Read MUKANDA WANZAMBI Jeremia 17 Bible Online

Jeremia 17 - MUKANDA WANZAMBI bible

Jeremia 17

¹Nshidi yawaYuda anayisoneki nansonekesu yachikuŋu nansa yadiyamondi. Anayisoneki hamalola awubasa anyichima yawu, nihanseŋu jatumeŋa twenu,

²iku anyanawu adi nakwanuka tumeŋa twawu ninyiyombu yawu kunyitondu yituuta hamapidi amalehi.

³Eyi mpidi yami yidi mumpata, nukuhana maheteyi niyuma yeyi yalema yejima yiikali yakubuwa tuhu, niyinaŋanaŋa yeyi, mwahita ŋinza jeyi jejima, muloŋa wanshidi.

⁴Hakwila eyi, yeyi aweni kwaamu, wakaketuka kuwuswana weyi nakwinkeli. Ami nakakwinka mudimu wakukalakela ayilumbu jeyi mwituŋa diwabula kwiluka, muloŋa munabutuli dehi kesi mukuzuwa kwami, kesi kakwila bidime-e haya nyaka.

⁵Yehova nahoshi nindi, Muntu wakuhwelela mukwawu muntu, wadikoleshela kumujimba, wukweti muchima wakwambuka kudi Yehova, washiŋewa.

⁶Muloŋa yena wakekala neyi kamusasachi kamuchinkalampata, chiyakenza yayiwahi hakayimonaku, wakashakama kwindi hakaweŋeleŋi homa chau mumpata yela kwamuŋwa hohu, yakadi kushakama antu.

⁷Muntu wakuhwelela Yehova, wakwila chikuhwelela chindi yowu Yehova hohu, wakooleka.

⁸Muloŋa yena wakekala neyi mutondu wakutumba kumeji, watanjika nyiji yindi kukaloŋa; chikukwinza nkanza hakatiya womaku, mafu indi saŋa atúutilawu zo-o. Hamwaka wayaaŋa hakaakamaku, hakaleka kusoŋa nyikabuku.

⁹Muchima wasweja kudimbana, wadimbana chakubadika yuma yejima, wasweja nikukata, wukutwesha kuwiluka hinyi?

¹⁰Ami Yehova yami nasandojolaŋa mumuchima, yami nesekaŋa mwaya yitoŋojoka, kulonda niyinki antu ejima yashikila muyuma yakoŋaŋawu, yashikila munyikabu yayuma yelaŋawu.

¹¹Chakuŋulaŋayi gwadi anyana akadi kuteta yena, dichi chadiyi nimuntu wahetaŋa maheta ambala awakwawu, akamufuma hakachi kamafuku indi, hakukuminina kwindi wakekala chisupi.

¹²Itanda dawanta dalema, dashawu hewulu kufumisha kutachi, diku kumalaletu.

¹³Eyi Yehova, chikuhwelela chawaIsarela, antu ejima akukuleka akatiya nsonyi. Antu akafuma kudami akayisoneka hamaseki muloŋa analeki dehi Yehova, kaseloki kameji amomi.

¹⁴Ŋuki eyi Yehova, nakakola. Ŋamwini, nakahanda, muloŋa eyi yeyi nashimeka.

¹⁵Muloŋadi nakuŋila nawu, Izu daYehova didi kudihi? Dinzi dinu.

¹⁶Ami kwami hinanyakali kufuma kuwubiŋa wamunyima yeyuku; ifuku dakumona kukala hinadikeŋi kwamuku; eyi aweni wuneluki. Chuma chafumini kunyivumbu yami chadiŋi kumesu eyi.

¹⁷Bayi wikala mukwakunfwisha mutentuku. Mwakubatami nami mwifuku dakala mwomudeyi.

¹⁸Ánkabishaŋa tiyi nsonyi, ami bayi nitiya nsonyuku. Wena akami, ami bayi nakamaku. Yileteli ifuku ayatama, yijilumuni chakuyijilumuna kayedi.

¹⁹Yehova hakuŋila nindi, Yaku wakemani muchisu champwembu yawanyana kawantu ami, cheŋililaŋawu anyanta awaYuda, chochedikilaŋawu nawa, nimuyisu yejima yampwembu yaYerusalema;

²⁰wakayili neyi, Enu anyanta awaYuda, ninenu aYuda ejima, ninenu ejima mwashakama muYerusalema, mweŋililaŋa muyisu iyi, tiyenu izu daYehova;

²¹Yehova nahoshi nindi, Babalenu, kusendayiteli hefuku dasabata hela kuyiŋŋa muyisu yampwembu yaYerusalema, chinjila.

²²Kwidisha yiteli mumatalenu hefuku dasabata, hela kukoŋa mudimu, chinjila. Chiŋa mujilikaŋa ifuku dasabata mwomunalejeli ankakulula jenu.

²³Ilaŋa wena kutiya, hela kuteŋelekaku matu awu nehi, achini chikishili kwawu nshiŋu jawu kulonda abuli kutiya, abuli kuyileja.

²⁴Yehova nindi, Neyi mwakatiyilila chachiwahi kudami nakubula kwiŋija yiteli muyisu yampwembu yamukaliwu hefuku dasabata, himukujilika ifuku dasabata, nikukoŋelamu nyidimu nehi,

²⁵muyisu yampwembu yamukala iwu mwakeŋa ilaŋa anyanta nawatulamba, akashakama hetanda daDavidi dawanta, akendela mumakálu nihatuwalu, niwena nitulamba twawu, nawaYuda nawakushakama muYerusalema, nimukaliwu wakashakama haya nyaka.

²⁶Akafuma munyikala yamuYuda, nikwatuŋ atuŋawu kwakwihi naYerusalema, nimwituŋa daBenjamini, nikunkulu, nikumapidi, nikukabeta kakuchidiilu akaletaleta nyilambu yakushita, niyimuna yakuketulaŋa, ninyilambu yawuŋa, nilibona, akaletaleta niyakusakilila nachu, kwitala daYehova.

²⁷Neyi kwonti kwenu kutiyilila kudami chakujilika ifuku dasabata, mubuli kusendayiteli nakwijila nayu muyisu yampwembu yaYerusalema hefuku dasabata, ami nakabutula kesi muyisu yamukala iwu, kakadya matala amuYerusalema amaneni amawahi, hikakajimaku.