yiyila, hiyakushakama hamaseki; nyiteti yamuYerusalema hiyi kukanduka kwiwulu.

³Ayilolu jawu hiyakutemesha anyana kumeji; hiyakuya kumakela, kuwana meji nehi; hiyakufunta nansaba jawu jamukunkulwayi; hiyakutiya nsonyi, hiyakubaya, hiyakubuta nikunyitu yawu

⁴Akwakudima hiyakutiya nsonyi, hiyakubuta kunyitu yawu, muloŋa isekidabaloka dehi nanichi chimunabuli kunoka nvula mwituŋa.

⁵Eŋa, mukaji wankayi wudi mumpata chakusemayi, hakushiya mwanindi muloŋa wákubula matahu.

⁶Ayimbulu amwisaŋa hiyakwimana hayinaŋana ŋayankumbu, hiyakuhaakwila neyi nyumbu; muloŋa jakwona jinayikalili; hiyakutiya hamesu bwi muloŋa wákubula mafu.

⁷Eyi Yehova, hela kuluwaluwa kwetu kudi nakutushimuna wunsahu wakututanyisha, kumina dakutukalakela nansaŋu yejina deyi; muloŋa kuselumuka kutwaselumukilaŋa hanyima kunavuli; tunakuvulumuni.

⁸Yeyi chikuhwelela chawaIsarela, yeyi chamwinu chawu chamumwaka wayihuŋu, wukwikaliladi mwituŋa neyi mwenyi, neyi mukwakwenda wukusenuka munjila chakukama wufuku wumu?

⁹Wukwikaliladi neyi iyala nakumini dakudihayamina, neyi chilobu nakaŋanyi kwamwina akwawu? Kutoŋa eyi Yehova wudi mukachi ketu, ninetu atutumba dehi ijina deyi. Bayi wutushiyaku.

¹⁰Yehova nahoshi nawantu awa, nindi, Dichi chanakeŋuwu kwawu kutambatamba, hiyanalekeshi nyendu yawuku; dihanafumi kubula kuyitiya kuwaha kudi Yehova. Ichi dinu wukwanuka kuluwa kwawu, wukuhempula nshidi jawu.

¹¹Yehova hakuŋila nindi, Bayi wulombela antu awa, neyi amoni kuwahaku.

¹²Chakuji ŋawu nanzala hinukutiya nyiteti yawuku. Chakulambulawu nyilambu yakushita, ninyilambu yawuŋa, hinakayitiya kuwahaku. Nukuyinogesha kwami nampoku yakabali ninzala, niyipupu.

¹³Hinukwila nami, Ala, Mwanta Yehova! Tiya, atuprofwetu adi nakuyila nawu, Himwakamona mpoku yakabaluku, hela nzala himwakayitiyaku. Nawu ami Yehova nakayinkaŋa kumwena kwalala kwokwenakunu.

¹⁴Yehova hakuŋila nindi, Atuprofwetu adi nakuprofweta yakutwamba mwijina dami. Hinayitemesheli kwamuku, hela kuyileja hinayilejeli kwamuku, hela kuhosha hinahosheli nawuku. Adi nakuyiprofwetela chimwenu chakutwamba, chakuhoŋa, chuma chamukunkulwayi, kudimbana kwamunyichima yawu awenawu.

¹⁵Tiyenu chuma chanateneniyi Yehova atuprofwetu aprofwetaŋa mwijina dami, ákubula kutemesha kudami, adi nakwila nawu, Mpoku yakabali nanzala hiyakekala mwituŋa dinuku; nindi, Mpoku yakabali nanzala yoyakanoŋa wuna chuwena atuprofwetu owu.

¹⁶Antu adi nakuprofwete lawu akayumbila munyikwakwa yamuYerusalema nansaŋu yanzala nampoku yakabali, hiyakamona kuyijiikaku, hela wena, hela aŋodi jawu, hela anyanawu amayala, hela anyanawu awambanda; muloŋa ami nakayi ichila kutama kwawu awenawu.

¹⁷Tiya izu diwakayila, kayili neyi, Mesu ami apolomoki madilu niwufuku nimwaana, bayi aketukaku, muloŋa mwana kawantaŋa jami wamujiki anamukotoli kukotoka kwasweja, chitu chasweja kusumana nankashi.

¹⁸Nami niidiki mumpata, kutala ajahawu dehi nampoku yakabali awa, nami niiŋili mumukala, kutala akufwa nzala awa! Muloŋa nikaprofwetu nikapristu adi nakudikimbukila tuhu mwituŋa, hiyeluka nichumaku.

¹⁹AYuda wunayileki dehi nikupu, tahindi? Ziyona wunamutiyi dehi kumuchima bwi-i, tahindi? Wunatwetelidi chakadi nimwakutúukila? Twatalilili kumwena, hikwenjili kuwahaku; twatalilili mpinji yakutúuka, komana kudi kulokola kwamukanwa!

²⁰Eyi Yehova tunetŋi kutama kwetu nikuluwa kwawankakulula jetu, muloŋa tunakuvulumuni dehi.

²¹Bayi wutúumbaku, toŋaku ijina deyi. Bayi wusawisha itanda dakulema kweyuku. Anukaku, bayi wujaha chitiyaŋenu cheyi chiwatiyaŋeni nanetuku.

²²Kuyuma yakuhemesha yanyuza yawantu kudi chanokeshaŋa nvula? Iwulu datweshaŋa kudinokesha nvula hela jawo-wo-wo, tahindi? Eyi Yehova Nzambi yetu hiyeyuku? Dichi twatalilaŋa kudeyi, muloŋa eyi yeyi wuneli yuma yejimiyi.