Read MUKANDA WANZAMBI Jeremia 26 Bible Online

Jeremia 26 - MUKANDA WANZAMBI bible

Jeremia 26

¹Hatachikili wanta waYehoyakimi mwana kaYosiya, mwanta wawa Yuda, kwenjili izu dakufuma kudi Yehova,

²dakwila nindi, Yehova nahoshi nindi, Imanaku muchipaŋu chakwitala daYehova, wakahoshi nawakwanyikala yawaYuda yejima yenzaŋa nakudifukwila mwitala daYehova, mazu ejima inakakuleja kuhosha kudi wena, bayi wakasweka izu nidimuku.

³Wamba kela akatiyilila, akabalumuka, iwu nakushiya njila yindi yatama, iwu nakushiya njila yindi yatama, kulonda nakabalumuki nakaleki kunafuukula kuyikoŋa nayuma yatama yelaŋawu.

⁴Wakayila neyi, Yehova nahoshi nindi, Neyi mwakatiyilila kudami nakwenda munshimbi jami jinashili kumesu enu,

⁵nakutiyilila mumazu awambuŋami atuprofwetu inayitemeshelaŋa, chakumenekaŋa budidi nakuyitemeshela, ilaŋa enu kwenu kutiyililaŋa nehi;

⁶ami kwami nakabalumuna italidi kwikala neyi Shilo, nakabalumuna mukaliwu kwikala ishiŋu kudi nyuza yejima yaheseki.

⁷Niatupristu, niatuprofwetu, niantu ejima atiyili chakuhoshayi Yeremiya mazu awa mwitala daYehova.

⁸Cheliliyi Yeremiya nakumishi dehi kuhosha mazu ejima amulejeliyi Yehova kuhosha nawantu ejima, atupristu niatuprofwetu niantu ejima hiyakumukwata, nawu, Eyi chiŋa wufwa hohu.

⁹Indi eyi wunaprofwetelidi mwijina daYehova neyi, Italidi dakekala neyi Shilo, nimukaliwu wakekala kwachihembi chakadi antu? Antu ejima hiyakumupompela Yeremiya mwitala daYehova.

¹⁰Atulamba twawaYuda chiyatiyiluwu yumiyi, hiyakufuma kwitala damwanta, hiyakukankalala kwitala daYehova. Hiyakushakama muwiŋililu wakuchisu chachiha chakuchipaŋu chakwitala daYehova.

¹¹Atupristu nawatuprofwetu hiyakuhosha nawatulamba nawantu ejima, nawu, Muntu iwu nateli kufwa; muloŋa yena naprofweti dehi chakuzuwila mukaliwu mwomu mumunatiyi namatu enwenu aweni.

¹²Dichi Yeremiya hakuyila atulamba ejima niantu ejima, nindi, Yehova diyi wantemesheli nakaprofweti chakuzuwila italidi nimukaliwu, namazu ejima imunatiyi.

¹³Dichi dinu wahishenu njila jenu niyimwelaŋa, mwovwahili izu daYehova Nzambi yenu, niyena Yehova wakabalumuka mumuchima wakaleka katama kanayiteneniyi.

¹⁴Hakwila ami, yamonu nidi kumakasenu; ŋilenu mwejima mumunamoni kuwaha nikuloŋa.

¹⁵Ilaŋa ilukenu chalala chikupu nenu, neyi mwakanjaha mwakadikojeja mashi akadi muloŋa ninenu, nimukaliwu, niantu ashakamamu. Chalala chi, Yehova diyi nantemeshi kudenu nakahoshi mazu awa ejima kumatu enu.

¹⁶Atulamba nawantu ejima hiyakuhosha nawatupristu nawatuprofwetu, nawu, Muntu iwu hanateli kufwaku. Mulopa yena nahoshi nanetu mwijina daYehova Nzambi yetu.

¹⁷Hikukunyamuka awakulumpi amakwawu amwituŋa, hiyakuhosha nachipompelu chawantuchejima,

¹⁸nawu, Mikaya waku Moresheti waprofweteli hamafuku adiŋiyi mwanta wawaYuda Hezekiya. Wahosheli nawantu amuYuda ejima, nindi, Yehova wamazaza nahoshi nindi, Ziyona akamudima nyihaŋaneyi chikweha, Yerusalema wakabalumuka kwanyilumba nyilumba, mpidi yetala yakabalumuka neyi yinaŋanaŋa yamwisaŋa.

¹⁹Mwanta wawaYuda Hezekiya nawaYuda ejima amujahili? Hatiyili woma waYehovaku? Halembeleli nindi amoni wuselewa waYehovaku? Yehova habalumukili mumuchima, aleka katama kayiteneneniyuku? Neyi etu tukwila mwenimu tukudikokela kutama kwasweja.

²⁰Kwadiŋi nawa muntu waprofweteli mwijina daYehova, yowu mwana kaShemaya Uriya wakuKiriyati Yeyarimi, niyena waprofweteli chakuzuwila mukaliwu niituŋidi mwomunayi mazu aYeremiya ejima.

²¹Mwanta Yehoyakimi nawayilobu jindi ejima, niatulamba ejima, chatiyiluwu mazu indi, mwanta wakegeli kumujaha. Ilaŋa chachitiyili Uriya watiyili woma, hakutemuka lufuchi, hakuya muEjipitu.

²²Mwanta Yehoyakimi hakutemesha antu muEjipitu, antu atemesheliyi muEjipitu wowu aElinatani mwana kaAkibori nawantu amakwawu ayiliyi nawu.

²³Amufumishili Uriya muEjipitu, amuleteli kudi mwanta Yehoyakimi. Yena wamujahili nampoku yakabali, anatili mujimba windi mumajamu awantu amukunkulwayi.

²⁴Ilaŋa chikasa chamwana kaShafwani Ahikami chakumini kudi Yeremiya, kulonda akabuli kumuhana kudi antu mwaka amujahi.