Read MUKANDA WANZAMBI Jeremia 21 Bible Online

Jeremia 21 - MUKANDA WANZAMBI bible

Jeremia 21

¹Izu denjili kudi Yeremiya dakufuma kudi Yehova, helili mwanta Zedekiya namutemesheli dehi mwana kaMalikiya Pashuri, nimwana kakapristu Mayaseya Zefwaniya,

²hiyakumwila nawu, Twihwili mwani, kudi Yehova, muloŋa mwanta wakuBabiloni Nebukaneza hakulwa netu, wamba kela Yehova wakatwi! mwaya nyidimu yindi yakuhayama yejima, kulonda Nebukaneza atufumi.

³Yeremiya hakuyila nindi, Tiyenu chimwakamwila Zedekiya.

⁴Mwakamwila nenu, Yehova Nzambi yaIsarela nahoshi nindi, Tiyenu, yuma yakwasa nachu njita yidi mumakasenu, vimudi nakulwa nachu namwanta wakuBabiloni, nawaKaladeya anayikuchiki kunzi yampwembu, nakayibalumuna yakatala hanyima, niwenawa antu nakayipompesha mukachi kamukala wunu.

⁵Ninami aweni Yehova nakalwa nenu nachikasa chakwolola, nachikasa chaŋovu, chakuzuwa hohu nikulendumuka, nindombu yasweja.

⁶Ashakama mumukala iwu nakayeta niantu nianyama; akafwa nachipupu cheneni.

⁷Yehova nindi, kulondela henaha mwanta wawaYuda Zedekiya, niambuŋindi, niantu akashala mumukala akabula kufwa nachipupu, nampoku yakabali, ninzala, nakayihana kudi mwanta wakuBabiloni Nebukaneza, nikudi ayilumbu jawu, nikudi akukeŋa kuyijaha. Wakayitapa nawumwemu wampoku yakabali. Hakayanakenaku, hakatiya luwi, hela wushonaku.

⁸Eyi wakayila antu awa neyi, Yehova nahoshi nindi, Tiyenu, hinukuyishila kumesu enu ninjila yawumi ninjila yakufwa.

⁹Wakashakama mumukala wunu wakafwa nampoku yakabali, nanzala, nichipupu; ilaŋa wakafumamu, wakaya nakudimbukila kudi aKaladeya adi nakuyikuchika, wakahanda, niwumi windi wakekala neyi chuma chakupupa kunjita.

¹⁰Muloŋa mukala iwu nawiti mesu akuwukoŋa chatama, bayi akuwukoŋa chachiwahuku. Dimu mwanahoshiyi Yehova. Nindi, Akawuhana kudi mwanta wakuBabiloni, wakawocha nakesi.

¹¹Tiyenu izu daYehova dakutena mutaŋa wamwanta wawaYuda.

¹²Yehova nahoshi nindi, Enu akwamutaŋa waDavidi, ilenu mwawuŋaji habudidi, mwakapulwishaŋa nabuwuwu kudi akwakuyikabisha, mukunkulwayi nukuyilendumukila neyi kesi kakwochaŋa chakukaŋanya kukajima, nakutama kumwelaŋa.

¹³Yehova nindi, Eyi washakama muchinekineki, washakama kwilola damuchana, ami nidi nenu nandombu, enu mwelaŋa nenu, Wakakunkumuka nakulwa nanetu hinyi? Hela nenu, Hinyi wakeŋa ila mutwashakama etu?

¹⁴Yehova nindi, Ami nakayibabesha mwaya nyikabu yayuma yimwelaŋa; nakabutula kesi mwisaŋa dindi kakalasha yuma yanyeŋumukaku yejima.