Read MUKANDA WANZAMBI Jeremia 22 Bible Online

Jeremia 22 - MUKANDA WANZAMBI bible

Jeremia 22

¹Yehova nahoshi nindi, Kunkumukaku kwitala damwanta wawa-Yuda wakahosheluku izu idi.

²Wakeli neyi, Eyi mwanta wawaYuda washakama hetanda daDavidi dawanta, nineyi, niambugeyi, niantu eyi eŋilana kuyisu iyi, tiyenu izu daYehova.

³Yehova nahoshi nindi, Ilenu mwawuŋaji nakuloŋa, mwakapulwishaŋa nabuwuwu kudi akwakuyikabisha; nimwenyi, ninshona, nintuluwa wamumbanda bayi mwakayitamisha hela kuyikoŋa jandombuku, bayi mupwekesha hela mashi akadi muloŋa mwenamunuku.

⁴Muloŋa neyi chalala mwakela chumichi, kuyisu yetalidi kwamba keŋilaŋa anyanta ashakamaŋa hetanda daDavidi dawanta, akendelaŋa nimumakálu, nihatuwalu, niwena niambuŋawu niantu awu.

⁵Kwinza neyi mwakabula kutiya mazu awa, Yehova nindi, Ami nadisanyiki dehi ami aweni nami, Italidi dakabalumuka chihembi.

⁶Muloŋa Yehova nateni dehi mutaŋa wamwanta wawaYuda, nindi, Eyi kudami wuGileyadi, wunamutu waLebanoni; hela chochu, nakakubalumuna kwikala isaŋa tuhu, ninyikala yakadi antu.

⁷Nakakulogeshela akwakukujilu muna, iwu nayuma yindi, iwu nayuma yindi; akatema nyisida yeyi yayiwahi, akayinatila mukesi.

⁸Nyuza yayivulu yakahita kumukaliwu, akahosha, iwu nakumwila mukwawu nindi, Yehova nakogelidi mukaliwu weneni chenichi?

⁹Akadakula nawu, Muloŋa alekeli chitiyaŋenu chaYehova Nzambi yawu, hiyakudifukula kudi akishi, hiyakuyipesha.

¹⁰Bayi mudila mufu hela kudihuŋa kunamutuku. Chiŋa musweja kudila wukufumaku; muloŋa yena hakafunta cheŋi hela kumona ituŋa dindi dasemukililiyuku.

¹¹Muloŋa Yehova nateni Shalumi mwana kaYosiya, mwanta wawaYuda, waswanini tata yindi Yosiya, wedikili mweamunu hakuya, nindi, Hakafunta cheŋi munuku;

¹²muloŋa wakafwila kwokwenakuna kwanamutwaluwu muwukoli, ituŋa dinu hakadimoa cheŋuku.

¹³Yayo muntu wukutuŋa itala dindi nakuheŋa, wukutuŋa tupeka twindi nakubula chiyulu, wukukalakesha mukwawu chamukunkulwayi, chakubula kumwinka wufwetu;

¹⁴wukwila nindi, Nukutuŋa itala dami deneni, nitupeka twamaneni, wukulokola njanina jindi; itala datupala twanyisida dakupenta wulombu wuchinana.

¹⁵Muwanta wakashakaminamu nanochu chiwafwila kubadika akwenu nyisida, tahindi? Tata yeyi hadiilaŋaku? Hanwinaŋaku? Helilaŋa mwawuŋaji nachiyuluku? Hashakamini chachiwahuku?

¹⁶Yena kwindi wasompelaŋa nyiloŋa yawatuzweŋi nawabula yuma; chadiŋi chachiwahi. Chelilaŋayi mwenimu hiyowu kuŋilukaku? Dimu mwanahoshiyi Yehova.

¹⁷Ilaŋa mesu eyeyi, nimuchima weyeyi hiwukweti mudimu wacheŋuku chiŋa lwolwisu lweyi, nikupwekesha mashi akadi muloŋa, nikukabisha antu, nikwila jandombu.

¹⁸Dichi Yehova nateni dehi Yehova kimi mwana kaYosiya mwanta wawaYuda nindi, Akabula kumudila nawu, Lelu mana kwami! hela nawu, Lelu muhelami! Akabula kumudila nawu, Lelu nkako! hela nawu, Lelu lubanji lwindi!

¹⁹Akamujiika neyi chajiikaŋawu chimbulu, wakukoka nakunata hanzi yayisu yampwembu yaYerusalema.

²⁰Kandukaku kuLebanoni, wukaluki nyiteti; koleshaku izu deyi muBashani, wakakalukili nyiteti kuAbarimi; akwenu akukegelaŋa anajilumuki.

²¹Hiwashakaminaŋa nakuluŋa nahosheli neyi, eyi welili neyi, Ami kwami kutiya nehi. Dimu welilaŋa kufumisha kuwansi weyi, hiwovwahililaŋa izu damuku.

²²Tubiŋa tweyi twejima akayidiisha mpepela, akukegeli akaya muwukoli. Chalala wakatiya nsonyi, wakabaya nakutama kweyi kwejima.

²³Eyi washakama muLebanoni, watuŋilaŋa wuswa weyi munyisida, o chiwakatela kukutiyila wushona, hakakuwana nyisoŋu yidi neyi yikatu yamumbanda wudi nakuvwala!

²⁴Yehova nindi, Ichi nahandichi kwaamu, hela eyi Koniya mwana kaYehova kimi mwanta wawaYuda, neyi wadiŋi kazeya kakuchikasa chami chachidiilu, nadi kukutomonaku tuhu kwami;

²⁵nadi kukuhana kudi wena akukeŋa kukujaha, nikudi wena watiya woma, kwokudi mwanta wakuBabiloni Nebukaneza, nikudi aKaladeya.

²⁶Nineyi nimama yeyi wakuvweli, nakayinatila mwituŋa dacheŋi dimwabulili kusemukila, kwoku mwakafwila.

²⁷Hakwila kwituŋa datiyilaŋawu chipepa chakufuntaku hiyakafunta kwoku.

²⁸Yeniwu iyala Koniya hinsaba yadiwulawu yafumpika dehi, tahindi? Hinsaba yaseka dehi, tahindi? Ndochu anayinatilidi niyena nianyanindi, anayinatilidi mwituŋa dabula kwilukawu?

²⁹Eyi iseki, iseki, iseki, tiya izu daYehova.

³⁰Yehova nindi, Musonekelenu muntu iwu jawushinta, iyala wakabula kumona kuwaha mumafuku indi; muloŋa kudi anyanindi hikwakamwekana iyala wakamona kuwaha nakushakama hetanda daDavidi dawanta, nakuyula nawa cheŋi muYudaku.