Read MUKANDA WANZAMBI Jeremia 19 Bible Online

Jeremia 19 - MUKANDA WANZAMBI bible

Jeremia 19

¹Yehova wahosheli nindi, Yaku wakalandi nsaba yewumba yakwema kudi kagemi, wakatambiki awakulumpi awantu, niakulumpi awatupristu,

²wakediki, wakayi kuchinekineki chamwana kaHinomi chidi kuwiŋililu wakuchisu champwembu chaHarisiti, wakashimuni kwenoku mazu inakakuleja.

³Wakeli neyi, Enu anyanta awaYuda, ninenu mwashakama muYerusalema, tiyenu izu daYehova; Yehova wamazaza, Nzambi yaIsarela, nahoshi nindi, Tiyenu, henahanu nakaletelahu yatama, yakwila muntu chakuyitiyayi mumatu indi mwakashoma.

⁴Muloŋa wena ananleki dehi, hanu anabalumunuhu dehi neyi kwiji hawenyi, anocheluhu akishi insensi, akishi abulili kwilukawu wena, hela ankakulula jawu, hela anyanta jawaYuda; anenzeshuhu dehi mashi awantu akadi nyiloŋa;

⁵anatuni dehi yinaŋanaŋa yaBayali kulonda kwocha anyanawu amayala mukesi, ekali nyilambu yakumushitila Bayali; chuma chinabulili kuyileja, hela kuchitena, chabulili kwinza nikumuchima wami.

⁶Dichi dinu tiyenu, Yehova nindi, Kwakenza mafuku akabula kutenawu hanu nawu, HaTofweti, hela nawu, Hachinekineki chamwana kaHinomi, ilaŋa akatena nawu, Hachinekineki chaKujahana.

⁷Mpúŋa jakwatiluwu aYuda nawakwaYerusalema nakajimwaŋila hanu; nakayidimbwisha nampoku yakabali kumesu awayilumbu jawu, nikudi antu akukeŋa kuyijaha; yibimbi yawu nakayihana yakekali mbiji yakudya atujila ahaluzwizu nianyama ahamaseki.

⁸Mukaliwu nakawubalumuna wikali wakuhayamewa niwakuyiŋilewaŋa, antu ejima akahitaŋaku akahayama, akayiŋila nansaŋu jayipupu yawu yejima.

⁹Nakayidiisha mbiji yawanyanawu amayala, nimbiji yawanyanawu awambanda, wejima wawu akadya mbiji yawamabwambu jawu, nakukuchika kwakayikuchikawu, nikukala kwakayimweshawu kudi ayilumbu jawu akakeŋa kuyijaha.

¹⁰Henohu wakafumpa nsaba kumesu awantu wakaya nawu,

¹¹wakayili neyi, Yehova wamazaza nahoshi nindi, Chenichi dichi nakafumpa antu awa nimukaliwu, neyi chafumpaŋawu nsaba yakagemi yakaŋanyaloŋawu kunuŋa cheŋi; akajiika antu muTofweti, jiike-e kwakakaŋanya nikwakujiika antu.

¹²Yehova nindi, Tiyenu chinakela henahanu, chinakayila ashakamahu, mukaliwu nakawila neyi Tofweti;

¹³matala amuYerusalema, nimatala awanyanta awaYuda anatamishuwu, wowu matala ejima akweti ntuŋu janocheluwu yileŋaleŋa yamwiwulu yejima insensi, janahuŋunwinuwu akishi nyilambu yakuhuŋununa, akekala neyi hanu haTofweti.

¹⁴Yeremiya hakufuma kuTofweti kwamutemesheluwu kudi Yehova kuprofweta, hakwimana muchipaŋu chakwitala daYehova,

¹⁵hakuyila antu ejima nindi, Yehova wamazaza, Nzambi yaIsarela, nahoshi nindi, Tiyenu, ŋandiyi ninyikala yayu yejima nakayiletela yuma yatama yejima yinayiteneni, nanochu chachinchikishiluwu nshiŋu jawu kulonda abuli kutiya mazu ami.