Read MUKANDA WANZAMBI Jeremia 23 Bible Online

Jeremia 23 - MUKANDA WANZAMBI bible

Jeremia 23

¹Yehova nindi, Yayo, o yihuŋu yikukeŋa kumonawu atubiŋa ajilumunaŋa, apalageshaŋa nyikoku yahawudiilu wanyikoku yami!

²Dichi Yehova, Nzambi yaIsarela, nateni atubiŋa adiishaŋa ntu ami nindi, Munaŋalaŋeshi mukanka wami wanyikoku, munayihaŋi, himunayi nakuyitalaku. Yehova nindi, Tiyenu, nakayishikŋila kutama kwyuma yimwelaŋa.

³Ahamukanka wami wanyikoku anashalashali, nakayikuŋula mumatuŋa ejima munayitemwini, nakayileta cheŋi kumayindawu; akasemununa, akavula.

⁴Nakayishila atubiŋa akayidiishaŋa. Hiyakatiya cheŋi woma hela kwakamaku. Hikwakabula wumuku. Dimu mwanahoshiyi Yehova.

⁵Yehova nindi, Tiyenu, kwakenza mafuku inakamusaŋu mwina Davidi Mutayi waloŋa, wakekala Mwanta, wakela mwamaana, wakela yawuŋaji niyacluyulu mwituŋa.

⁶Mumafuku indi dimu mwakaamwinewa aYuda, niaIsarela akashakama chakadi kwakama. Tiyenu ijina dindi dakamutenawu, akamutena nawu, Yehova diyi kuloŋa kwetu.

⁷Dichi Yehova nindi, Tiyenu, kwakenza mafuku akabula kuhoshawu cheŋi nawu, Chahandayi Yehova kwaamu, Yehova wakandwishili anyana kaIsarela mwituŋa daEjipitu.

⁸Ilaŋa akela nawu, Chahandayi Yehova kwaamu, Yehova wakandwishili akwamutaŋa waIsarela, wayilombweli chakuyifumisha mwituŋa dakukabeta kakuchimunswa, nimumatuŋa ejima munayitemwinini; akashakama mwituŋa dawu awenawu.

⁹Nsaŋu yawatuprofwetu. Muchima wami wunabaluki mwivumu, mafwahami ejima adi nakunyinkesha. Nidi neyi muntu nasheti, neyi muntu wafwomoka dehi navinyu, nansaŋu yaYehova, nansaŋu yamazu indi ajila.

¹⁰Yehova nindi, Muloŋa ituŋa denzala dehi yivumbi, ituŋa didi nakudishona nsaŋu yakushiŋana. Madiilu amwisaŋa anomi. Mwatwalaŋaawu mwatama Ŋovu jawu hŋaloŋaku.

¹¹Muloŋa niatuprofwetu, niatupristu, ajilola dehi. Eŋa, mwitala dami nawani kutama kwawu.

¹²Yehova nindi, Dichi munjila yawu akayimona neyi mwasenena senena mumwidima; akayitemuna, ayaloŋa ho-o, akadimbukilamu. Muloŋa ami nakayiletela katama, katamoku wowu mwaka wakuyihempula.

¹³Mudi atuprofwetu akuSamariya namonumu wusupi. Ayiprofwetesheli kudi Bayali, hiyakuluwaŋesha antu ami aIsarela.

¹⁴Mudi atuprofwetu amuYerusalema nawa namonumu chuma chamajilu. Hiyakukoŋa wuvumbi, hiyakwenda mwakutwambatwamba, hiyakukolesha makasa awantu akoŋaŋa chatama, chakubula nimuntu wumu wukufuntamu aleka kutama kwindi. Wejima wawu nayimoni anekali dehi neyi Sodoma, ashakamaku anekali dehi neyi Gomora.

¹⁵Dichi Yehova wamazaza nateni atuprofwetu, nindi, Tiyenu, nakayidiisha mutondu walula, nakayinwisha meji awulembi. Muloŋa kujilola kunafumi kudi atuprofwetu akuYerusalema kuneŋili dehi mwituŋa dejima.

¹⁶Yehova wamazaza nahoshi nindi, Bayi mutiyililaŋa mazu awatuprofwetu adi nakuyiprofwetelaku. Ayilejaŋa yuma yakuhemesha. Ahoshaŋa chimwenu chamunyichima yawu awenawu, hichamukanwa kaYehovaku.

¹⁷Mafuku ejima ayilaŋa antu andiwulaŋa nawu, Yehova nahoshi nindi, Mwakamona kumwena. Ayilaŋa endaŋa mwaya kuchinchika kwanyichima yawu awenawu, nawu, Kwosi katama kakayiwanaku.

¹⁸Nemani hampùŋa yaYehova mwaka ashinshiki atiyi izu dindi, hinyi? Natalishi muchima kwizu dami nakuditiya, hinyi?

¹⁹Tiyenu, mpepela yaYehova yeneni yinediki dehi kwokulendumuka kwindi, eŋa, himpepela yeneni yachinjimbi, yakabalukila hanamutu wamukwakwila chatama.

²⁰Kuzuwa kwaYehova hikwakafunta mwokuku, chiŋa neli dehi, chiŋa nakoŋi dehi yafuukulayi mumuchima windi; chakayilumbulukila chikupu mumafuku akukuminina.

²¹Atuprofwetu awa ami hinayitemesheluku, hela chochu, ayili lufuchi; ami kuhosha nawu nehi, hela chochu, aprofweteli.

²²Ilaŋa neyi emeni hampùŋa yami, mutenowu anatiyishi antu mazu ami, mutenowu anayifuntishi munjila yawu yatama, nimwelaŋawu mwatama.

²³Yehova nindi, Ami niNzambi wakwakwihi, hiniNzambi wakwakulehuku, tahindi?

²⁴Yehova nindi, Muntu atweshi kubatama kumbeŋu nakumbeŋu kwakubula kumumona kudami, tahindi? Yehova nindi, Hiyami inenzali nimwiwulu nihesekuku?

²⁵Ami natiyi mwanahoshuwu atuprofwetu aprofwetaŋa yakutwamba mwijina dami, nawu, Ami naloti, naloti.

²⁶Chumichi chikushakama nyaka yiŋahi munyichima yawatuprofwetu aprofwetaŋa yakutwamba, aprofwetaŋa kudimbana kwamunyichima yawu?

²⁷Atogojokaŋa jakuvulamesha antu ijina dami nayilota yawu yadilejaleja ŋawu nawakwawu, neyi chavulamenuwu ankakulula jawu ijina dami hiyakuhiŋishamu daBayali.

²⁸Kaprofwetu wukweti chilota, ashimuni chilota. Wukweti izu dami, ashimuni izu dami chakashinshi. Muzuŋu wowumu natidiku? Dimu mwanahoshiyi Yehova.

²⁹Yehova nindi, Izu dami hididi neyi kesuku? Hididi neyi hamala yabalulaŋa ilola yibalu yibaluku?

³⁰Dichi Yehova nindi, Tiyenu, atuprofwetu eyaloŋa akwawu mazu ami, hinakumi kudi wenaku.

³¹Yehova nindi, Atuprofwetu elaŋa ahosha namadimi awu awenawu, hiyakwila nawu, Yena diyi nahoshi, ami hinakumi kudi wenaku.

³²Yehova nindi, Tiyenu, atuprofwetu aprofwetaŋa yilota yakutwamba, hiyakuyilejayu akwawu, hiyakuluwaŋesha antu ami nakutwamba kwawu, nakudisamba kwawu kwamukunkulwayi, ami hinakumi kudi wenaku. Ami kwami hinayitemesheli hela kuyilejaku; niwena hiyakayiwahisha antu awa nihantuku. Dimu mwanahoshiyi Yehova.

³³Hela antu awa, hela kaprofwetu, hela kapristu, akakwihula nawu, Wuprofwetu waYehova hiwuprofwetwinyi? eyi wakayila neyi, Wuprofwetu, yenu. Yehova nindi, Nukuyinata kwami.

³⁴Hakwila hela kaprofwetu, hela kapristu, hela antu, akela nawu, Wuprofwetu waYehova, ami nakababesha yena muntu owu nimutaŋa windi.

³⁵Tiyenu chimwakayila akwenu nawana kwenu. Kayilenu nenu, Yehova naakuli nindidi? Hela nenu, Yehova nahoshi nindidi?

³⁶Bayi mwakatena cheŋi wuprofwetu waYehovaku, muloŋa wuprofwetu wamuntu himuntu dodizu dindi yomweni muntu. Muloŋa munabalumuni dehi mazu aNzambi wamumi, aNzambi yetu Yehova wamazaza.

³⁷Tiya chiwakamwila owu kaprofwetu, kamwili neyi, Yehova nakwakuli nindidi? Hela neyi, Yehova nahoshi nindidi?

³⁸Ilaŋa neyi mwakela nenu, Wuprofwetu waYehova; dichi Yehova nahoshi nindi, Ochu chimunahoshi nenu, Wuprofwetu waYehova, kutoŋa ami natemesheli kudenu nami, Bayi mwakela nenu, Wuprofwetu waYehovaku;

³⁹dichi tiyenu, ami nakayivulamena chikupu, nakayinata ninenu, nimukala wunenkelenu nawankakulula jenu, mwakafumi kumesu ami.

⁴⁰Nakayisawisha kusawuka kwahaya nyaka, nakayitiyisha nsonyi yakadi kukuma, yakabula kuvulamenawu antu.