Read MUKANDA WANZAMBI Jeremia 2 Bible Online

Jeremia 2 - MUKANDA WANZAMBI bible

Jeremia 2

¹Izu daYehova denjili kudami,

²nindi, Yaku wakabileli kumatuawa kwaYerusalema, neyi, Yehova nindi, Nakwanukili haluwi lwahawaŋadima weyi, nikukeŋa kwaha mafuku nakusumbwili, chiwanilondeli mwisaŋa mwituŋa daka ikudima.

³Isarela wadiŋi wamujilila Yehova, diyi yakudya yindi yatachi. Antu ejima akumudya akatanya kutama kwakayiwana. Dimu mwanahoshiyi Yehova.

⁴Enu akwamutaŋa waYakoba, ninenu yisaka yakumutaŋa waIsarela yejima, tiyenu izu daYehova.

⁵Yehova nindi, Kaheŋanyi kanamonuwu ankakulula jenu mudami mwaka ayi kwakulehi nanami, mwaka alondeli yuma yakuhemesha, mwaka abalumuki kwika la antu akuhemesha?

⁶Abuli kuhoshahu tuhu nawu, Yehova watu fumishili mwituŋa daEjipitu, watulombwelapa mwisapa, mwituŋa dela niyana nimena, mwituŋa dakadi meji, dawulelu wakufwa, mwituŋa dakahitaŋa muntu, dakasha kamaŋa muntu, wudi kudihi?

⁷Nayileteli mwituŋa dasweja kudya nami mudyaloŋa nyika buye kalamu, niyuma ya yiwahi yekalamu; enuchimu nepilumu himukuta mishaituŋadami, wuswana wami himukuwu balumuna neyi chishi mashima.

⁸Atupristu kwila nawu, Yehova wudi kudihi nehi. Adiŋa nakukwata kwata kunshimbi kuŋilu ka nehi. Atubipa nawa hiyakuni motoka, atuprofwe tuhi yakuprofweta mwaBayali, hiya kulondela yuma yabulapa kuwahisha antu.

⁹Yehova nindi, Dichi ami nichidi kukonkojola nenu, nukukonkojolaŋa nawa nawezukulu enu.

¹⁰Hitenu tuhu kuyitutu yakuKitimi mutali; temeshenu antu kuKedari, mutali chachiwahi, mutali neyi kudi chuma chidi neyi ichi.

¹¹Kuduhu muza wunabalumunuhu dehi akishi awu? kutoŋa wena hiNzambuku. Hakwila antu ami anabalumuni kulema kwawu, anahiŋishumu chabulaŋa kuwahisha.

¹²Yehova nindi, Enu mawulu, hayamenu chumichi, tiyenu woma nankashi, ikalenu wunka chikupu.

¹³Muloŋa antu ami anakoŋi yuma yatama yiyedi. Ananlekami kaseloki kameji amomi, anadiŋundili mashimawu, mashima abaloka akashakamaŋa meji.

¹⁴Isarela hinduŋu tahindi? Hindugu wakuvwalikila mwitala, tahindi? Indi amukwatilaŋadi?

¹⁵Nyenzi yanyitupa yinamubulumini, yina mubwazu mukili; ituŋa dindi dineli dehi chihembi, nyikala yindi ayocha dehi, himwashakama nawa nimuntuku.

¹⁶Anyana kaNofwi naTapanesi anakubaluli mwishina danamutu.

¹⁷Chumichi hiwunadi mweshichu eyi awenuku? Hichinafumi hakuleka Yehova Nzambi yeyi wakulombweli munjilaku?

¹⁸Omu munjila yakuya kuEjipitu wukwetumu nsagwinyi, mwaka wunwi meji amuShihori? Hela omu munjila yakuya kuAshuri wukwetumu nsagwinyi, mwaka wunwi meji amuluKaloŋa?

¹⁹Kutama kweyeyi aweni kwokwakakubabesha, kuselumuka kweyi kuwaselumukilaŋa hanyima kwokwakakuhoshola. Ilukaku dinu chiwunaleki Yehova Nzambi yeyi, mumuchima weyi mwosi kuntiya womaku, chela nikutama nikulula. Dimu mwanahoshiyi Mwanta Yehova wamazaza.

²⁰Muloŋa hanyaka nakotweli mpanda yeyi, naketwili nyonji yeyi. Eyi welili neyi, Kwonti kwami kukalakala; muloŋa wabandamini nakwila wuvumbi hampidi jajilehi jejima, nimumashina anyitondu yituuta yejima.

²¹Kutoŋa chinakutumbili wadipi muvinyu walala, mbutu yalumbuluka chikupu. Munabalumuki nahi kudami kwikala nyitombu yasawuka yamubuŋu wacheŋi

²²Mwanta Yehova nindi, Hela wakawela nakapofu, hela wakavulisha nankashi njapawu, kuluwa kweyi saŋa kweliyila kumesu ami.

²³Indi eyi wukutwesha kuhosha ŋahi, neyi, Ami hinaditamishuku, ami hinalondeli mwaBayaluku? Tala tuhu njila yeyi yidi muchinekineki, ilukaku chiwuneli. Wudi neyi nŋameli walufuchi wahitaŋa munjila jindi.

²⁴Wudi neyi chimbulu wamwisaŋa wenjilila dehi mwisaŋa, wahumbikaŋa ŋusha, hakuya mwonsu mwanakeŋiyi; chakushikayi haluhehu akutwesha kumufuntishamu kudinyi? Antu ejima akumukeŋakeŋa hiyakadikabakeshaku; akamuwana hakaweji kindi.

²⁵Hembaku mwendu weyi wubuli kushalahu kuvwala masapatu, hembaku hanyidiwu yeyi wubuli kutiya mpwila. Ilaŋa eyi welili neyi, Jinankaŋi dehi. Eŋa, ami nakeŋi dehi antu akwacheŋi, diwu nukulondelaŋa kwami.

²⁶Chatiyaloŋayi ikombi nsonyi hamuwanaŋawu, dichi chanatiyiyi mutaŋa waIsarela nsonyi, niwena, nianyanta jawu, nitulamba twawu, nitupristu twawu, nituprofwetu twawu;

²⁷elaga mutondu nawu, Yeyi tata. Elaga ilola nawu, Yeyi wanvweli; wena anantalishi dehi nyima, kuntalisha mesu nehi. Kwinza hamba kamonawu yatama amba kela nawu, Nyamukaku wutwamwini.

²⁸Indi akishi eyi iwuneli adihi? Anyamuki tutali neyi akukwamwina hiwunamoni yatama. Muloŋa mwavulila nyikala yeyi dimu mwekalila niakishi eyi, eyi Yuda.

²⁹Yehova nindi, Mudi nakukonkojoladi nanami? Munanmotoki dehi wejima wenu.

³⁰Nadikabakeshi tuhu nakweta anyanenu, kwonti kwawu kuyifumba. Mpoku jenu jatubali jojinadyi tuprofwetu twenu neyi namutupawa chidanyi.

³¹Enu akwekiŋu idi talenu izu daYehova, Ami ananmoni kudi aIsarela nawu niisaŋa damukunkulwayi, tahindi? Tahindi niitupa damwidima washishita? Ndochu chahoshaŋawu antu ami nawu, Tudi anyanta nihetu, kwonti kwetu kwinza cheŋi kudeyi.

³²Chaŋadima atweshi kuvulamena yingelingeli yindi? Nsumbuki avulameni yuma yindi yakuvwala? Hakwila antu ami ananvulameni mafuku akadi kuchinda.

³³Oyu njila yeyi yakutonda kukeŋa chiwayiwahishapa! Dichi hela ambanda atama wayileja dehi yaaku yeyi.

³⁴Nikumahineyi kunamwekani mashi awantu atuzwepi akadi nyiloŋa. Hinayiwani chakwijila nakubalula chenzeluku, nayiwani hyuma yejimiyi.

³⁵Hela chochu, eyi neyi, Hinikweti mulopaku. Neyi, Chalala kuzuwa kwindi kunanfumi dehi. Tiya, ochu chiwuneli neyi, Hinavulumunuku; nukusompananeyi.

³⁶Wakimbukilaŋadi mweji momu nakubalumuna njila yeyi? AEjipitu wakayitiya nawa nsonyi neyi chiwatiyili aAshuri nsonyi.

³⁷Wakafuma kudi yena nawa nakukwata mbimba namutu, mulopa Yehova naleki dehi antu iwadiŋi nakukuhwelela eyi, kudi wena hiwakamwenaku kuwahaku.